អ្នកនាំពាក្យក្រសួងសុខាភិបាលបានឱ្យដឹងថា រដ្ឋាភិបាលសម្រេចបិទក្លឹប N8 និងកោះពេជ្របណ្តោះអាសន្ន ដើម្បីទប់ស្កាត់ការឆ្លងរាលដាលជំងឺកូវីដ ខណៈកម្ពុជារកឃើញអ្នកឆ្លងចូលសហគមន៍ជាង៣០នាក់នៅថ្ងៃនេះ។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន មានប្រសាសន៍ប្រាប់វីអូឌីនៅថ្ងៃនេះថា ព្រឹត្តិការណ៍ឆ្លងរាលដាលមេរោគកូវីដ១៩ នៅក្នុងសហគមន៍«២០កុម្ភៈ» ឆ្នាំ២០២១ កម្ពុជារកឃើញអ្នកឆ្លងថ្មីចំនួន៣២នាក់ ហើយនៅថ្ងៃនេះដែរ រដ្ឋាភិបាលសម្រេចបិទក្លឹប N8 និងកោះពេជ្របណ្តោះអាសន្ន ដើម្បីស្រាវជ្រាវរកអ្នកឆ្លង ឬអ្នកសង្ស័យ ឬអ្នកជាប់ពាក់ព័ន្ធជាមួយអ្នកឆ្លងជំងឺកូវីដ១៩។
លោកស្រីមានប្រសាសន៍ថា៖ «សម្តេចប្រកាសព្រឹកមិញហើយ បិទបណ្តោះអាសន្ន ដើម្បីស្រាវជ្រាវ [រកអ្នកឆ្លង និងអ្នកពាក់ព័ន្ធជាមួយអ្នកឆ្លងជំងឺកូវីដ]»។
អ្នកសារព័ត៌មាន វីអូឌី បានចុះទៅដល់ក្លឹប N8 និងកោះពេជ្រ ឃើញសមត្ថកិច្ចបានដាក់របាំងបិទផ្លូវនៅតំបន់នោះមួយចំនួន ជាពិសេសផ្លូវតូច មិនឱ្យប្រជាពលរដ្ឋធ្វើដំណើរឆ្លងកាត់នោះទេ។ រីឯ ផ្លូវធំអនុញ្ញាតឱ្យអ្នកដំណើរឆ្លងកាត់ ប៉ុន្តែត្រូវត្រួតពិនិត្យតឹងរ៉ឹង ដើម្បីទប់ស្កាត់ការឆ្លងជំងឺកូវីដ១៩ឱ្យមានប្រសិទ្ធភាពខ្ពស់ ពីព្រោះនៅកោះពេជ្រមានសង់រោងអាពាហ៍ពិពាហ៍ប្រហែលជា៣កន្លែងផងដែរ។
លោកនាយករដ្ឋមន្ត្រី ហ៊ុន សែន ថ្លែងនៅព្រឹកនេះថា លោកមិនទាន់ប្រកាសបិទសាលារៀន និង ពិធីមង្គលការទេ បើពលរដ្ឋសហការទប់ស្កាត់ការឆ្លងរាលដាលមេរោគកូវីដ១៩។ ប៉ុន្តែលោកថា បើប្រជាពលរដ្ឋមិនសហការនោះ លោកនឹងជ្រើសយកការរឹតបន្តឹងការជួបជុំជាថ្មីទៀត។
បើតាមក្រសួងសុខាភិបាល គិតត្រឹមព្រឹកថ្ងៃទី២០ ខែកុម្ភៈ ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ១៩ ចំនួន៥១៦នាក់ ក្នុងនោះ អ្នកព្យាបាលជាសះស្បើយចំនួន៤៧០នាក់ និងអ្នកដែលកំពុងសម្រាកនៅមន្ទីរពេទ្យចំនួន៤៦នាក់៕