សមត្ថកិច្ចខេត្តកណ្តាល នៅថ្ងៃនេះ បានឃាត់ខ្លួនមនុស្ស១៣នាក់ ពាក់ព័ន្ធជម្លោះដីធ្លីមួយកន្លែង ស្ថិតនៅភូមិព្រែកល្វា ឃុំតាកូវ ស្រុកខ្សាច់កណ្តាល។
អធិការរងស្រុកខ្សាច់កណ្តាល លោក អ៊ុន យ៉ុង ប្រាប់វីអូឌីថា មនុស្ស១៣នាក់ដែលបានឃាត់ខ្លួននោះ កំពុងស្ថិតក្រោមការសាកសួរនៅអធិការដ្ឋាននគរបាលស្រុកខ្សាច់កណ្តាល។
លោកថា សមត្ថកិច្ចឃាត់ខ្លួនពលរដ្ឋទាំងនោះ ដោយសារពួកគេបានធ្វើសកម្មភាពលើដីកំពុងមានជម្លោះ និងដុតកង់ឡានតវ៉ាប្រឆាំងអាជ្ញាធរពេលចុះអនុវត្តការងារ។
លោក អ៊ុន យ៉ុង អះអាងថា ពលរដ្ឋប្រហែល១០គ្រួសារ បានលក់ដីទំហំជាង១ហិកតាទៅឱ្យបុគ្គល២នាក់ផ្សេងគ្នា បណ្តាលឱ្យមានជម្លោះ ហើយពេលអាជ្ញាធរចុះហាមមិនឱ្យធ្វើសកម្មភាពនានាលើដីនោះ ដោយរង់ចាំការដោះស្រាយសិន ប៉ុន្តែត្រូវបានរារាំងដោយពលរដ្ឋទាំងនោះទៅវិញ។
លោកបន្ថែមថា៖ «បុគ្គលឈ្មោះ រាំង ហ្នឹង បានទិញពីប្រជាពលរដ្ឋទាំងអស់ហ្នឹង ដោយមានឯកសារត្រឹមត្រូវ ប៉ុន្តែក្រោយមកទៀត ប្រជាពលរដ្ឋទាំងប៉ុន្មានគ្រួសារហ្នឹង បានលក់ដីហ្នឹងទៅឱ្យបុគ្គលម្នាក់ទៀតឈ្មោះ ថា នៅពេលថ្មីៗហ្នឹងទៀត អ៊ីចឹងវាបង្កើតបានជាបញ្ហា»។
វីអូឌី មិនអាចសុំការបញ្ជាក់ពីអភិបាលស្រុកខ្សាច់កណ្តាល លោក ប៊ុន ផេង និងតំណាងខាងពលរដ្ឋដែលរងការចាប់ខ្លួនបាននោះទេ នៅថ្ងៃអង្គារនេះ។
ចំណែកអ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានឱ្យដឹងថា សមាគមនេះកំពុងស្រាវជ្រាវលើករណីដែលមានការចាប់ខ្លួនពលរដ្ឋនៅខេត្តកណ្តាលនេះដែរ៕
