សភាមន្ត្រីយោធាថ្នាក់ឧត្តមសេនីយ៍មួយរូប កំពុងតតាំងក្ដីជាមួយមន្ត្រីជាន់ខ្ពស់ក្រសួងការពារជាតិម្នាក់នៅតុលាការ ជុំវិញវិវាទដីមួយកន្លែងក្នុងរាជធានីភ្នំពេញ ដោយមន្ត្រីយោធារូបនេះបានចោទមន្ត្រីក្រសួងការពារជាតិថាជាមេគំនិតក្នុងការលួចលក់ដីរបស់ខ្លួនទៅឱ្យតំណាងរាស្ត្របក្សកាន់អំណាចម្នាក់។
លោក ភឺន ផល្លា ជាមន្ត្រីយោធាផ្កាយ២ នៃកងពលតូចលេខ៧០ និងមានងារជាឧកញ៉ា បានដាក់ពាក្យបណ្តឹងទៅសាលាដំបូងរាជធានីភ្នំពេញ ប្រឆាំងនឹងអនុរដ្ឋលេខាធិការក្រសួងការពារជាតិ លោក ស ថាវី និងបក្សពួក៤នាក់ផ្សេងទៀត ដោយចោទប្រកាន់ពីបទ «លួចលក់ និងផ្ដើមគំនិតឱ្យលក់ដីទំហំ២ហិកតា» ក្នុងសង្កាត់សំរោង ខណ្ឌព្រែកព្នៅ ដែលជាដីកម្មសិទ្ធិរបស់លោក ភឺន ផល្លា។
យោងតាមក្រឡាបញ្ជីសាលាដំបូង ដែលបានលើកពីអង្គហេតុនៅក្នុងសវនាការមួយកាលពីដើមខែនេះ ដីមានវិវាទនោះត្រូវបានលក់ទៅឱ្យលោកស្រី ឡោក ខេង តំណាងរាស្រ្តគណបក្សប្រជាជនកម្ពុជា កាលពីឆ្នាំ២០១៩ ហើយក្រោយមកទើបដឹងថា ព្រំដីរបស់គាត់ត្រូវបានត្រួតលើគ្នាជាមួយដីរបស់លោក ភឺន ផល្លា។
នៅក្នុងសវនាការកាលពីសប្តាហ៍មុន មន្ត្រីសង្កាត់ម្នាក់ដែលបានផ្តិតមេដៃលើឯកសារនៃការផ្ទេរដីនោះ បាននិយាយថា ដីទំនាស់ទំហំ២ហិកតានោះគឺជាកម្មសិទ្ធិរបស់លោក ភឺន ផល្លា។
ប៉ុន្តែកាលពីថ្ងៃចន្ទម្សិលមិញ តំណាងរាស្ត្រគណបក្សប្រជាជនកម្ពុជា និងជាសមាជិកគណៈកម្មាធិការកណ្តាល លោកស្រី ឡោក ខេង បានអះអាងថា ដីនេះនឹងនៅតែជារបស់លោកស្រីដដែល។
លោកស្រីបានបញ្ជាក់ថា៖ «ដីហ្នឹងតាំងពីខ្ញុំទិញមក ខ្ញុំកាន់កាប់តែម្ដង តាំងពីទិញមកអត់មានបញ្ហាអីទេ។ ខ្ញុំអត់វង្វេងទេ កុំភ័យ! ការពិតនៅតែជាការពិត ទុកឱ្យច្បាប់គេរក [ខុសត្រូវ] ទៅ ព្រោះអីយើងបានធ្វើតាមច្បាប់ត្រឹមត្រូវតាមហ្នឹង»។
ជនជាប់ចោទ៣នាក់ក្នុងចំណោម៥នាក់ក្នុងករណីវិវាទដីធ្លីនេះ រួមមាន អ្នកយាមដីម្នាក់ និងឈ្មួញដីធ្លី២នាក់ បានផ្តល់សក្ខីកម្មក្នុងសវនាការសាលាដំបូងរាជធានីភ្នំពេញ កាលពីថ្ងៃទី៥ ខែកុម្ភៈ ខណៈពួកគេត្រូវបានចោទប្រកាន់ពីបទ «លួចលក់អចលនទ្រព្យអ្នកដទៃដែលមិនមែនជារបស់ខ្លួន» ដែលប្រឈមនឹងការផ្តន្ទាទោសដាក់ពន្ធនាគារពី ៦ខែ ទៅ ៣ឆ្នាំ តាមច្បាប់ភូមិបាល។
ជនជាប់ចោទម្នាក់ លោក ប៉ូច ថេន អះអាងថា ជាអ្នកយាមដីម្នាក់ឱ្យលោក ស ថាវី មន្ត្រីជាន់ខ្ពស់ក្រសួងការពារជាតិ បានប្រាប់ទៅតុលាការថា លោក ស ថាវី បានទិញដីមួយកន្លែងពីឈ្មួញដីឈ្មោះ ឡុង ដារ៉ា និង ឡូញ រស់ និងបានស្នើឱ្យគាត់ដាក់ឈ្មោះជំនួស។
លោកបន្ថែមថា លោក ស ថាវី បានឱ្យគាត់ទុកឯកសារទិញលក់ដីនោះជំនួស ដោយសារលោក ស ថាវី ជាប់រវល់ចុះតាមខេត្ត។ ចំណែកលោក ឡូញ រស់ ជាឈ្មួញដីម្នាក់ក្នុងចំណោម២នាក់ ដែលបានលក់ដីទៅឱ្យលោក ស ថាវី បាននិយាយនៅក្នុងសវនាការថា លោកបានទទួលដីនោះ ពីលោក ឡុង ដារ៉ា មុនពេលលក់បន្តទៅឱ្យលោក ប៉ូច ថេន។ លោកបញ្ជាក់ថា លោកក៏មិនដឹងថា ដីនោះមានបញ្ហានោះទេ។
ប៉ុន្តែលោក ឡុង ដារ៉ា ជាឈ្មួញដីម្នាក់ទៀតបានអះអាងថា លោក ស ថាវី ដែលជាអនុរដ្ឋលេខាធិការក្រសួងការពារជាតិ គឺជាអ្នកផ្ដួចផ្ដើមគំនិតឆបោកក្នុងរឿងនេះ។
លោកបន្តថា លោក ស ថាវី បានដឹងរួចហើយថា ដីនោះគឺជាដីរបស់លោក ភឺន ផល្លា ប៉ុន្តែលោក ស ថាវី នៅតែទិញដីនោះ ដោយដាក់ឈ្មោះអ្នកយាមដីជំនួសលោក ខណៈដីនោះ លោក ឡុង ដារ៉ា បានស្នើទៅកាន់មន្ទីរដែនដី ឱ្យចុះវាស់វែងប្លង់ឱ្យ។
លោកបន្ថែមថា ការផ្ទេរសិទ្ធិដីធ្វើឡើងតាមរយៈចៅសង្កាត់សំរោង និងមានការសម្របសម្រួលពីលោក អ៊ុក ភក្ដី ដែលជាជនជាប់ចោទម្នាក់ទៀតក្នុងរឿងនេះ។
យោងតាមវិក្កយបត្រលក់ដី ដែលត្រូវបានផ្សព្វផ្សាយនៅលើគេហទំព័រសារព័ត៌មាន KBN បានឱ្យដឹងថា តំណាងរាស្ត្រគណបក្សប្រជាជនកម្ពុជា លោកស្រី ឡោក ខេង បានបង់លុយចំនួន១,៣លានដុល្លារ ទៅឱ្យលោក ស ថាវី ដើម្បីទិញដីនោះ ខណៈលោក ឡុង ដារ៉ា បានឱ្យដឹងថា លោកបានទទួលប្រាក់តែ៧ ០០០ដុល្លារប៉ុណ្ណោះ។
ចៅសង្កាត់សំរោង លោក យិន អ៊ឹម បានបញ្ជាក់ប្រាប់វីអូឌីថា ផ្ទៃដី២ហិកតាដែលកំពុងមានវិវាទនេះ ជារបស់មន្ត្រីយោធា លោក ភឺន ផល្លា ដោយលោកអះអាងថា ពលរដ្ឋចំនួន៤គ្រួសារបានលក់ដីនោះឱ្យលោក ភឺន ផល្លា ប៉ុន្តែចៅសង្កាត់រូបនេះមិនបានចាំពេលវេលានៃការលក់នោះទេ។
អ្នកនាំពាក្យក្រសួងការពារជាតិ លោក ឈុំ សុជាតិ មានប្រសាសន៍ថា ជម្លោះដីធ្លីនេះជារឿងឯកជន មិនមានពាក់ព័ន្ធនឹងក្រសួងនោះទេ ហើយការដោះស្រាយយ៉ាងណានោះជាដែនសមត្ថកិច្ចរបស់តុលាការ។
លោក ឈុំ សុជាតិ មានប្រសាសន៍ថា៖ «ក្រសួងអត់មានសិទ្ធិលូកលាន់អីទេ អ្នកណាប្រព្រឹត្តខុស អ្នកហ្នឹងទទួលទោសតាមហ្នឹងទៅ»។
លោក ស ថាវី អនុរដ្ឋលេខាធិការក្រសួងការពារជាតិ បញ្ជាក់យ៉ាងខ្លីថា លោកមិនបានដឹងរឿងនេះទេ។
ទោះយ៉ាងណា តុលាការសាលាដំបូងរាជធានីភ្នំពេញ នឹងប្រកាសសាលក្រមលើសំណុំរឿងនេះ នៅថ្ងៃទី១ ខែមីនា ឆ្នាំ២០២១។
ក្រៅពីវិវាទដីធ្លីនេះ លោក ភឺន ផល្លា ក៏កំពុងតតាំងក្តីនៅតុលាការរឿងដីធ្លីមួយកន្លែងទៀតដែលមានទំហំ០,២ហិកតា នៅរាជធានីភ្នំពេញ។ លោក នួន បូរ៉ា មេធាវីរបស់លោក ភឺន ផល្លា បានបដិសេធមិនធ្វើអត្ថាធិប្បាយជុំវិញករណីនេះ៕