មន្ត្រីនគរបាលប្រឆាំងការជួញដូរមនុស្សមួយរូប បានប្តឹងកូនប្រុសម្ចាស់ខារ៉ាអូខេ (KTV) មួយកន្លែងក្នុងខេត្តព្រៃវែង ពីបទ«បរិហារកេរ្តិ៍» ដោយសារបង្ហោះវីដេអូដែលចោទប្រកាន់មន្ត្រីរូបនោះថាបានប្រើប្រាស់ហិង្សាក្នុងហាង បន្ទាប់ពីបរាជ័យក្នុងការបញ្ចុះបញ្ចូលបុគ្គលិកនារីម្នាក់ឱ្យទៅគេងជាមួយខ្លួន។
លោក ឡុង ប៊ុនធឿន អធិការនគរបាលស្រុកពារាំង ខេត្តព្រៃវែង បានបញ្ជាក់ថា ហេតុការណ៍នេះ បានកើតឡើងកាលពីថ្ងៃសុក្រសប្តាហ៍មុន ខណៈមន្ត្រីនគរបាលមួយរូបឈ្មោះ ហាក់ លី បានចូលទៅច្រៀងខារ៉ាអូខេមួយកន្លែងក្នុងខេត្តព្រៃវែង។ លោកបន្តថា លោក ហាក់ លី ពិតជាបានបង្កជារបួសស្នាមដល់ម្ចាស់ហាងពិតមែន។
លោកថា៖ «យើងបានធ្វើការសួរនាំទៅខាងម្ចាស់ហាងរួចហើយ។ គាត់មានការហើមក។ អាជ្ញាធរកំពុងធ្វើការស្រាវជ្រាវលើករណីនេះ មានករណីអំពើហិង្សាបានកើតឡើង»។
ប្រធានការិយាល័យប្រឆាំងការជួញដូរមនុស្ស និងការពារអនីតិជន នៃស្នងការនគរបាលរាជធានីភ្នំពេញ លោក កែវ ធា បានបញ្ជាក់ថា លោក ហាក់ លី ពិតជាមន្ត្រីប្រឆាំងការជួញដូរមនុស្សនៅក្នុងរាជធានីភ្នំពេញពិតមែន។
អ្នកស្រី ឡោ សារ៉ុម អាយុ៤៣ឆ្នាំ ដែលជាម្ចាស់ហាងខារ៉ាអូខេនោះ បានប្រាប់ឱ្យដឹងថា កាលពីថ្ងៃចន្ទម្សិលមិញ មន្រ្តីប៉ូលិសបានធ្វើការសាកសួររូបគាត់ ជុំវិញហេតុការណ៍នោះជាង៤ម៉ោង។
អ្នកស្រីបន្តថា លោក ហាក់ លី និងមនុស្សប្រមាណ៤នាក់ទៀតបានទៅទទួលទានគ្រឿងស្រវឹងនិងច្រៀងខារ៉ាអូខេជាមួយបុគ្គលិកស្រ្តីរបស់គាត់ ហើយបន្ទាប់មកក៏បានបង្ខំនារីម្នាក់ក្នុងចំណោមបុគ្គលិកទាំងនោះឱ្យទៅគេងជាមួយលោក ដោយលើកឡើងថា លោកបានចំណាយប្រាក់ជាច្រើនទៅលើរូបនាងនៅក្នុងខារ៉ាអូខេនោះ។
អ្នកស្រី ឡោ សារ៉ុម បញ្ជាក់ថា៖ «នៅពេលដែលនាងបដិសេធហើយ និយាយប្រាប់ថា នាងមិនដែលទៅជាមួយអ្នកណាទេ រូបលោកក៏បានធាក់កៅអី ធាក់តុ និងទូរទឹកកក ហើយនារីទាំងនោះ ក៏ចាប់ផ្តើមយំ។ គាត់បានប្រើអំពើហិង្សាមកលើខ្ញុំ បានវាយខ្ញុំពីក្រោយមួយដៃចំកញ្ចឹងកនិងខ្នងរបស់ខ្ញុំ និងបានធ្វើការវាយទៅសន្តិសុខរបស់ខ្ញុំចំនួន៥ដង»។
អ្នកស្រីបន្ថែមថា បើទោះជាមន្ត្រីនគរបាលរូបនោះបានវាយតប់ទៅលើរូបគាត់និងបុគ្គលិករបស់គាត់ ប៉ុន្តែពួកគាត់ព្យាយាមមិនតបតដើម្បីបញ្ចប់រឿង។
អ្នកស្រីថា៖ «ប៉ុន្តែពេលដែលគាត់ [លោក ហាក់ លី] ចូលទៅឡាន គាត់ក៏ដកកាំភ្លើង រួចបើកកញ្ចក់ឡានចុះ ហើយយកកាំភ្លើងហ្នឹងមកតម្រង់មកខ្ញុំ ហើយនិយាយថា ខ្ញុំមានសិទ្ធិបាញ់អ្នកឯងសម្លាប់ចោល ហើយខ្ញុំនឹងបិទហាងអ្នកឯង ហើយចាប់អ្នកឯងដាក់គុកទៀត»។
អ្នកស្រីបានរៀបរាប់ទាំងទឹកភ្នែកទៀតថា៖ «ហួសចិត្តដែលគាត់ [លោក ហាក់ លី] ប្រើអំពើហិង្សាមកលើខ្ញុំជានារីភេទដែលគ្នាអត់មានតបតជាមួយគាត់ ហើយគាត់នឹងដាក់ពាក្យបណ្តឹង [..] ខ្ញុំមិនដឹងថាពឹងអ្នកណា មានតែច្បាប់ទេដែលអាចជួយរកយុត្តិធម៌ឱ្យខ្ញុំ ខ្ញុំគ្មានខ្នងបង្អែកអីធំទេ។ ខ្ញុំសង្ឃឹមថា អាជ្ញាធរនឹងជួយរកយុត្តិធម៌ដល់ខ្ញុំ ខ្ញុំមានភស្តុតាងគ្រប់គ្រាន់ក្នុងកាមេរ៉ាសុវត្ថិភាព»។
ក្រោយហេតុការណ៍នោះ លោក ហាក់ លី ដែលជាមន្ត្រីនគរបាលប្រឆាំងការជួញដូរមនុស្ស ក៏បានដាក់ពាក្យបណ្តឹងទៅអធិការដ្ឋាននគរបាលស្រុកពារាំង ជុំវិញការចោទប្រកាន់របស់ស្ត្រីម្ចាស់ហាងខារ៉ាអូខេនោះផងដែរ។
ពាក្យបណ្តឹងនោះបានលើកឡើងថា៖ «ខ្ញុំបានឃើញកូនរបស់ម្ចាស់ខារ៉ាអូខេបង្ហោះវីដេអូមួយដែលមានរូបខ្ញុំបាទនៅក្នុងនោះ ដែលធ្វើឱ្យប៉ះពាល់ដល់កិត្តិយសខ្ញុំបាទខ្លាំង។ ដូច្នេះ ខ្ញុំកំពុងដាក់ពាក្យបណ្តឹងពីបទបរិហារកេរ្តិ៍ ធ្វើឱ្យមានការរើសអើង សូមអធិការនគរបាលស្រុក [ពារាំង] ចាត់វិធានការតាមផ្លូវច្បាប់»។
ក្រោយការដាក់ពាក្យបណ្តឹងនេះ កូនប្រុសរបស់ម្ចាស់ហាងខារ៉ាអូខេក៏បានបង្ហោះសារមួយនៅលើបណ្តាញសង្គមហ្វេសប៊ុក ដោយអំពាវនាវដល់នាយករដ្ឋមន្ត្រីជួយអន្តរាគមន៍លើរឿងនេះ។
សាររបស់លោកមានខ្លឹមសារថា៖ «គាត់ [លោក ហាក់ លី] បានវាយម្តាយរបស់ខ្ញុំ ហើយអួតថាខ្លួនជាប៉ូលិសក្រសួងមហាផ្ទៃ ហើយបានបើកទ្វារឡានដកកាំភ្លើងមកគំរាមរកបាញ់ម្តាយរបស់ខ្ញុំ។ មូលហេតុដោយសារខឹងស្រីៗនៅក្នុងហាងមិនព្រមទៅដេកជាមួយ។ សូមគោរពជូនសម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន ដ៏ខ្ពង់ខ្ពស់ ជួយរកយុត្តិធម៌ដល់រូបម្តាយខ្ញុំបាទផង»៕
ប្រែសម្រួលពីអត្ថបទដើមជាភាសាអង់គ្លេសដោយ៖ សំអឿន និស្ស័យបុណ្យ
