ឯកអគ្គរដ្ឋទូតសហរដ្ឋអាមេរិកប្រចាំកម្ពុជាលោក Patrick Murphy បានលើកយកករណីអតីតអ្នកសារព័ត៌មានវិទ្យុអាស៊ីសេរីទៅជជែកជាមួយរដ្ឋមន្ត្រីក្រសួងព័ត៌មាន ដោយថាករណីដំណើរការក្ដីដ៏យូររបស់កម្ពុជានឹងធ្វើឱ្យប៉ះពាល់ដល់ការរស់នៅរបស់អ្នកទាំងពីរ។
ឯកអគ្គរដ្ឋទូតអាមេរិកលោក Patrick Murphy បានសរសេរនៅលើTwitterរបស់លោក កាលពីថ្ងៃទី៩ កុម្ភៈ ឆ្នាំ២០២១ ថា ក្នុងជំនួបមួយនៅក្រសួងព័ត៌មានកាលពីព្រឹកថ្ងៃ៩ កុម្ភៈ លោក បានលើកយកករណីសេរីភាពសារព័ត៌មាន និងសិទ្ធិបញ្ចេញមតិនៅក្នុងសង្គមប្រជាធិបតេយ្យទៅជជែកជាមួយរដ្ឋមន្ត្រីក្រសួងព័ត៌មានលោក ខៀវ កាញារីទ្ធ។
ក្នុងជំនួបនោះលោកក៏បានលើកយកករណីនៃការបើកឡើងវិញវិទ្យុសំឡេងសហរដ្ឋអាមេរិក និងករណីអូសបណ្ដាយសំណុំរឿងអតីតបុគ្គលិកអាស៊ីសេរីគឺលោក អ៊ូន ឈិន និងលោកយាង សុធារិន្ទ ផងដែរ។
លោកបានសរសេរថា៖ « ថ្ងៃនេះ បានជួបជាមួយលោក ខៀវ កញារីទ្ធ រដ្ឋមន្ដ្រីក្រសួងព័ត៌មាន ពិភាក្សាអំពីការវិលត្រឡប់មកវិញរបស់វិទ្យុសំឡេងសហរដ្ឋអាមេរិកដោយជោគជ័យក្នុងប្រទេសកម្ពុជា និងសារៈសំខាន់នៃសេរីភាពសារព័ត៌មាន និងសិទ្ធិបញ្ចេញមតិនៅក្នុងសង្គមប្រជាធិបតេយ្យ ព្រមទាំងការចោទប្រកាន់ពីបទឧក្រិដ្ឋដែលមិនទាន់ដោះស្រាយចំពោះអតីតអ្នកយកព័ត៌មានវិទ្យុអាស៊ីសេរី » ។
អ្នកនាំពាក្យក្រសួងព័ត៌មានលោក មាស សុភណ្ឌ បានឱ្យVOD ដឹងថាក្នុងជំនួបរវាងរដ្ឋមន្ត្រីក្រសួងព័ត៌មាន និងឯកអគ្គរដ្ឋទូតអាមេរិកពិតជាមានការជជែកពីករណីលោក អ៊ួន ឈិន និងលោក យាង សុធារិន្ទ ពិតមែន។
លោកថា៖ « ពាក់ព័ន្ធចំណុចនេះឯកអគ្គរដ្ឋទូតអាមេរិកធ្វើការកត់សម្គាល់ថាវាជាដំណើរការមួយដែលប្រើរយៈពេលមួយដែលវាអាចធ្វើឳ្យប៉ះពាល់ដល់ការរស់នៅរបស់អ្នកទាំងពីរហ្នឹង »។
បើតាមលោក មាស សុភណ្ឌ រដ្ឋមន្ត្រីក្រសួងព័ត៌មានបានឆ្លើយតបចំពោះករណីនេះ គឺស្ថិតក្នុងនីតិវិធីរបស់តុលាការ ហើយមិនអាចជ្រៀតជ្រែកបាននោះទេ។
សំណុំរឿងព្រហ្មទណ្ឌប្រឆាំងនឹងអតីតអ្នករាយការណ៍អាស៊ីសេរី ២រូប គឺលោក អ៊ួន ឈិន និងលោក យាង សុធារិន្ទ បានអូសបន្លាយអស់រយៈពេលជាង៣ឆ្នាំហើយក្រោយពីអ្នកទាំងពីរត្រូវបានអាជ្ញាធរចាប់ខ្លួន កាលពីថ្ងៃទី១៤ វិច្ឆិកា ឆ្នាំ២០១៧ ហើយបានឃុំខ្លួនពួកលោកជាង ៩ខែទើបដោះលែងឲ្យនៅក្រៅឃុំ។ តុលាការបានចោទប្រកាន់អ្នកទាំងពីរ ពីបទលួចផ្ញើព័ត៌មានសម្ងាត់ឲ្យរដ្ឋបរទេស និងបទចោទផលិត និងកាន់កាប់រូបភាពអាសអាភាស។
សំណុំរឿងប្រឆាំងនឹងអ្នកទាំងពីរ ត្រូវបានតុលាការរាជធានីភ្នំពេញបើកការស៊ើបអង្កេតឡើងវិញ ដោយគ្មានកាលកំណត់ បន្ទាប់ពីរកពុំឃើញភស្តុតាងគ្រប់គ្រាន់ ដើម្បីដាក់បន្ទុកលើអ្នកទាំងពីរ។
លោក យាង សុធារិន្ទ មានប្រសាសន៍ប្រាប់VOD ថា ការបើកការស៊ើបអង្កេតឡើងវិញរបស់តុលាការលើសំណុំរឿងគាត់ បានធ្វើឱ្យពួកគាត់ជួបការលំបាកជាច្រើនទាំងការធ្វើដំណើរ ដោយសារលិខិតឆ្លងដែនត្រូវបានអាជ្ញាធរដកទុក ហើយការប្រកបការងារក៏មិនបានពេញលេញដូចមនុស្សធម្មតាផងដែរ។ លោកស្នើដល់តុលាការឱ្យពន្លឿននីតិវិធី ឬទម្លាក់បទចោទលើពួកគាត់ ដោយថាការចំណាយពេលស៊ើបអង្កេតដ៏យូរបែបនេះវាឱ្យលោកមានអារម្មណ៍មិនដាច់ស្រលះ និងពុំអាចធ្វើការបានដូចគេឯងនោះទេ។
អតីតអ្នកសារព័ត៌អាស៊ីសេរីរូបនេះ បានលើកឡើងថា៖ « យើងនៅមានការបារម្ភទាក់ទងនឹងការបញ្ចេញមតិ ការសរសេរអត្ថបទផ្សេងៗ យើងមានការព្រួយបារម្ភខ្លាំងណាស់ មិនដឹងថាតើនៅពេលអត្ថបទយើងសរសេរទៅ មានភាគីណាសប្បាយចិត្តឬមិនសប្បាយចិត្តទេ ព្រោះសំណុំរឿងនៅក្នុងតុលារការស្រាប់។ […] ការស៊ើបអង្កេតជាងបីឆ្នាំ ខ្ញុំជឿជាក់ថាវាគ្រប់គ្រាន់ហើយ បីឆ្នាំជាងនេះ បើសិនស៊ើបអង្កេតយកចិត្តទុកដាក់ ហើយបើគ្មានភស្ដតាងអី សុំទំលាក់ចោលបទចោទមកលើយើងខ្ញុំទាំង ដើម្បីឱ្យមានសេរីភាពដូចគេដូចឯង » ។
អ្នកនាំពាក្យសាលាដំបូងរាជធានីភ្នំពេញលោក អ៊ី រិន ប្រាប់វីអូឌីថាលោកមិនទាន់អាចឆ្លើយបានទេពីករណីស៊ើបអង្កេតលើសំណុំរឿងលោក យាង សុធារិន្ទ និងអ៊ូនឈិន ដោយថាវាស្ថិតក្នុងការស៊ើបអង្កេតរបស់ចៅក្រមនៅឡើយ។
នាយកប្រតិបត្តិសម្ព័ន្ធអ្នកកាសែតកម្ពុជាហៅកាត់ថាខេមបូចា លោក ណុប វី យល់ថា ករណីរបស់លោកយាង សុធារិន្ទ និងលោកអួន ឈិននេះវាបានធ្វើឱ្យប៉ះពាល់ដល់អារម្មណ៍របស់អ្នកសារព័ត៌មានដទៃក្នុងការអនុវត្តន៍ការងាររបស់ខ្លួនផងដែរ។
លោកថា ៖ « យើងទទូចទៅប្រព័ន្ធតុលាការឱ្យពិចារណាក្នុងការទំលាក់ចោលចំពោះករណីអតីតអ្នកសារព័ត៌មានវិទ្យុអាស៊ីសេរី ដោយសារតែយើងយល់ឃើញថា អនុវត្តរបស់គាត់ហ្នឹង ជាផ្នែកមួយនៃការអនុវត្តសេរីភាព ដែលមានចែងក្នុងរដ្ឋធម្មនុញ្ញមាត្រា៤១ និង ច្បាប់អន្ដរជាតិផ្សេងៗទៀត »។
យោងទៅតាមរបាយការណ៍ដែលចេញដោយអង្គការអ្នកសារព័ត៌មានគ្មានព្រំដែនប្រចាំឆ្នាំ២០២០ ប្រទេសកម្ពុជាជាប់ចំណាត់ថ្នាក់លេខ១៤៤ ក្នុងចំណោម១៨៨ប្រទេសនៅលើពិភពលោក ចំពោះលំហសេរីភាពនៃសារព័ត៌មាន ដែលចំណាត់ថ្នាក់នេះបានធ្លាក់ចុះជាបន្តបន្ទាប់តាំងពីឆ្នាំ២០១៨ ដែលជាឆ្នាំនៃការបង្ក្រាបយ៉ាងខ្លាំងមួយពីសំណាក់រដ្ឋាភិបាលកម្ពុជាទៅលើសារព័ត៌មានឯករាជ្យ និងមិនចំណុះខ្លួន៕
ដោយលោកហាន ណូយនិងលោកឌុច ឧត្តម
