ព្រះរាជអាជ្ញាអមសាលាដំបូងខេត្តរតនគិរី បានប្តឹងទាស់នឹងសេចក្តីសម្រេចរបស់ចៅក្រម ដែលបានទម្លាក់បទចោទលើអតីតអ្នកសារព័ត៌មានកាសែតឌឹខេមបូឌាដេលីចំនួន២រូប។
បណ្ដឹង «ញុះញង់» ចោទទៅលើអតីតអ្នកកាសែត ឌឹខេមបូឌា ដេលី លោក អូន ភាព និងលោក Zsombor Peter ត្រូវបានសាលាដំបូងខេត្តរតនគិរី សម្រេចទម្លាក់ចោល កាលពីថ្ងៃទី២៤ ខែវិច្ឆិកា ឆ្នាំ២០២០ ក្រោយពីដើមចោទបានសម្រេចដកពាក្យបណ្ដឹងរបស់ខ្លួនវិញ។
តែយ៉ាងណា អ្នកនាំពាក្យសាលាដំបូងខេត្តមណ្ឌលរតនគិរី លោក កែវ ពិសុទ្ធ ប្រាប់វីអូឌីនៅថ្ងៃសុក្រនេះថា ភ្លាមៗ ក្រោយការប្រកាសសាលក្រមរបស់ចៅក្រម ដែលសម្រេចទម្លាក់ចោលបទចោទនេះ ព្រះរាជអាជ្ញា បានប្តឹងទាស់នឹងសេចក្តីសម្រេចរបស់ចៅក្រម ទៅកាន់សាលាឧទ្ធរណ៍។
លោកបន្តថា ផ្អែកតាមនិតិវិធី តំណាងអយ្យការអមសាលាដំបូងខេត្ត មានសិទ្ធិរយៈពេលមួយខែ ដើម្បីប្តឹងជំទាស់ទៅសាលាឧទ្ធរណ៍ ខណៈដែលអគ្គព្រះរាជអាជ្ញាអមសាលាឧទ្ធរណ៍មានរយៈពេល ២ ខែទៀត ដើម្បីប្តឹងជំទាស់ដែរ។
ទោះយ៉ាងណា លោកថា លោកមិនអាចពន្យល់លម្អិតបន្ថែមពីបញ្ហានេះបានទេ ប៉ុន្តែថា ព្រះរាជអាជ្ញាមានសិទ្ធិប្តឹងឧទ្ធរណ៍ ព្រោះលោកជាម្ចាស់នៃសំណុំរឿងក្តី ក៏ដូចជា អ្នកចោទប្រកាន់អ្នកកាសែតទាំងពីរ។
លោក កែវ ពិសុទ្ធ ថា៖ «គាត់ប្រហែលជាគិតថា ការចោទប្រកាន់របស់គាត់ គឺត្រឹមត្រូវជាងការសម្រេចរបស់លោកចៅក្រមឬយ៉ាងម៉េច។ គាត់មានសិទ្ធិប្តឹងឧទ្ធរណ៍»។
លោក អូន ភាព និង លោក Zsombor Peter ដែលមិនស្ថិតនៅក្នុងប្រទេសកម្ពុជានោះ ត្រូវបានចោទប្រកាន់ពីបទញុះញង់ បន្ទាប់ពីធ្វើដំណើរទៅខេត្តរតនគិរី ដើម្បីធ្វើសេចក្តីរាយការណ៍ អំពីការបោះឆ្នោតឃុំសង្កាត់ឆ្នាំ ២០១៧។
អតីតអ្នកកាសែត ឌឹ ខេមបូឌាដេលី ម្នាក់ លោក Zsombor Peter បានប្រាប់វីអូឌី នៅថ្ងៃសុក្រនេះថា ការសម្រេចរបស់ព្រះរាជអាជ្ញា ក្នុងការប្តឹងឧទ្ធរណ៍ជំទាស់នឹងសេចក្តីសម្រេចរបស់តុលាការ គឺជារឿងនយោបាយសុទ្ធសាធ និងថា ក្នុងអំឡុងពេលសវនាការកាលពីឆ្នាំមុនដើមបណ្តឹង មិនបានព្យាយាមការពារបណ្តឹងរបស់ពួកគេប្រឆាំងនឹងរូបលោក និងលោក អូន ភាព នោះទេ ហើយបានដកពាក្យបណ្តឹង ចំណែកចៅក្រមសម្រេចទម្លាក់ការចោទប្រកាន់នេះ។
លោក ហ្សំប័រ ភីធើ បាននិយាយថា៖ «ព្រះរាជអាជ្ញាកំពុងបន្តរឿងក្តីនេះ ដោយគ្មានភស្តុតាងបន្តិចសោះ ពីព្រោះវាមិនមានភស្តុតាងណាមួយសោះ»។
ព្រះរាជអាជ្ញាខេត្តរតនគិរី លោក ងិន ពេជ សុំមិនធ្វើអត្ថាធិប្បាយដោយឱ្យទៅសួរព្រះរាជអាជ្ញារង លោក រ៉ា បូរ៉ាន់ឌី វិញ។
តែយ៉ាងណា លោក រ៉ា បូរ៉ាន់ឌី ប្រាប់ថា ការប្ដឹងជំទាស់នឹងសេចក្ដីសម្រេច គឺធ្វើតាមព្រះរាជអាជ្ញាខេត្តរតនគិរី លោក ងិន ពេជ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មើលឃើញថា ការប្ដឹងជំទាស់របស់ព្រះរាជអាជ្ញា ជារូបភាពមួយទៀតនៃការគំរាមកំហែងដល់សិទ្ធិសេរីភាពអ្នកសារព័ត៌មាន។
លោកថា៖ «ការធ្វើទុកបុកម្នេញ មិនមែនតែលើជនជាដើមបណ្ដឹងទេ គឺនៅក្នុងផ្លូវច្បាប់ផ្នែកមួយនៃការធ្វើទុកបុកម្នេញទៅលើអ្នកសារព័ត៌មានដែរ។ បញ្ហាទាំងអស់ហ្នឹង គួរតែពិនិត្យមើលឡើងវិញ បើសិនជាស្ថានភាពទាំងអស់ហ្នឹង មិនមានអំពើល្មើសពីច្បាប់ ហើយមានការសម្រេចសេចក្ដីបញ្ចប់ហើយ។ ខ្ញុំគិតថា វាសមល្មមប្ដឹងចូលក្នុងតុលាការហើយ បន្តនីតិវិធីក៏យូរដែលហើយ វាអាចធ្វើប៉ះពាល់ដល់ពេលវេលាក្នុងការអនុវត្តជាបន្តបន្ទាប់ទៀត ហើយវាធ្វើឱ្យអ្នកសារព័ត៌មានពិបាកវិលត្រឡប់មកធ្វើកិច្ចការខ្លួនវិញ»។
កាសែត ឌឹ ខេមបូឌា ដេលី បានបញ្ឈប់ការបោះពុម្ពផ្សាយរបស់ខ្លួន នៅខែកញ្ញា ឆ្នាំ២០១៧ ចំពេលមានសម្ពាធទាក់ទិនប្រាក់ពន្ធ ដែលមានទឹកប្រាក់រាប់លានដុល្លារ៕