ក្រសួងវប្បធម៌ និងវិចិត្រសិល្បៈ អំពាវនាវដល់គ្រប់ភាគីពាក់ព័ន្ធ ចូលរួមផ្សព្វផ្សាយ និងក្រើនរំលឹកដល់យុវជន ឱ្យប្រើប្រាស់ទិវាក្តីស្រឡាញ់ ឱ្យស្របទៅតាមគន្លងប្រពៃណីរបស់ខ្មែរ ដើម្បីរួមចំណែកលើកស្ទួយកិត្យានុភាពសង្គមជាតិ។
ក្នុងសេចក្តីអំពាវនាវរបស់ក្រសួង នៅថ្ងៃទី១១ ខែកុម្ភៈ ឆ្នាំ២០២១ បានលើកឡើងថា បច្ចុប្បន្ន ទិវាក្តីស្រឡាញ់ ថ្ងៃទី១៤កុម្ភៈ បាននិងកំពុងជ្រៀតចូលក្នុងសង្គមជាតិកម្ពុជា ជាពិសេសស្រទាប់យុវជន ដែលបណ្តាលឱ្យមនុស្សមួយចំនួន ប្រើប្រាស់ទិវានេះដោយភាពភ័ន្តច្រឡំ នាំឱ្យប៉ះពាល់ដល់វប្បធម៌ ទំនៀមទំលាប់ និងប្រពៃណីជាតិ។
ករណីនេះ ក្រសួងបានអំពាវនាវដល់មាតាបិតា អាណាព្យាបាល សមត្ថកិច្ចពាក់ព័ន្ធ ជាពិសេសយុវជន ចូលរួមផ្សព្វផ្សាយ អប់រំ និងក្រើនរំលឹកដល់បងប្អូន និងកូនចៅរបស់ខ្លួន ឱ្យប្រើប្រាស់ទិវានេះស្របតាមគន្លងប្រពៃណីជាតិ ដើម្បីកិត្តិយស និងភាពថ្លៃថ្នូររបស់ក្រុមគ្រួសារ ជាពិសេស ដើម្បីរួមចំណែកលើកកម្ពស់កិត្យានុភាពនៃសង្គមជាតិ។
ក្រសួងបានលើកឡើងថា៖ «ប្រជាជន ជាពិសេសយុវជនកម្ពុជា ត្រូវសិក្សាស្វែងយល់ឱ្យបានស៊ីជំម្រៅចំពោះវប្បធម៌ ប្រពៃណី ដែលជាមរតកដ៏ថ្លៃថ្លារបស់ដូនតាយើង ព្រមទាំងត្រូវសិក្សាស្វែងយល់ឱ្យគ្រប់ជ្រុងជ្រោយពីខ្លឹមសារ និងឥទ្ធិពលនៃវប្បធម៌ ទំលៀមទំលាប់ពីខាងក្រៅ ដើម្បីបន្ស៊ីចូលក្នុងឥរិយាបទ និងបរិបទនៃសង្គមរបស់ខ្លួន»។
ក្រសួងវប្បធម៌ បានគូសបញ្ជាក់ថា ទិវានៃក្ដីស្រឡាញ់នៅកម្ពុជា គួរជាឱកាសក្នុងការចែករំលែក នូវក្ដីស្រលាញ់ប្រកបដោយភាពទូលំទូលាយ និងសន្តានចិត្តស្មោះសរ ចំពោះមនុស្សដែលនៅជុំវិញខ្លួន រួមមាន គ្រួសារ ឳពុកម្ដាយ ប្ដីប្រពន្ធ កូនចៅ និងចំពោះអ្នកដែលនៅក្នុងសង្គមជាមួយគ្នា ដូចជា ជនពិការ កុមារកំព្រា និងអ្នកដែលខ្សត់ខ្សោយជាងខ្លួនជាដើម។
កាលពីថ្ងៃទី៨ ខែកុម្ភៈ ក្រសួងអប់រំ ក៏បានណែនាំដល់គ្រឹះស្ថានសិក្សាសាធារណៈនិងឯកជនទាំងអស់ ចូលរួមទប់ស្កាត់រាល់សកម្មភាពមិនប្រក្រតីក្នុងទិវានៃក្តីស្រលាញ់ នៅតាមគ្រឹះស្ថានសិក្សារបស់ខ្លួនផងដែរ។ ក្រសួងបានណែនាំឱ្យធ្វើការផ្សព្វផ្សាយទៅដល់សិស្សានុសិស្សឱ្យបានច្បាស់ និងកុំឱ្យមានការយល់ខុសអំពីអត្ថន័យនៃទិវាសេចក្តីស្រលាញ់នេះ៕
អត្ថបទដោយ សេន តុលា