មន្រ្តីរាជការ និងអ្នកសារព័ត៌មានមួយចំនួនបានបង្ហាញសេចក្តីត្រេកអរនៅពេលដែលពួកគេបានចាក់វ៉ាក់សាំងប្រឆាំងកូវីដ១៩ដែលជារបស់ចិន បើទោះបីជាអង្គការសុខភាពពិភពលោកមិនទាន់ទទួលស្គាល់វ៉ាក់សាំងនេះយ៉ាងណាក្តី។
នៅថ្ងៃទី១០ ខែកុម្ភៈ ឆ្នាំ២០២១ កម្ពុជា បានចាប់ផ្តើមយុទ្ធនាការចាក់វ៉ាក់សាំងលើកដំបូង នៅទីតាំងចំនួន ៥ផ្សេងៗគ្នា រួមមាន មន្ទីរពេទ្យកាល់ម៉ែត្រ មន្ទីរពេទ្យមិត្តភាពខ្មែរ-សូវៀត មន្ទីរពេទ្យអង្គឌួង មន្ទីរពេទ្យកុមារជាតិ និងមន្ទីរពេទ្យព្រះកេតុមាលា។
អគ្គលេខាធិការរងនៃគណៈកម្មាធិការជាតិ ជំរុញចលនាភូមិមួយផលមួយនៃទីស្ដីការគណរដ្ឋមន្រ្តី លោក ហាស វង្សតារា បានលើកឡើងថា បើទោះជាវ៉ាក់សាំងស៊ីណូហ្វាម របស់ចិន នៅមិនទាន់មានការទទួលស្គាល់ជាផ្លូវការ ពីអង្គការសុខភាពពិភពលោក ប៉ុន្តែបណ្តាប្រទេសជាច្រើនលើសកលលោក បានទទួលស្គាល់ និងបានប្រើប្រាស់រួច ទើបលោកមានទំនុកចិត្តក្នុងការចាក់វ៉ាក់សាំងនេះ។
លោកបានប្រាប់អ្នកសារព័ត៌មានវីអូឌីនៅមន្ទីពេទ្យអង្គឌួងថា៖ «យើងទុកចិត្ត គឺទុកចិត្តហើយបានយើងមក ទីមួយ យើងគិតថា មុននឹងទទួលបានវ៉ាក់សាំងនេះ គឺគេប្រយ័ត្នប្រយែងខ្លាំងណាស់ អ៊ីចឹង ខ្ញុំគិតថា ហានិភ័យតិចបំផុត ធម្មតាស្អីក៏វាមិនដែលថាអត់មានហានិភ័យទេ ហើយទាំងគេទាំងយើង នរណាក៏ចាប់អារម្មណ៍ដែរ ដោយសារព្រឹត្តិការណ៍នេះ ជាព្រឹត្តិការណ៍សកល»។
មន្រ្តីមួយរូបទៀតធ្វើការនៅក្រសួងផែនការ លោក ភឿន កុសល បានលើកឡើងថា មុនពេលចាក់វ៉ាក់សាំងនេះ លោកមានការភ័យបារម្ភខ្លះដែរ ប៉ុន្តែក្រោយពីបានចាក់រួចមក គឺសុខភាពរបស់លោកធម្មតា ពុំមានប្រតិកម្មណាមួយទេ។
លោកបានបញ្ជាក់ថា៖ «ក្រោយពេលដែលចាក់ហើយ គឺមានអារម្មណ៍ធម្មតា ហើយមុននឹងចាក់គេវាស់ទៅលើសម្ពាធឈាម និងចង្វាក់បេះដូងរបស់យើង កាលណាសម្ពាធឈាមរបស់យើងលើសពី១៤ ទៅ គឺគេឱ្យយើងអង្គុយមួយសន្ទុះសិន ដើម្បីវាស់ម្ដងទៀត តែបើសម្ពាធឈាមយើងចុះក្រោម១៤ យើងអាចមកធ្វើតេស្តមួយដំណាក់កាលទៀត»។
លោក បឹង កញ្ចនៈ អ្នកសារព័ត៌មានរបស់ស្ថាប័នព័ត៌មានស៊ីស៊ីថាមស៍ បានបង្ហាញក្តីរីករាយក្រោយចាក់វ៉ាក់សាំងប្រឆាំងវីរុសកូវីដ១៩នេះរួច ដោយលោកថា វ៉ាក់សាំងនេះ ប្រៀបដូចជាអាវក្រោះមួយ សម្រាប់ការពារ ខណៈពេលខ្លះលោកមានភាពភ្លេចភ្លាំងក្នុងការការពារ ដូចជា ការលាងដៃ ជាដើម។
លោកបានថ្លែងថា៖ «យើងអត់ទាន់បានឆ្លងកាត់ ប៉ុន្តែយើងបានឆ្លងការចាក់ទៅការបុគ្គលជាច្រើនហើយ ហើយគាត់ក៏បាន លក្ខណៈថា មើលទៅវាអត់មានបញ្ហាអីទេ អ៊ីចឹងវាមានគុណសម្បត្តិច្រើនជាងគុណវិបត្តិ ទោះបីពេលដែលចាក់ទៅវាមានផលប៉ះពាល់ខ្លះ ប៉ុន្តែវាមានអត្ថប្រយោជន៍ច្រើនជាង សម្រាប់ខ្ញុំអត់ជាបញ្ហាទេ មានទំនុកចិត្ត»។
អ្នកសារព័ត៌មានស៊ីស៊ីថាមន៍ មួយរូបទៀត លោក គួន សម្បូរ បាននិយាយថា លោកមានភាពកក់ក្ដៅក្នុងចិត្ត ក្រោយចាក់វ៉ាក់សាំងនេះរួច បើទោះជាវាមិនអាចការពារបានមួយរយភាគរយក៏ដោយ។
លោកថា៖ «បើទោះបីថាវាមិនអាចការពារបាន ១០០ភាគរយ ប៉ុន្តែវាជាសញ្ញាមួយថា យើងទប់ស្កាត់បាន ៨០ទៅ៩០ភាគរយសម្រាប់កូវីដ១៩ គួបផ្សំនឹងការការពាររបស់យើងថែមទៀត»។
លោក ជា ធីរិទ្ធិ ជាការីនិពន្ធនៅទូរទស្សន៍ BTV ដែលជាអ្នកទី១ក្នុងចំណោមអ្នកសារព័ត៌មានដែលបានចាក់វ៉ាក់សាំងប្រឆាំងកូវីដ១៩ មុនគេ បានឱ្យដឹងថា នៅពេលចាក់វ៉ាក់សាំងរួច ក្រុមគ្រូពេទ្យបានតម្រូវឱ្យលោក រងចាំរយៈពេល ៣០នាទី ដើម្បីតាមដានសុខភាព។ លោកបន្តថា ក្រោយរយៈពេល ៣០នាទី លោកពុំមានអការៈអ្វីប្រែប្រួលនោះទេ ដែលមានន័យថា សុខភាពរបស់លោកនៅល្អធម្មតា។
បើទោះជាវ៉ាក់សាំងនេះមិនទាន់បានទទួលស្គាល់ដោយអង្គការសុខភាពពិភពលោក យ៉ាងណាក៏ដោយចុះ ប៉ុន្តែ អ្នកសារព័ត៌មានរូបនេះ និយាយថា លោកនៅតែមានទំនុកចិត្តលើវ៉ាក់សាំងនេះ។
លោកថា៖ «ខ្ញុំអាចនិយាយបានថា អ្វីដែលខ្ញុំបានអាន គឺមិនទាន់មានវ៉ាក់សាំងណាមួយដែលទទួលស្គាល់ជាផ្លូវការនោះទេ ដូច្នេះ វ៉ាក់សាំងស៊ីណូហ្វាម ក៏ដូចគ្នាដែរ ប៉ុន្តែខ្ញុំបានមើលអំពីកម្រិតនៃប្រសិទ្ធិភាពរបស់វាគឺចន្លោះក្នុង៧០ភាគរយជាង ព្រោះវ៉ាក់សាំងទាំងអស់មិនអាច ១០០ភាគរយ បានទេ អ្នកជំនាញក៏បានលើកឡើងដែរ»។
លោក មឿន ចន អាយុ ៤០ឆ្នាំ ប្រកបមុខរបរជាអ្នកស្រែចម្ការ បានបង្ហាញការសាទរខណៈដែលកម្ពុជា បានទទួលវ៉ាក់សាំងប្រឆាំងវីរុសកូវីដ១៩ និងចាប់ផ្តើមយុទ្ធនាការចាក់ជូនមន្ត្រី និងអ្នកដែលមានអាទិភាព។ លោករំពឹងដែរថា កម្ពុជា នឹងមានវ៉ាក់សាំងនេះគ្រប់គ្រាន់ សម្រាប់ចាក់ជូនប្រជាពលរដ្ឋទូទៅក្នុងពេលឆាប់ៗនេះ។
លោកថា៖ «តាមគំនិតរបស់ខ្ញុំទេណា ថ្នាំចាក់វ៉ាក់សាំងការពារជំងឺហ្នឹង ប្រហែលជាប្រជាពលរដ្ឋគាត់គាំទ្រជាង៩០% សូម្បីខ្ញុំបាទជាអ្នកជនបទសុទ្ធសាធ ជាកសិករក៏គាំទ្រដែរ ព្រោះថាជំងឺនេះ វាមិនមែនកើតបុគ្គលតែម្នាក់ពីរនាក់ទេ គឺវាអាចឆ្លងដល់មនុស្សទាំងអស់គ្នានៅគ្រប់តំបន់»។
គួរបញ្ជាក់ថា វ៉ាក់សាំង SARS-CoV-2 (Sinopharm) ដែលជាជំនួយរបស់ចិនចំនួន ៦០ម៉ឺនដូស ក្នុងចំណោម១លានដូស ត្រូវបានបញ្ជូនមកដល់កម្ពុជា កាលពីថ្ងៃទី០៧ ខែកុម្ភ: ឆ្នាំ២០២១។
រដ្ឋាភិបាលបានប្រកាសថា វ៉ាក់សាំងទាំង៦០ម៉ឺនដូសនេះ មានជម្រើសអាទិភាពចាក់ទៅលើមន្ត្រីរាជការ កងកម្លាំងប្រដាប់អាវុធ គ្រូពេទ្យ និងអ្នកសារព័ត៌មាន ជាដើម ដែលយុទ្ធនាការចាប់ពីថ្ងៃទី១០ ខែកុម្ភៈនេះទៅ សម្រាប់តែមនុស្សដែលមានអាយុចាប់ពី ១៨ឆ្នាំ ដល់ ៥៩ឆ្នាំប៉ុណ្ណោះ។
កម្ពុជាបានរកឃើញដំបូងគេនៃការឆ្លងជំងឺកូវីដ១៩នេះមុនគេពីជនជាតិចិន អំឡុងដើមឆ្នាំ២០២០ ហើយគិតមកដល់ព្រឹកថ្ងៃទី១១ ខែកុម្ភៈ ឆ្នាំ២០២១នេះ មានអ្នកឆ្លងសរុប៤៧៨នាក់ ក្នុងនោះព្យាបាលជាសះស្បើយ ៤៥៩នាក់ កំពុងបន្តស្ថិតក្រោមការព្យាបាល ១៩នាក់ និងគ្មានអ្នកស្លាប់ឡើយ៕
អត្ថបទដោយ៖ កញ្ញា អី យាន លោក សេន តុលា កញ្ញា សំអឿន និស្ស័យបុណ្យ និងលោក ពក ខឺយ