រដ្ឋមន្ត្រីក្រសួងការពារជាតិ បញ្ជាក់ថា លោកពិតជាបានចាក់វ៉ាក់សាំងប្រឆាំងវីរុសកូវីដ១៩ ឈ្មោះ«ស៊ីណូហ្វាម»របស់ចិនរួចមែន ទោះបីលក្ខខណ្ឌអាយុរបស់លោកលើសក៏ដោយ។
ការបញ្ជាក់នេះ ត្រូវបានធ្វើឡើងនៅក្នុងសន្និសីទសារព័ត៌មាននៅរសៀលថ្ងៃពុធនេះ ក្នុងយុទ្ធនាការចាក់វ៉ាក់សាំងប្រឆាំងវីរុសកូវីដ១៩ ដល់មន្ត្រីជាន់ខ្ពស់ក្រសួងការពារជាតិ នៅមន្ទីរពេទ្យព្រះកេតុមាលា រាជធានីភ្នំពេញ។
រដ្ឋមន្ត្រីក្រសួងការពារជាតិ លោក ទៀ បាញ់ មានប្រសាសន៍ថា រូបលោកផ្ទាល់បានចាក់វ៉ាក់សាំងនេះបានប្រមាណ២០ថ្ងៃមកហើយ នៅសល់តែ១០ថ្ងៃទៀតប៉ុណ្ណោះ លោកនឹងត្រូវទទួលចាក់វ៉ាក់សាំងដូសទី២។
លោកបន្តថា កូនរបស់លោកនិងមនុស្សនៅជុំវិញខ្លួនលោកមួយចំនួនបានចាក់វ៉ាក់សាំងនេះមុនរូបលោកទៅទៀត ហើយពួកគេមិនមានបញ្ហាសុខភាពអ្វីទេក្រោយការចាក់វ៉ាក់សាំងនេះរួច។
លោកបន្តថា៖ «កូនខ្ញុំគាត់ចាក់មុនសិន បានឃើញថា អត់មានអី! បានសម្តេច [ហ៊ុន សែន] ឱ្យខ្ញុំចាក់ ចាក់ហើយអត់មានអីទ គឺសុខភាពធម្មតា»។
រដ្ឋមន្ត្រីរូបនេះបន្តថា តាមការសិក្សាពីប្រភពនានា រួមនឹងក្រុមគ្រូពេទ្យជំនាញរបស់ចិន ឃើញថា វ៉ាក់សាំងនេះអាចចាក់បានទៅលើមនុស្សដែលមានវ័យចាប់ពី១៨ឆ្នាំឡើងទៅ លើកលែងតែអ្នកដែលមានបញ្ហាសុខភាពមួយចំនួនដូចជា បញ្ហាអាឡាក់ស៊ី ឬជំងឺប្រចាំកាយមួយចំនួនជាដើម ដែលមិនអាចចាក់បាន។
លោកបានគូសបញ្ជាក់ថា៖ «អាយុ១៨ឆ្នាំរហូតដល់អាយុលើសពី៥៩ឆ្នាំឡើងទៅ ចាក់បានទាំងអស់ រហូតដល់អាយុ១២០ឆ្នាំក៏ចាក់ដែរ»។
លោក ទៀ បាញ់ បានបញ្ជាក់បន្ថែមថា រូបលោកផ្ទាល់មានអាយុលើសពី៦០ឆ្នាំ ខណៈមន្ត្រីជាន់ខ្ពស់ក្រសួងការពារជាតិមួយចំនួនដែលចាក់វ៉ាក់សាំងនៅថ្ងៃនេះ ក៏មានវ័យលើសពី៦០ឆ្នាំដែរ ប៉ុន្តែនៅតែអាចចាក់វ៉ាក់សាំងបាន ប្រសិនបើពួកគាត់មិនមានបញ្ហាសុខភាពណាមួយនោះ។
ជាបទពិសោធន៍ដែលបានចាក់វ៉ាក់សាំងរួច លោក ទៀ បាញ់ ឱ្យដឹងថា ពេលចាក់វ៉ាក់សាំងរួច ក្រុមគ្រូពេទ្យនឹងតាមដានសុខភាពអ្នកចាក់រយៈពេល៣០នាទី ប្រសិនបើមិនមានប្រតិកម្មណាមួយនោះទេ ក្រុមគ្រូពេទ្យនឹងអនុញ្ញាតឱ្យអ្នកចាក់រួចអាចត្រឡប់ទៅផ្ទះបាន។
លោកបានបន្ថែមថា ក្រោយពេលចាក់វ៉ាក់សាំងនេះរួច ក្រុមគ្រូពេទ្យក៏បានណែនាំឱ្យអ្នកដែលបានចាក់ ត្រូវតមធ្វើការងារធ្ងន់ តមគ្រឿងសមុទ្រ និងគ្រឿងស្រវឹង រយៈពេល៤ថ្ងៃ។
លោកនាយករដ្ឋមន្ត្រី ហ៊ុន សែន កាលពីថ្ងៃទី៥ ខែកុម្ភៈ បានប្រកាសលុបចោលគម្រោងចាក់វ៉ាក់សាំងស៊ីណូហ្វាមរបស់ចិន ដោយលើកហេតុផលថា អាយុរបស់លោកលើសពី៥៩ឆ្នាំដែលលើសពីលក្ខខណ្ឌដែលអាចចាក់បាន។
គួរបញ្ជាក់ថា នៅថ្ងៃទី១០ ខែកុម្ភៈ ឆ្នាំ២០២១នេះ កម្ពុជាបានចាប់ផ្តើមយុទ្ធនាការចាក់វ៉ាក់សាំងប្រឆាំងកូវីដ១៩ ទៅលើមន្ត្រីជាន់ខ្ពស់រដ្ឋាភិបាលនិងអ្នកសារព័ត៌មានមួយចំនួន ក្នុងនោះក្រសួងសុខាភិបាលបានរៀបចំមន្ទីរពេទ្យចំនួន៤កន្លែង រួមមាន មន្ទីរពេទ្យកាល់ម៉ែត្រ មន្ទីរពេទ្យព្រះអង្គឌួង មន្ទីរពេទ្យមិត្តភាពខ្មែរ-សូវៀត និងមន្ទីរពេទ្យកុមារជាតិ ខណៈក្រសួងការពារជាតិរៀបចំចាក់ឱ្យមន្ត្រីខ្លួននៅមន្ទីរពេទ្យព្រះកេតុមាលា៕
