ប្រមុខរដ្ឋាភិបាលផ្តាំទៅប្រជាពលរដ្ឋទាំងអស់កុំបារម្ភរឿងវ៉ាក់សាំងប្រឆាំងកូវីដ១៩ ថាផលិតនៅប្រទេសណាឬម៉ាកអ្វី ដោយលោកថា អ្វីដែលគួរគប្បីបារម្ភគឺការអត់វ៉ាក់សាំងចាក់ទៅវិញទេ។
លោកនាយករដ្ឋមន្ត្រី ហ៊ុន សែន បានសរសេរនៅលើទំព័រហ្វេសប៊ុកផ្លូវការរបស់លោកថា កម្ពុជា បានចាប់ផ្តើមដំណើរការជាផ្លូវការនូវការចាក់វ៉ាក់សាំងជូនប្រជាជនរបស់ខ្លួនហើយនៅពុធនេះ ដែលនេះជាផ្លែផ្កានៃកិច្ចសហប្រតិបត្តិការរវាងកម្ពុជានិងចិន។
លោកបានថ្លែងអំណរគុណដល់រដ្ឋាភិបាលនិងប្រជាជនចិនដែលបានផ្តល់នូវជំនួយវ៉ាក់សាំងប្រឆាំងកូវីដ១៩ដល់កម្ពុជា។
លោកនាយករដ្ឋមន្ត្រី ហ៊ុន សែន បន្តថា មុនពេលចាក់វ៉ាក់សាំង មានការលើកឡើងនូវមតិនិងការរិះគន់មួយចំនួនជុំវិញអវត្តមានរបស់លោកលើការចាក់វ៉ាក់សាំងនៅថ្ងៃនេះ ដែលបណ្តាលមកពីកត្តាអាយុរបស់លោក។
លោកបានគូសបញ្ជាក់ទៀតថា៖ «ខ្ញុំសូមផ្តាំផ្ញើចំពោះបងប្អូនជនរួមជាតិយើង ទាំងក្នុងនិងនៅក្រៅប្រទេសឱ្យបានច្បាស់ថា សូមបងប្អូនកុំបារម្ភលើវ៉ាក់សាំងមកពីប្រទេសណា? ម៉ាកអ្វី? តែគប្បីបារម្ភពីការអត់វ៉ាក់សាំងចាក់ ព្រោះគ្មានវ៉ាក់សាំងលក់តាមផ្សារដូចលក់ត្រី លក់ត្រកួននោះទេ»។
បើតាមលោកនាយករដ្ឋមន្ត្រី ប្រជាពលរដ្ឋខ្មែរប្រមាណ៩៨ភាគរយដែលរស់នៅប្រទេសជឿនលឿន ក៏នៅមិនទាន់បានទទួលវ៉ាក់សាំងប្រឆាំងវីរុសកូវីដ១៩នេះនៅឡើយ ដោយសារតែការផលិតមិនទាន់។
ពាក់ព័ន្ធនឹងការចាប់ផ្តើមយុទ្ធនាការដំបូងនៃការចាក់វ៉ាក់សាំងប្រឆាំងវីរុសកូវីដ១៩នៅថ្ងៃនេះ ក្រសួងសុខាភិបាលរៀបចំទីតាំងមន្ទីរពេទ្យចំនួន៤កន្លែង សម្រាប់ចាក់វ៉ាក់សាំងដល់មន្ត្រីជាន់ខ្ពស់ក្នុងជួររដ្ឋាភិបាល និងអ្នកដែលមានអាទិភាពក្នុងការចាក់។
ក្រសួងបញ្ជាក់ថា ទីតាំងមន្ទីរពេទ្យទាំង៤កន្លែងនោះ រួមមាន មន្ទីរពេទ្យកាល់ម៉ែត្រ សម្រាប់មន្ត្រីជាន់ខ្ពស់រដ្ឋាភិបាល ដូចជា ទេសរដ្ឋមន្ត្រី រដ្ឋមន្ត្រី និងរដ្ឋលេខាធិការឬមានឋានៈស្មើ, មន្ទីរពេទ្យព្រះអង្គឌួង សម្រាប់មន្ត្រីជាអនុរដ្ឋលេខាធិការឬមានឋានៈស្មើ, មន្ទីរពេទ្យមិត្តភាពខ្មែរ-សូវៀត សម្រាប់មន្ត្រីអភិបាលខេត្តរាជធានី និងមន្ទីរពេទ្យកុមារជាតិ សម្រាប់អ្នកសារព័ត៌មាន។
កាលពីថ្ងៃទី០៧ ខែកុម្ភៈ ឆ្នាំ២០២១ កម្ពុជាបានទទួលជំនួយវ៉ាក់សាំងប្រឆាំងជំងឺកូវីដ១៩ពីចិន ចំនួន៦០ម៉ឺនដូស ក្នុងចំណោម១លានដូស ក្នុងនោះ ៣០ម៉ឺនដូស សម្រាប់ក្រសួងសុខាភិបាល និង៣០ម៉ឺនដូសទៀត សម្រាប់ក្រសួងការពារជាតិ។
បើតាមសេចក្តីជូនព័ត៌មានរបស់ក្រសួងសុខាភិបាលនៅថ្ងៃនេះ កម្ពុជាបានរកឃើញករណីវិជ្ជមានវីរុសកូវី១៩ ទៅលើស្ត្រីខ្មែរដែលទើបមកពីប្រទេសថៃ និងបុរសជនជាតិនីហ្សេរីយ៉ា មកពីប្រទេសនីហ្សេរីយ៉ា។
ក្រសួងបន្តថា គិតមកដល់ព្រឹកថ្ងៃទី១០ ខែកុម្ភៈ ឆ្នាំ២០២១នេះ កម្ពុជាបានរកឃើញអ្នកឆ្លងជំងឺកូវីដ១៩ សរុបចំនួន៤៧៨នាក់ ក្នុងនោះបានព្យាបាលជាសះស្បើយចំនួន៤៥៧នាក់ និងកំពុងសម្រាកព្យាបាលនៅមន្ទីរពេទ្យចំនួន២១នាក់៕