ជនជាតិដើមភាគតិចគួយមកពីខេត្តកំពង់ធំ ស្នើឱ្យក្រសួងពាក់ព័ន្ធចំនួន២ ជួយរកដំណោះស្រាយរឿងដីធ្លីរបស់ពួកគាត់ ដោយពួកគាត់អះអាងថាដីនោះ បានរងនូវការទន្ទ្រានយកពីសំណាក់ក្រុមឈ្មួញ និងអ្នកមានអំណាចជាបន្តបន្ទាប់។
ការស្នើនេះ បានធ្វើឡើងខណៈដែលពលរដ្ឋជនជាតិដើមភាគតិចគួយប្រមាណ១០នាក់ តំណាងឱ្យជាង ៦០០គ្រួសារ មកពីសហគមន៍ព្រៃឈើសាលាឆ្ដោ និងសហគមជាំម្រេច បានឡើងមកដាក់ញត្តិនៅក្រសួងកសិកម្ម និងក្រសួងបរិស្ថាន នៅថ្ងៃទី០៩ ខែកុម្ភៈនេះ។
ជនជាតិដើមភាគតិចគួយ មកពីសហគមន៍ព្រៃឈើសាលាឆ្តោ ឃុំសាលាវិស័យ ស្រុកប្រាសាទបាល្ល័ង អ្នកស្រី លួន នួន លើកឡើងក្នុងសន្និសីទសារព័ត៌មាន មុនពេលទៅដាក់ញត្តិនៅក្រសួងទាំងពីរនេះថា ផ្ទៃដីទំហំ ១ ០០៦ ហិកតា មានទាំងព្រៃផង ត្រូវបានក្រុមឈ្មួញកាប់ទន្ទ្រាន ឈូសឆាយអស់ជិត ៧០០ហិកតា ខណៈផ្ទៃដីនិងព្រៃឈើចំនួន ៣៦១ហិកតាទៀត កំពុងប្រឈមនឹងការទន្រ្ទាននិងឈូសឆាយ។
អ្នកស្រី ស្នើទៅរដ្ឋាភិបាល និងក្រសួងពាក់ព័ន្ធ ឱ្យជួយរកដំណោះស្រាយរឿងដីធ្លីនេះជាបន្ទាន់ បើពុំដូច្នេះទេ ពួកគាត់ទាំង ២០១គ្រួសារ នឹងមិនមានដីធ្លីសម្រាប់ធ្វើស្រែចម្ការទៀតទេ ខណៈអាជ្ញាធរមូលដ្ឋាន ពុំបានអើពើដោះស្រាយឱ្យពួកគាត់ឡើយ។
អ្នកស្រីថា៖ «ខ្ញុំទទូចឱ្យរកដំណោះស្រាយឱ្យខ្ញុំ ព្រោះអីជនជាតិខ្ញុំរស់នៅត្រូវតែមានធម្មជាតិ បើអត់មាន រស់នៅអត់កើតទេ ព្រោះរាល់ថ្ងៃនេះ ខ្ញុំបានស្រូវតិចតួច ខ្ញុំហូបអត់កើតទេ។ ខ្ញុំនឹកឃើញប្រជាជនខ្ញុំដែលអត់ឃ្លាន កូនចៅរៀនបានតិច ដើរស៊ីឈ្នួលគេ ធ្វើបានកន្លះខែរត់មកផ្ទះវិញ។ ចំណែកចាស់ដូចពួកខ្ញុំអត់ចេះដើរស៊ីឈ្នួលគេទេ។ អ៊ីចឹងខ្ញុំទាមទារឱ្យសម្ដេចជួយពួកខ្ញុំផង ព្រោះពួកខ្ញុំបានតែធ្វើចម្ការវិលជុំទេ»។
ជនជាតិដើមភាគតិចម្នាក់ទៀតនៅសហគមជាំម្រេច អ្នកស្រី ងួន ហៀន និយាយថាចាប់តាំងពីឆ្នាំ២០១៥មក ដីព្រៃទំហំ ៣ ៧១៦ ហិកតា ត្រូវបានក្រុមឈ្មួញចូលទៅកាប់ឈើខុសច្បាប់ និងទន្ទ្រានយក ដែលបច្ចុប្បន្ននេះ ដីព្រៃសហគមន៍នៅសល់តែជាង ៣០០ហិកតាប៉ុណ្ណោះ។
ក្រៅពីដីព្រៃសហគម ជនជាតិដើមភាគតិចទាំងនោះ អ្នកស្រីក៏បានបង្ហាញក្ដីបារម្ភខ្លាចបាត់បង់ដីស្រែចម្ការវិលជុំប្រហែល ២ ០០០ ហិកតា របស់ពួកគាត់ ដែលមានចំនួន ៣៥១គ្រួសារផងដែរ។ ជនជាតិដើមភាគតិចទាំងនោះ បន្តថា បច្ចុប្បន្ន ដីទំហំ ១០០ហិកតាក្នុងសហគមន៍ ត្រូវបានក្រុមហ៊ុនរបស់ឧកញ៉ា សាន ឈូសឆាយ និងទន្ទ្រានយក ខណៈដីពលរដ្ឋ ៥៣គ្រួសារទៀត ក៏កំពុងប្រឈមនឹងការបាត់បង់ដីបន្ថែមទៀត។
អ្នកស្រីងួន ហៀន បន្តថា ពួកគាត់បារម្ភគ្មានដីអាស្រ័យផល និងបាត់ដីវប្បធម៌ជនជាតិដើមភាគតិច និងដីផ្នូរដូនតា ខណៈក្រុមហ៊ុនឧកញ៉ា សាន និងអ្នកមានអំណាចមួយចំនួនទៀត បានឃុបឃិតគ្នាឈូសឆាយដីនៅទីនោះ ដោយសំអាងថា ពួកគេមានប្លង់កម្មសិទ្ធិ។
អ្នកស្រីថា៖ «ដីនេះ ដីខ្ញុំពីជីដូន ពីជីតាមក ម៉េចក៏ខ្ញុំមិនមានសិទ្ធិឃ្វៀល[គោក្របី] គេថាដោយសារដីជាដីក្រុមហ៊ុនទាំងអស់។ សំណូមពរឱ្យរដ្ឋាភិបាលជួយជនជាតិដើមភាគតិចខ្ញុំ ហើយសំណូមពរឱ្យរដ្ឋាភិបាល ចុះបញ្ជីដីជាសមូសហភាព ជារបៀបជនជាតិដើមភាគតិចខ្ញុំផង កុំឱ្យពួកខ្ញុំភ័យព្រួយបារម្ភបាត់បង់ដីធ្លី ដោយសារអ្នកណាមួយទៅយកដីពួកខ្ញុំ»។
មេឃុំសាលាវិស័យ លោក ជិន ហ៊ិន សុំមិនធ្វើអត្ថាធិប្បាយចំពោះរឿងនេះ និងបង្វែរឱ្យសួរទៅខាងមន្ត្រីរដ្ឋបាលព្រៃឈើវិញ ខណៈនាយផ្នែករដ្ឋបាលព្រៃឈើសាលាវិស័យ ស្រុកបា្រសាទបាល្ល័ង លោក ភោគ ចន្ត្រា បដិសេធឆ្លើយតប ដោយប្រាប់ថាជាប់រវល់។
អភិបាលស្រុកប្រាសាទបាល្ល័ងលោក វណ្ណៈ សោភានិត មានប្រសាសន៍ថា អាជ្ញាធរស្រុកនឹងចុះទៅពិនិត្យករណីនេះ បន្ទាប់ពីទទួលបានព័ត៌មាន។
លោកថា៖«ករណីហ្នឹង បើសិនជាមានសំណូមពរពីសហគមន៍ ឬមានបណ្ដឹងណាមកស្រុកនឹងចាត់ការអត់ទុកទេ។ ខ្ញុំទៅពិនិត្យមើលករណីហ្នឹង ពិតមែនអត់តើនៅកន្លែងណាចំណុចណាអ៊ីចឹង »។
ចំណែក អ្នកនាំពាក្យក្រសួងបរិស្ថាន លោក នេត្រ ភក្រ្តា សុំមិនអត្ថាធិប្បាយទេ ដោយលោកឱ្យសួរទៅខាងក្រសួងកសិកម្មវិញ។
វីអូឌី មិនអាចសុំការអត្ថាធិប្បាយពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានទេ នៅថ្ងៃនេះ។
ក្រៅពីសហគមជាំម្រេច និងសហគមឆ្តោរមកពីខេត្តកំពង់ធំ ថ្ងៃនេះក៏មានជនជាតិដើមភាគតិចពូនងចំនួន ៨ គ្រួសារ មកពីសហគមចឹងនៅឃុំឃ្សឹម ស្រុកស្នួល ខេត្តក្រចេះ នាំគ្នាមកដាក់ញត្តិស្វែងរកកិច្ចអន្តរាគមន៍ពីក្រសួងរៀបចំដែនដី នគរូបនីយកម្ម និងសំណង់ ដើម្បីសុំឱ្យស្ថាប័ននេះ ជួយរកដំណោះស្រាយបញ្ហាដីធី្លផងដែរ៕