អាជ្ញាធរក្នុងខណ្ឌចំការមនអះអាងថាការបន្តផ្សព្វផ្យាយឱ្យប្រជាពលរដ្ឋចេះទុកដាក់សំរាមឱ្យបានត្រឹមត្រូវគឺជាវិធានការបន្តដែលត្រូវធ្វើដើម្បីដោះស្រាយបញ្ហាសំរាមកកស្ទះក្នុងប្រឡាយបឹងត្របែក។
អភិបាលខណ្ឌចំការមន លោក ថេង សុថុលបានឱ្យដឹងថា កិច្ចការអប់រំពីការចេះបែងចែកទុកដាក់សំរាមជាវិធានការដែលរដ្ឋបាលខណ្ខនឹងធ្វើ បន្ទាប់ពីមានសំរាមកកស្ទះក្នុងប្រឡាយដឹងត្របែកកើតមានជាថ្មី ហើយថាអាជ្ញាធរនឹងសហការណ៍ជាមួយមន្ត្រីជំនាញដើម្បីយកគ្រឿងចក្រកាយសំរាមទាំងនោះចេញ។
លោក ថេង សុថុល៖«អ្វីដែលរដ្ឋបាលខណ្ឌបន្តធ្វើគឺខិតខំធ្វើការផ្សព្វផ្សាយអប់រំពីការវេចខ្ចប់ទុកដាក់សំរាមអោយបានត្រឹមត្រូវ ធ្វើយ៉ាងណាអោយប្រជាពលរដ្ឋចូលរួមទាំងអស់គ្នា។ ទន្ទឹមជាមួយគ្នានេះផងដែរសហការជាមួយមន្ទីរសាធារណការរាជធានីដើម្បីយកគ្រឿងចក្រចូកប្រមូលដឹកជញ្ជូនចេញមិនអាចយកដៃទៅកើបបានទេម្យ៉ាងទៀតមន្ទីរសាធារណការជាអ្នកថែទាំ។សូមបញ្ជាក់ថាប្រឡាយនេះមានការពាក់ព័ន្ធ៤ខណ្ឌចំណែកខណ្ឌចំការមនជាអ្នកទទួលសំរាមទាំងអស់។»
អភិបាលខណ្ឌចំការមនរូបនេះបានបញ្ជាក់ថា លោកបានទំនាក់ទំនងទៅមន្ទីសាធារណៈការរួចហើយដើម្បីប្រមូលសំរាមនេះ។
ប្រធានមន្ទីរសាធារណៈការ និងដឹងជញ្ជូនរាជធានីភ្នំពេញលោក សាំ ពិសិដ្ឋបាន ចុចបិទទូរស័ព្ទ និងជំរុញឱ្យអ្នកសារពត៏មានបន្តសាកសួរទៅកាន់សាលារាជធានីភ្នំពេញវិញ។
អ្នកនាំពាក្យសាលារាជធានីភ្នំពេញមិនអាចសុំការអត្ថាធិប្បាយពីបញ្ហាសំរាមដែលកកស្ទះនេះបានទេ ដោយសារទូរសព្ទចូលមិនមានអ្នកទទួល។
អ្នកស្រី ហួត សាវ័នពលរដ្ឋរស់នៅភូមិ ៥ ក្នុងសង្កាត់ផ្សារដើមថ្កូវ បានរៀបរាប់ថាអ្នកស្រីតែងឃើញសំរាមទាំងនោះ អណ្តែតាមផ្ទៃទឹកដោយហូរពីខាងលើមកនាំឱ្យមកកកស្ទះហើយមិនទាន់មានការប្រមូលពីអាជ្ញាធរនោះទេ។
អ្នកស្រីហួត សាវ័ន«អារឿងសំរាមនៅក្រោមហ្នឹងបើមានគេកាយចេញវាអស់ហើយ វានៅអណ្តែតមើលទៅឃើញឡើងសរអើតពីលើទៅ វាច្រើនតែមកពីលើ ប្រអប់បាយអីហ្នឹង មកពីលើមក កាលណាទឹកវាចាល់គេអត់បូមអីទៅថង់វាអណ្តែតមក បើនៅទីនេះអណ្តែមកចឹងប្រជាពលរដ្ឋរុញ។»
ពលរដ្ឋរូបនេះបានស្នើទៅកាន់អាជ្ញាធរដើម្បីដោះស្រាយបញ្ហាសំរាមនេះ ដោយបារម្ភពីបញ្ហាសុខភាពព្រោះតែក្លិនសំរាម។
អ្នកស្រីហួត សាវ័ន៖«ចង់ណាស់ហើយ តែមិនដឹងយើងទៅខាងណាវិញ អាជ្ញាធរអត់សូវរវីរវល់ដែរ បើទឹករីងខ្លាំងអាហ្នឹងវាក្លិនឆួល ឆួលដូចអាស៊ីតចឹង។»
ស្រដៀងគ្នានេះដែរពលរដ្ឋម្នាក់ទៀតគឺអ្នកស្រី ចែ យូបានជំរុញឱ្យអាជ្ញាធរពន្លឿនការសំអាតកាកសំណល់ដែលមាននៅក្នុងប្រឡាយបឹងត្របែក។
អ្នកស្រី ចែ យូ៖«មួយរយៈនេះអត់សូវឃើញគេមកកាយ បើគេមកកាយទៅអត់សូវមានសត្វល្អិតដែរ។ មូសអីហ្នឹងពេលគេកាយចិងទៅវាហើរទៅបាត់អស់ដែរ បើអត់កាយចឹងមូសវានៅសំងំហ្នឹង។ចេះតែចង់ឱ្យគែអភិវឌ្ឍន៍នៅហ្នឹង។លឺតែថាគេអភិវឌ្ឍន៍ៗតែអត់ទាន់ឃើញ ចង់ឱ្យគេអភិវឌ្ឍន៍ឱ្យលឿនៗដែរ[…]ចង់បានអន្លែងស្អាតទឺកស្អាត តែគេអភិវឌ្ឍន៍ទៅវាស្អាតហើយ។»
កាលពីថ្ងៃទី២៦ ខែមករា ឆ្នាំ២០២១រដ្ឋាភិបាលបានបន្ថែម កិច្ចការថែរក្សាបរិស្ថានក្នុងគោលនយោបាយ«ភូមិ– ឃុំ –សង្កាត់ មានសុវត្តិភាព» ដើម្បីលើកកម្ពស់ការថែរក្សាអនាម័យ បរិស្ថាន និងសុខុមាលភាពរបស់ប្រជាពលរដ្ឋ។
តាមរយៈគោលនយោបាយថ្មីនេះរដ្ឋាភិបាលសង្ឃឹមថានឹង ជំរុញឱ្យមានការការថែរក្សា
អនាម័យ ដោះស្រាយបញ្ហាសម្រាមគ្រប់ប្រភេទ នៅក្នុងភូមិ ឃុំ សង្កាត់នានា។
យោងតាមក្រសួងបរិស្ថាន បានឱ្យដឹងថា ប្រទេសកម្ពុជាបានបង្កើតសំរាមជាង១០ ០០០តោនជារៀងរាល់ថ្ងៃ ហើយមានតែសំរាមប្រមាណ៥០ភាគរយប៉ុណ្ណោះដែលត្រូវបានប្រមូលទៅដាក់កន្លែងចាក់សំរាម ខណៈសំរាមដែលសេសសល់ទាំងប៉ុន្មានត្រូវបានបោះចាលតាមដងផ្លូវ ក្នុងទឹក ឬដុតចោលជាដើម៕