ក្រុមប្រជាពលរដ្ឋអះអាងថា ព្រៃកោងកាងនិងព្រៃលិចជាង១៧ហិកតា ស្ថិតនៅភូមិទឹកប៉ោង ឃុំបឹងព្រាវ ស្រុកស្រែអំបិល ខេត្តកោះកុង កំពុងរងការឈូសឆាយពីសំណាក់ជនខិលខូចដើម្បីយកដីធ្វើជាកម្មសិទ្ធិ ដោយពុំមានការទប់ស្កាត់ពីអាជ្ញាធរពាក់ព័ន្ធឡើយ។
ពលរដ្ឋម្នាក់នៅភូមិទឹកប៉ោង ខេត្តកោះកុង លោក យួន ឈីវ ដែលចុះផ្តិតយករូបភាពនៃការឈូសឆាយព្រៃលិចទឹកនោះ បានប្រាប់វីអូឌីនៅចន្ទនេះថា ព្រៃកោងកាងនិងព្រៃលិចទឹកជាង១៧ហិកតាដែលស្ថិតក្រោមការគ្រប់គ្រងរបស់ក្រសួងបរិស្ថាននិងជលផល ត្រូវបានជនខិលខូចដាក់គ្រឿងចក្រឈូសឆាយនៅពេលយប់តាំងពីសប្តាហ៍មុន ដោយពុំមានអាជ្ញាធរណាចុះទប់ស្កាត់ឡើយ។
លោកបន្តថា ការឈូសឆាយព្រៃកោងកាងនិងព្រៃលិចទឹកនេះ នឹងធ្វើឱ្យប៉ះពាល់ដល់ជម្រកសត្វសមុទ្រសម្រាប់រស់នៅនិងពងកូន។
លោកបន្ថែមថា៖ «រដ្ឋាភិបាលបានយកចិត្តទុកដាក់ណាស់ចំពោះព្រៃកោងកាងនិងព្រៃលិចទឹកនេះ ដោយមិនឱ្យមានការឈូសឆាយ មិនឱ្យចេញបណ្ណលើដីកម្មសិទ្ធិទេ ពីព្រោះព្រៃនេះជាជម្រករបស់សត្វសមុទ្រ។ បើកាលណាយើងឈូសឆាយបែបនេះ នឹងធ្វើឱ្យប៉ះពាល់ដល់ជីវចម្រុះនៅក្នុងសមុទ្រនិងសត្វសមុទ្រពងកូនផងដែរ»។
ពលរដ្ឋម្នាក់ទៀតរស់នៅភូមិទឹកប៉ោង ដែលសុំមិនបញ្ចេញឈ្មោះដោយបារម្ភពីសុវត្ថិភាព បានប្រាប់ថា លោកក៏បានឃើញការដាក់គ្រឿងចក្រឈូសឆាយព្រៃកោងកាងនិងព្រៃលិចទឹកនៅក្នុងឃុំបឹងព្រាវ ជាច្រើនកន្លែងទៀតដែរ។ លោកដាក់ការសង្ស័យថា អ្នកដែលហ៊ានឈូសឆាយព្រៃនេះ ជាមន្ត្រីមានលុយមានអំណាច។
លោកបន្ថែមថា៖ «មានគេធ្វើច្រើនដែរ គេធ្វើនៅតាមដងព្រែកហ្នឹង នៅក្នុងភូមិទឹកប៉ោងហ្នឹង វាមានច្រើនណាស់ អត់មានអាជ្ញាធរណាចុះមកហាមឃាត់ទេ»។
មេឃុំបឹងព្រាវ លោក ឈឹម ផាវ មានប្រសាសន៍ថា លោកបានទទួលការរាយការណ៍ពីប្រជាពលរដ្ឋជុំវិញបញ្ហានេះដែរ ប៉ុន្តែលោកពុំទាន់បានចុះទៅមើលផ្ទាល់នៅឡើយទេ។ ប៉ុន្តែលោកថា នឹងឱ្យមន្ត្រីចុះទៅពិនិត្យមើល ដើម្បីរាយការណ៍ជូនថ្នាក់លើឱ្យមានវិធានការបន្ត។
លោកបន្ថែមថា៖ «ខ្ញុំបានដឹងរឿងនេះដែរ ដោយពលរដ្ឋរាយការណ៍ពីរបីដងហើយ ប៉ុន្តែខ្ញុំអត់ទាន់បានចុះទៅមើលនៅឡើយទេ។ ចាំមើលខ្ញុំឱ្យក្រុមប្រឹក្សាខ្ញុំចុះទៅមើល»។
មន្ត្រីជលផលនៅស្រុកស្រែអំបិលម្នាក់ដែលសុំមិនប្រាប់ឈ្មោះ អះអាងថា ពិតជាមានករណីឈូសឆាយព្រៃកោងកាងនិងព្រៃលិចទឹកស្ថិតក្នុងឃុំបឹងព្រាវនេះមែន ហើយលោកបានរាយការណ៍ករណីនេះទៅថ្នាក់លើ ដើម្បីមានការចាត់វិធានការហើយ។ លោកបន្តថា លោកនិងអាជ្ញាធរពាក់ព័ន្ធកំពុងស្រាវជ្រាវរកមុខអ្នកដែលឈូសឆាយ។
លោកបន្ថែមថា៖ «ខ្ញុំបានធ្វើកំណត់ហេតុរួចហើយ និងបានរាយការណ៍ជូនប្រធានរួចហើយដែរ ដើម្បីមានវិធានការបន្ត ឥលូវមេកំពុងឱ្យខ្ញុំតាមដាននិងស្រាវជ្រាវបន្តទៀត»។
បើតាមមន្ត្រីជលផលរូបនេះ ការឈូសឆាយនោះបានធ្វើឱ្យប៉ះពាល់ដីព្រៃតំបន់ការពារជាង៩ហិកតា។
មន្ត្រីឃ្លាំមើលការរំលោភសិទ្ធិមនុស្សនៅអង្គការលីកាដូប្រចាំខេត្តកោះកុង លោក ប៉ែន វុទ្ធា មានប្រសាសន៍ថា កន្លងមក ជនខិលខូចបានលួចឈូសឆាយដីព្រៃរបស់រដ្ឋជាច្រើនករណីនៅក្នុងខេត្តនេះ ប៉ុន្តែអាជ្ញាធរថ្នាក់ក្រោមមិនដែលរកមុខជនល្មើសឃើញឡើយ។
លោកបានជំរុញឱ្យអាជ្ញាធរពាក់ព័ន្ធ គួរប្រញាប់ចុះស្រាវជ្រាវ ទប់ស្កាត់ និងចាត់វិធានការច្បាប់ចំពោះជនល្មើសឱ្យបានទាន់ពេលវេលា ដើម្បីព្រមានកុំឱ្យមានការរុករានយកដីរដ្ឋដោយខុសច្បាប់បន្តទៅទៀត។
លោកបន្ថែមថា៖ «កន្លងមក អាជ្ញាធរថ្នាក់ជាតិធ្លាប់បានជូនដំណឹងឱ្យអាជ្ញាធរថ្នាក់ក្រោមជាតិទប់ស្កាត់រាល់ការរុករានទន្ទ្រានយកដីរដ្ឋឬដីព្រៃតំបន់ការពារផ្សេងៗហ្នឹងឱ្យមានប្រសិទ្ធភាព ប៉ុន្តែយើងសង្កេតឃើញអាជ្ញាធរថ្នាក់ក្រោមហ្នឹងហាក់មិនយកចិត្តទុកដាក់ក្នុងការទប់ស្កាត់ទេ បានវាបណ្តាលឱ្យបញ្ហានេះបន្តកើតមាន។ អ៊ីចឹងបើសិនជាមានករណីពលរដ្ឋរាយការណ៍អំពីបញ្ហានេះ អាជ្ញាធរគួរតែមានការដុតដៃដុតជើងដោះស្រាយរឿងហ្នឹង ហើយស្រាវជ្រាវចាប់ជនល្មើសបញ្ជូនមកតុលាការ ដើម្បីផ្តន្ទាទោសទៅតាមផ្លូវច្បាប់»។
កាលពីខែកក្កដា ឆ្នាំ២០២០ រដ្ឋាភិបាលបានចេញសារលិខិតមួយណែនាំដល់អភិបាល និងប្រធានគណៈបញ្ជាការឯកភាពរដ្ឋបាលខេត្តទាំងអស់ ឱ្យពង្រឹងការទប់ស្កាត់រាល់ការកាប់រានទន្ទ្រានយកដីរដ្ឋដោយខុសច្បាប់នៅក្នុងតំបន់ការពារធម្មជាតិនៅតាមបណ្តាខេត្តនានា ដោយថា ដើម្បីបង្ការកុំឱ្យមានសង្គ្រាមដីធ្លីកើតឡើង៕
