សាលាដំបូងខេត្តក្រចេះ បានដោះលែងលោក អ៊ូច ឡេង និងសកម្មជនព្រៃឈើ៤រូបទៀតឱ្យមានសេរីភាពវិញ បន្ទាប់ពីធ្វើកិច្ចសន្យាបញ្ឈប់សកម្មភាពមួយចំនួនក្នុងដែនជម្រកសត្វព្រៃព្រៃឡង់ ដែលអាជ្ញាធរថា សកម្មភាពទាំងនោះធ្វើឡើងដោយគ្មានការអនុញ្ញាត។
លោក អ៊ូច ឡេង ប្រធានអង្គការក្រុមកិច្ចការពិសេសសិទ្ធិមនុស្សកម្ពុជា និងជាម្ចាស់ពានរង្វាន់វីរជនការពារបរិស្ថានពិភពលោកឆ្នាំ២០១៦ បានប្រាប់វីអូឌីនៅថ្ងៃទី០៨ ខែកុម្ភៈនេះថា ព្រះរាជអាជ្ញាអមសាលាដំបូងខេត្ត បានសម្រេចដោះលែងលោកនិងសកម្មជនផ្សេងទៀតបន្ទាប់ពីបញ្ចប់សាកសួរ ហើយឱ្យពួកគេធ្វើកិច្ចសន្យាបញ្ឈប់សកម្មភាពដែលអាជ្ញាធរចាត់ទុកថាជារឿងខុសច្បាប់។
ម្ចាស់ពានរង្វាន់អ្នកបរិស្ថានរូបនេះបន្ថែមថា មន្ទីរបរិស្ថានតម្រូវឱ្យលោកសុំការអនុញ្ញាតពីមន្ទីរឬមន្ត្រីឧទ្យានុរក្សជាមុនសិនមុននឹងចូលក្នុងព្រៃតំបន់ការពារ និងបានហាមឃាត់លោកមិនឱ្យផ្តល់ព័ត៌មានឬអ្វីផ្សេងៗទៅឱ្យអង្គភាពខាងក្រៅដោយគ្មានការអនុញ្ញាត។
លោក អ៊ូច ឡេង ប្រាប់ថា៖ «វាជាការចាប់បំបិទមាត់ បំបិទភស្តុតាង ឬមួយក៏ជាព័ត៌មានមួយចំនួនដែលខ្ញុំថតបាននៅក្នុងដែនជម្រកសត្វព្រៃព្រៃឡង់។ វាជាចេតនាធំបំផុតនៅពីខាងក្រោយខ្នង ដើម្បីចាប់ ដើម្បីរឹបអូសនូវភស្តុតាងទាំងប៉ុន្មាន ដើម្បីយកទៅទុកកុំឱ្យផ្សព្វផ្សាយជាសាធារណៈ»។
លោកចាត់ទុកការឃាត់ខ្លួនរូបលោកនិងសកម្មជនព្រៃឈើដទៃទៀត រួចដាក់បម្រាមមិនឱ្យធ្វើសកម្មភាពនោះ ថាជាការបើកឱកាសឱ្យមានការចរាចរឈើ ខណៈលោកថា សកម្មភាពបទល្មើសកាប់និងដឹកជញ្ជូនឈើចេញពីព្រៃឡង់ កំពុងកក្រើកឡើងអំឡុងរដូវប្រាំងនេះ។
លោកបន្តទៀតថា ក្នុងរយៈពេលដែលក្រុមរបស់លោកចុះឃ្លាំមើលនិងដាក់ស្លាកថែរក្សាព្រៃឈើនៅតាមដើមឈើនៅក្បែរតំបន់ព្រៃឡង់ ពីថ្ងៃទី៣ ដល់ថ្ងៃទី៥ ខែកុម្ភៈនេះ លោកឃើញមានគោយន្តដឹកឈើសរុបជិត១០០គ្រឿងចេញពីព្រៃឡង់ ក្នុងភូមិកំភ្លុក ឃុំកំពង់ចាម ស្រុកសំបូរ ខេត្តក្រចេះ ឆ្ពោះទៅដីក្រុមហ៊ុន ស៊ីងបាយអូទិក។
លោកបន្ថែមថា៖ «សម្រាប់អ្នកដែលប្រព្រឹត្តនូវបទល្មើស គេមិនចង់ឱ្យមានការយាយីពេលដែលគេកំពុងតែរកស៊ីកាប់បំផ្លាញព្រៃឈើនោះទេ អ៊ីចឹងហើយបានជាគេឃាត់ឃាំងមិនឱ្យយើងចូលទៅយាយីក្នុងការដឹកជញ្ជូន។ ដូចយើងដឹងស្រាប់ហើយ ហេតុអីបានជាជនល្មើសទៅហៅបរិស្ថានចុះមកចាប់សកម្មជន»។
ព្រះរាជអាជ្ញារងអមសាលាដំបូងខេត្តក្រចេះ លោក សោ វុទ្ធី ដែលកាន់សំណុំរឿងនេះ សុំមិនអត្ថាធិប្បាយជុំវិញការសម្រេចដោះលែងសកម្មជនទាំង៥រូបនេះទេ ដោយបង្វែរសំណួរទៅសួរមេធាវីរបស់លោក អ៊ូច ឡេង។
មេធាវីរបស់អង្គការលីកាដូ ដែលការពារក្តីឱ្យសកម្មជនព្រៃឈើ៣រូបក្នុងចំណោម៥រូប គឺអ្នកនាង សាម សុគន្ធា មានប្រសាសន៍ថា ការឃាត់ខ្លួនកូនក្តីរបស់គាត់ធ្វើឡើងដោយមិនឋិតក្រោមបទចោទអ្វីនោះទេ ដោយព្រះរាជអាជ្ញាគ្រាន់តែសាកសួរនិងប្រាប់ទៅលោក អ៊ូច ឡេង ចុះបញ្ជីអង្គការរបស់លោកនៅក្រសួងមហាផ្ទៃ ហើយមុននឹងធ្វើសកម្មភាពអ្វីនៅតំបន់អភិរក្សធម្មជាតិ ត្រូវផ្តល់ដំណឹងជាមុនដល់មន្ត្រីពាក់ព័ន្ធ។
អ្នកនាងថា៖ «មិនមានការចោទឬក៏ថាអីទេ! គ្រាន់តែថាមុនធ្វើសកម្មភាពអី ត្រូវចុះបញ្ជីអង្គការគាត់នៅក្រសួងមហាផ្ទៃសិន។ ហើយមួយទៀត បើសិនចូលក្នុងតំបន់ហាមឃាត់ ត្រូវមានការអនុញ្ញាតពីខាងមន្ទីរបរិស្ថាន»។
ប្រធានមន្ទីរបរិស្ថានខេត្តក្រចេះ លោក ឆាយ ឌួងសាវុធ បដិសេធមិនផ្តល់ការអត្ថាធិប្បាយចំពោះការលើកឡើងអំពីសកម្មភាពដឹកជញ្ជូនឈើតាមគោយន្តចេញពីព្រៃឡង់ចូលទៅក្នុងក្រុមហ៊ុន«ស៊ីងបាយអូទិក»នោះទេ ដោយលោកថា ព័ត៌មានទាំងនេះគឺសុទ្ធតែធ្វើឡើងដោយក្រុមរបស់ លោក អ៊ូច ឡេង។
លោកថ្លែងថា៖ «បងឯងចុះមកមើលជាមួយខ្ញុំទាំងអស់គ្នា ខ្ញុំក៏មិនឆ្លើយអីដែរ។ បើទំនេរមកជួបគ្នា ទៅមើលទាំងអស់គ្នា»។
សកម្មជនព្រៃឈើចំនួន៥រូបដែលរួមមានលោក អ៊ូច ឡេង លោក ហេង ស្រស់ លោក ម៉ែន មុត លោក ហេង រុន និងលោក តង ឈាង ត្រូវបានមន្ត្រីបរិស្ថានស្រុកសំបូរឃាត់ខ្លួននិងបញ្ជូនទៅសាកសួរនៅមន្ទីរបរិស្ថានខេត្ត នៅរសៀលថ្ងៃទី០៥ ខែកុម្ភៈ រួចបញ្ជូនបន្តទៅសាលាដំបូងខេត្តនៅថ្ងៃបន្ទាប់ មុននឹងត្រូវបានដោះលែងនៅព្រឹកថ្ងៃទី៨ ខែកុម្ភៈ ឆ្នាំ២០២១។
នៅក្នុងសេចក្តីថ្លែងការណ៍មួយលើទំព័រហ្វេសប៊ុក (Facebook) នៅថ្ងៃទី៧ ខែកុម្ភៈ ការិយាល័យអ្នកនាំពាក្យក្រសួងបរិស្ថាន ចាត់ទុកលោក អ៊ូច ឡេង និងសកម្មជនផ្សេងទៀត ជាក្រុមជនល្មើសធ្វើសកម្មភាពក្រោមស្លាកអង្គការក្រៅច្បាប់ បង្ខូចកេរ្តិ៍ឈ្មោះកម្ពុជាដើម្បីប្រយោជន៍ក្រុមខ្លួន។
អ្នកនាំពាក្យសរសេរបន្ថែមថា៖ «ក្រសួងបរិស្ថានសូមអំពាវនាវនិងលើកទឹកចិត្តដល់ម្ចាស់ជំនួយមួយចំនួន សូមធ្វើការផ្តល់ជំនួយគាំទ្រចំពោះសមាគមនិងអង្គការក្រៅរដ្ឋាភិបាលណាដែលបានចុះបញ្ជីត្រឹមត្រូវនិងគោរពច្បាប់ ដើម្បីលើកស្ទួយការអនុវត្តច្បាប់និងលើកទឹកចិត្តចំពោះសមាគមនិងអង្គការមិនមែនរដ្ឋាភិបាលដែលគោរពច្បាប់ត្រឹមត្រូវនិងមិនចិញ្ចឹមចលនាខុសច្បាប់ណាមួយឡើយ»៕