លោក កឹម សុខា ប្រធានគណបក្សសង្គ្រោះជាតិដែលត្រូវបានរំលាយចោល តាមរយៈមេធាវីរបស់លោក បានក្រើនរំឭកទៅអតីតមន្ត្រីដែលចេញទៅបង្កើតគណបក្សថ្មី ឱ្យឈប់ភ្ជាប់ឈ្មោះលោកទៅនឹងការគាំទ្រណាមួយ ដើម្បីកុំឱ្យមានការចោទប្រកាន់ថា លោករំលោភបំពានទៅនឹងបម្រាមរបស់តុលាការ។
កាលពីថ្ងៃអាទិត្យម្សិលមិញ សហមេធាវីការពារក្តីលោក កឹម សុខា បាននិយាយក្នុងសេចក្តីថ្លែងការណ៍មួយថា តំណាងមេបក្សប្រឆាំងរូបនេះសូមបញ្ជាក់ជាថ្មីម្តងទៀត ទៅបុគ្គលឬក្រុមណាមួយដែលមានបំណងបង្កើតបក្សឬបានបង្កើតរួចហើយ កុំយកឈ្មោះកូនក្តីរបស់ពួកគេទៅភ្ជាប់ពាក់ព័ន្ធជាមួយ។
តាមលិខិតដដែល ក្រុមមេធាវីលោក កឹម សុខា បានក្រើនរំឭកថា អតីតមន្ត្រីបក្សប្រឆាំងដែលចាកចេញទៅហើយនោះ គួរមានសេចក្តីក្លាហានទទួលខុសត្រូវដោយខ្លួនឯង។
សហមេធាវី លោក ផែង ហេង ប្រាប់ VOD នៅថ្ងៃនេះថា ការក្រើនរំឭករបស់លោក កឹម សុខា ជាការព្រួយបារម្ភមួយទៅនឹងការចោទប្រកាន់ថា លោកបានរំលោភទៅនឹងបម្រាមរបស់តុលាការ។
លោក ផែង ហេង គូសបញ្ជាក់ដូច្នេះថា៖ «ដោយសារតែឯកឧត្តម កឹម សុខា គាត់កត់សម្គាល់ឃើញថា មានការយកឈ្មោះគាត់ឬក៏យកករណីគាត់ ដើម្បីបានការគាំទ្រឬក៏ដើម្បីបានការជឿជាក់អីយ៉ាងណានោះ គាត់បារម្ភខ្លាចអំពើឬក៏ការឃោសនាអស់ទាំងហ្នឹង វាប៉ះពាល់មកដល់សិទ្ធិរបស់គាត់»។
មេធាវីរូបនេះនិយាយទៀតថា ការបារម្ភបែបនេះរបស់កូនក្តីលោក បានកើតឡើងដោយសារតែដីកាសម្រេចរបស់សាលាដំបូងរាជធានីភ្នំពេញ និងសាលដីការបស់តុលាការកំពូល បានដាក់រួមគ្នាឱ្យកូនក្តីស្ថិតក្រោមការឃ្លាំមើល និងមិនអនុញ្ញាតឱ្យធ្វើសកម្មភាពនយោបាយ។
លោក ផែង ហេង ប្រាប់បន្តថា៖ «ចង់មិនចង់! កាលណាគេយកឈ្មោះគាត់ [កឹម សុខា] ទៅភ្ជាប់ដើម្បីប្រយោជន៍គេ ប៉ុន្តែវាប៉ះពាល់ដល់ប្រយោជន៍ឯកឧត្តម កឹម សុខា ដែល [តុលាការ] កំពុងតែហាមឃាត់ មានន័យថា ដីកាសម្រេចរបស់សាលាដំបូងរាជធានីភ្នំពេញ និងសាលដីការបស់តុលាការកំពូល ហើយចំណុចដែលយើងបារម្ភហ្នឹងមិនមានន័យថា យើងទៅរារាំងបុគ្គលអស់ទាំងហ្នឹងទេ គាត់ចង់ធ្វើអីធ្វើទៅ សេរីភាពរបស់គាត់ទេ»។
ទោះជាយ៉ាងណា លិខិតនោះ លោក កឹម សុខា មិនបានបញ្ចេញឈ្មោះចំៗទៅលើក្រុមណាមួយនៃអតីតមន្ត្រីរបស់ខ្លួនដែលបានសម្រេចចិត្តសុំសិទ្ធិធ្វើនយោបាយ ដើម្បីបង្កើតគណបក្សនយោបាយថ្មីនោះទេ។
អតីតមន្ត្រីមួយចំនួនដែលបានសុំសិទ្ធិធ្វើនយោបាយឡើងវិញ និងបានបង្កើតគណបក្សថ្មី បង្ហាញការយល់ឃើញផ្សេងគ្នាជុំវិញសាររបស់អតីតមេដឹកនាំរបស់ខ្លួន។
អតីតអំណាងរាស្ត្រ លោក អ៊ូ ច័ន្ទរ័ត្ន ដែលប្រាប់ថាមានគម្រោងបង្កើតគណបក្សថ្មីមួយឈ្មោះ «គណបក្សកែទម្រង់កម្ពុជា»នោះ និយាយថា លោកគាំទ្រសារនេះ ដោយថា ការភ្ជាប់ឈ្មោះលោក កឹម សុខា ទៅនឹងសកម្មភាពនយោបាយ អាចធ្វើឱ្យគាត់រងនូវការចោទប្រកាន់ថា មិនគោរពច្បាប់ដែលកម្រិតដោយតុលាការ។
លោក អ៊ូ ច័ន្ទរ័ត្ន ប្រាប់ថា៖ «ប៉ុន្តែអ្វីដែលខ្ញុំបានលើកឡើង ខ្ញុំគ្រាន់តែថា ប្រសិនបើគណបក្សដែលខ្ញុំបម្រុងនឹងរៀបចំឡើងដែលមានសហការីមួយចំនួនចូលរួមហ្នឹង ខ្ញុំយល់ថា បើមានមេដឹកនាំណាដែលមានសក្តានុពលអាចប្រកួតជាមួយគណបក្សប្រជាជនកម្ពុជាបាន យើងនឹងផ្អាកសកម្មភាព ព្រោះយើងមិនចង់ប្រកួតជាមួយគ្នាឯងនោះទេ»។
លោក អ៊ូ ច័ន្ទរ័ត្ន បានឱ្យដឹងថា លោកគ្រោងបង្កើតគណបក្សថ្មីនេះ ដើម្បីប្រមែប្រមូលចងក្រងរចនាសម្ព័ន្ធអតីតសហការីឡើងវិញ ឆ្ពោះទៅរកការបោះឆ្នោតឆ្នាំ២០២២ និង២០២៣ ខណៈបក្សប្រឆាំងបន្តស្ថិតក្នុងភាពមិនច្បាស់លាស់នៅឡើយ។
អតីតតំណាងរាស្ត្រមួយរូបទៀត លោក ជីវ កត្តា ដែលបច្ចុប្បន្នជាប្រធាន«គណបក្សខ្មែរស្រឡាញ់ជាតិ» បាននិយាយថា លោកមានការខកចិត្តនឹងសារដែលបង្ហោះដោយសហមេធាវីនេះ។
លោកគូសបញ្ជាក់ថា ការលើកឡើងពីឈ្មោះលោក កឹម សុខា កន្លងទៅ គឺចង់ផ្សព្វផ្សាយទៅដល់ពលរដ្ឋឱ្យបន្តដឹងពីគុណតម្លៃរបស់អតីតមេដឹកនាំរបស់ខ្លួន។
លោកថា សេចក្តីថ្លែងការណ៍របស់សហមេធាវីនេះ អាចនឹងធ្វើឱ្យលោក កឹម សុខា ដែលមិនអាចថ្លែងសារនយោបាយបាន ធ្លាក់ចុះប្រជាប្រិយភាពទៅវិញទេ ព្រោះអ្នកនៅមូលដ្ឋានលែងឮឈ្មោះលោក។
លោក ជីវ កត្តា ប្រាប់ថា៖ «ជួនកាល កូនចៅគ្រាន់តែប្រើឈ្មោះ ដើម្បីជាការគោរពមេ ស្រឡាញ់មេ ដល់យើងអត់យក អាគោរពស្រឡាញ់ហ្នឹងវាបាត់ទៅទៀត។ ដល់អ៊ីចឹង អាសំឡេងគាត់ហ្នឹងវានឹងថយ ហើយប្រជារាស្ត្រលោកនឹងភ្លេចបន្តិចម្តងៗ តាមរយៈអី! តាមរយៈមិនឱ្យប្រើឈ្មោះគាត់ហ្នឹងឯង»។
ចាប់ពីគណបក្សសង្គ្រោះជាតិត្រូវបានរំលាយជាង៣ឆ្នាំមកនេះ អតីតមន្ត្រីបក្សប្រឆាំងជាង១០នាក់ហើយបានសុំសិទ្ធិធ្វើនយោបាយឡើងវិញ តបតាមច្បាប់គណបក្សនយោបាយដែលត្រូវបានកែប្រែដោយសភារបស់បក្សកាន់អំណាច។ គណបក្សនយោបាយចំនួន៣ហើយ ត្រូវបានក្រសួងមហាផ្ទៃអនុញ្ញាតឱ្យបង្កើត ក្នុងនោះមាន «គណបក្សខ្មែរស្រលាញ់ជាតិ» បង្កើតឡើងដោយលោក ជីវ កត្តា និង «គណបក្សខ្មែរអភិរក្សនិយម» បង្កើតឡើងដោយលោក រៀល ខេមរិន្ទ្រ។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា មានប្រសាសន៍ថា សាររបស់លោក កឹម សុខា តាមរយៈមេធាវីនេះ វាអាចលាងជម្រះមន្ទិលសង្ស័យថា លោកមិនរំលោភបំពានទៅលើបម្រាមតុលាការទេ និងមួយវិញទៀតក៏ប្រាប់ទៅអ្នកគាំទ្រដែរថា លោកកំពុងឈរនៅចំណុចពិតប្រាកដនាពេលនេះ។
ទោះជាយ៉ាងណា អ្នកជំនាញនយោបាយរូបនេះយល់ថា អ្នកដើរចេញពីគណបក្សប្រឆាំងទៅបង្កើតគណបក្សថ្មី នឹងមិនមានកម្លាំងខ្លាំងដើម្បីប្រកួតជាមួយបក្សកាន់អំណាចបានទេ បើគ្មានអតីតមេដឹកនាំធំៗទាំងពីរនៅពីក្រោយនោះ។
លោក ឯម សុវណ្ណរ៉ា ប្រាប់ថា៖ «ខ្ញុំគិតថា បើទោះបីអ្នកដែលតុលាការហាមឃាត់ធ្វើនយោបាយទាំងជាង១០០នាក់ ទៅបង្កើតបក្សថ្មី ក៏មិនអាចកៀរគរសំឡេងបានដែរ ប្រសិនជាពុំមានការប្រកាសឬគាំទ្រពីលោក កឹម សុខា និងលោក សម រង្ស៊ី នោះ»។
លោក កឹម សុខា ត្រូវបានតុលាការដកហូតសិទ្ធិធ្វើនយោបាយជាង៣ឆ្នាំមកហើយ គិតពីថ្ងៃចាប់ខ្លួនអំឡុងខែកញ្ញា ឆ្នាំ២០១៧ ក្រោមបទចោទថាបាន«ឃុបឃិតជាមួយបរទេសចង់ផ្តួលរំលំរដ្ឋាភិបាល» បន្ទាប់ពីគណបក្សសង្គ្រោះជាតិដណ្តើមបានអាសនៈនៅមូលដ្ឋានឬឃុំសង្កាត់ ចំនួន៥០០៧ ប្រហាក់ប្រហែលគណបក្សកាន់អំណាចដែរនោះ៕