មេដឹកនាំសហជីពមួយរូបបានរកកិច្ចអន្តរាគមន៍ពីក្រសួងយុត្តិធម៌ជួយរកយុត្តិធម៌ឱ្យខ្លួន ក្រោយរងបណ្តឹងពីក្រុមហ៊ុនផលិតកាបូបមួយនៅស្រុកកំពង់ត្រឡាច ខេត្តកំពង់ឆ្នាំង។
កាលពីថ្ងៃទី៣ ខែកុម្ភៈ ឆ្នាំ២០២១ ប្រធានសម្ព័ន្ធសហជីពជាតិ លោក ហ្វា សាលី បានចូលទៅបំភ្លឺនៅសាលាស្រុករលាប្អៀរ ខេត្តកំពង់ឆ្នាំង ជុំវិញដំណើររឿងដែលរងការចោទពីបទ «បរិហារកេរ្តិ៍ជាសាធារណៈ និងញុះញង់ឱ្យប្រព្រឹត្តបទឧក្រិដ្ឋជាអាទិ៍» ទៅតាមកោះហៅរបស់ព្រះរាជអាជ្ញាអមសាលាដំបូងខេត្តកំពង់ឆ្នាំង លោក អ៊ិត សុធា។
ក្នុងលិខិតមួយដាក់ទៅក្រសួងយុត្តិធម៌ នៅថ្ងៃទី៥ ខែកុម្ភៈ ឆ្នាំ២០២១នេះ លោក ហ្វា សាលី បានរៀបរាប់ថា ពេលដែលចូលទៅបំភ្លឺនៅសាលាស្រុករលាប្អៀរនោះ គឺពុំមានដើមបណ្តឹងនិងមន្ត្រីតុលាការចូលរួមឡើយ ហើយខាងសាលាស្រុកក៏មិនបានដឹងរឿងនេះដែរ។
លិខិតដដែលឱ្យដឹងថា ក្នុងដីកាកោះនោះមិនបានបញ្ជាក់ពីអត្តសញ្ញាណដើមបណ្តឹងឬភាគីណាមួយឡើយ ដែលធ្វើឱ្យលោកមានការបារម្ភពីសុវត្ថិភាពផ្ទាល់ខ្លួន។
ប៉ុន្តែយ៉ាងណា លោកថា តាមដែលព័ត៌មានដែលលោកទទួល គឺដើមបណ្តឹងក្នុងសំណុំរឿងនេះ ជាបុគ្គលម្នាក់ឈ្មោះ សឿន រ៉ាវុធ ដែលតំណាងឱ្យក្រុមហ៊ុនផលិតកាបូប ខាយណេង និងជាប្រធានរដ្ឋបាលរោងចក្រនេះ។
លោក ហ្វា សាលី បញ្ជាក់ក្នុងលិខិតថា ដើមចមដែលលោក សឿន រ៉ាវុធ ប្តឹងលោកទៅតុលាការ គឺដោយសារតែលោកបានសរសេរបង្ហោះលើបណ្តាញសង្គមហ្វេសប៊ុក កាលពីថ្ងៃទី២២ ខែមករា ឆ្នាំ២០២០ ដោយលើកឡើងថា រោងចក្រផលិតកាបូបឈ្មោះ ខាយណេង លេឌើរ ប្រូដាក់ ខេមបូឌា (KAI NENG LETHER PRODUCTS CO.,LTD) នៅភូមិផ្សារត្រាច ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង មានការរើសអើង និងធ្វើទុក្ខបុកម្នេញលើសហជីពរបស់លោកដែលនៅប្រចាំរោងចក្រមួយនេះ។
លោក ហ្វា សាលី ប្រាប់វីអូឌីបន្ថែមលើលិខិតនេះថា ករណីរោងចក្រប្តឹងលោកទៅតុលាការនេះ ជារឿងអយុត្តិធម៌មួយ និងជាការគំរាមកំហែង រើសអើង និងបំបាក់ស្មារតីទៅលើសហជីព។
លោកបន្ថែមថា៖ «ជារឿយៗយើងឃើញថា រោងចក្រសហគ្រាសមួយចំនួនតែងតែប្រើប្រព័ន្ធតុលាការនេះបំបាក់ស្មារតីកម្មករនិយោជិត ក៏ដូចជាថ្នាក់ដឹកនាំសហជីព អ៊ីចឹងយើងអំពាវនាវដល់ស្ថាប័នអយ្យការ ក៏ដូចជាផ្នែកពាក់ព័ន្ធនឹងតុលាការនេះ គួរតែពិនិត្យឱ្យបានម៉ត់ចត់ទៅលើបញ្ហាទាំងអស់នេះ ចៀសវាងឱ្យថៅកែទាំងអស់នេះប្រើប្រព័ន្ធតុលាការនេះ ដែលវាធ្វើឱ្យតម្លៃ ក៏ដូចជាឯករាជ្យភាពរបស់តុលាការ ហើយធ្វើឱ្យបាត់បង់នូវសិទ្ធិសេរីភាពសហជីព ក៏ដូចជាលក្ខខណ្ឌការងារបងប្អូនកម្មករ ដោយសារតែពួកគាត់មានការភ័យខ្លាចទៅលើការប្រើប្រាស់ប្រព័ន្ធតុលាការបែបនេះ»។
លោក ហ្វា សាលី បន្ថែមថា កន្លងមក ខាងរោងចក្រនេះធ្លាប់បានប្តឹងសហជីពចំនួន២ ទៅតុលាការដែរ ក្រោយពីសហជីពនោះតវ៉ាទាមទារលក្ខខណ្ឌការងារជូនកម្មករនៅក្នុងរោងចក្រនេះ។
វីអូឌី មិនអាចរកការឆ្លើយតបពីលោក សឿន រ៉ាវុធ ប្រធានរដ្ឋរោងចក្រខាយណេង បានទេនៅថ្ងៃសុក្រនេះ ខណៈអ្នកនាំពាក្យក្រសួងយុត្តិធម៌ លោក ជិន ម៉ាលីន ទូរសព្ទចូលតែគ្មានអ្នកទទួល។
អនុប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តកំពង់ឆ្នាំង លោក ស៊ឹម សុវឌ្ឍៈ មានប្រសាសន៍ថា លោកមិនបានដឹងរឿងថៅកែរោងចក្រ ខាយណេង ប្តឹងប្រធានសហជីពទៅតុលាការនោះទេ។ ចំពោះការលើកឡើងដែលថានៅរោងចក្រនេះមានលក្ខខណ្ឌការងារមិនល្អសម្រាប់កម្មករ និងមានការរើសអើងសហជីពនោះ លោកថា លោកមិនទាន់ទទួលបានព័ត៌មាននៅឡើយ។
លោកបន្ថែមថា៖ «រឿងរោងចក្រប្តឹងសហជីពនេះ ខាងយើងមិនដឹងទេ ទាល់តែរឿងវិវាទរួម បានជាសមត្ថកិច្ចរបស់មន្ទីរក្នុងការដោះស្រាយ។ ពាក់ព័ន្ធរឿងហ្នឹង [រើសអើងសហជីព និងលក្ខខណ្ឌការងារ] ខ្ញុំមិនទាន់ទទួលបានព័ត៌មានទេ»។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា មួយរយៈចុងក្រោយនេះ មានសញ្ញាណអាក្រក់ជាច្រើនករណី ដែលថៅកែរោងចក្របានប្រើប្រព័ន្ធតុលាការជាមធ្យោបាយដើម្បីគំរាមសហជីព។
លោកបានស្នើឱ្យមានការអន្តរាគមន៍ និងបញ្ឈប់ការប្រើប្រាស់ប្រព័ន្ធតុលាការ ដើម្បីប្រឆាំងសហជីពទៀត។
លោកបន្ថែមថា៖ «មានអំពើហិង្សាជាហូរហែ មានការរងអំពើហិង្សាជាហូរហែ ហើយវាបានធ្វើឱ្យចលនាសហជីពហ្នឹងមានការបាក់ស្បាត មានការថយចុះ ហើយបើសិនជាគ្មានអ្នកណាស្ម័គ្រចិត្តធ្វើតំណាងដើម្បីការពារសិទ្ធិឱ្យកម្មករទេ វាជាឱកាសរបស់និយោជកក្នុងការកេងប្រវ័ញ្ចរំលោភសិទ្ធិកម្មករហ្នឹងហើយ។ ហើយនៅពេលលក្ខខណ្ឌការងារកាន់តែអាក្រក់ ការកេងប្រវ័ញ្ចខ្ពស់ ហើយព័ត៌មានចេញទៅក្រៅអំពីការរំលោភបំពានច្រើន វាក៏ប៉ះពាល់ដល់មុខមាត់របស់រដ្ឋាភិបាលដែរ»។
បើតាមលោក អាត់ ធន់ រយៈពេល១០ឆ្នាំចុងក្រោយនេះ ថ្នាក់ដឹកនាំសហជីពជាច្រើននាក់បានរងការគំរាមកំហែង រងអំពើហិង្សា រងបណ្តឹងនៅតុលាការ និងជាប់ពន្ធនាគារមិនតិចជាង៦០នាក់នោះទេ ក្រោយពីពួកគេសកម្មចេញមុខតវ៉ាទាមទារលក្ខខណ្ឌការងារជូនកម្មករ៕
