ព័ត៌មានជាតិ

លោក អ៊ូច ឡេង និងសកម្មជនព្រៃឈើ៤រូបទៀត ត្រូវមន្រ្តីបរិស្ថានខេត្តក្រចេះចាប់ខ្លួន

លោក ត្រាន់ តិចសេង
| ០៥ កុម្ភៈ ២០២១
ម៉ោង ១៩:២៩

លោក អ៊ូច ឡេង ជិះគោយន្តទៅល្បាតព្រៃជាមួយប្រជាសហគមន៍នាពេលកន្លងទៅ។ (រូបភាព៖ទំព័រហ្វេសប៊ុក Cambodian Youth Network – CYN)

សកម្មជនព្រៃឈើចំនួន៥រូប ដែលរួមមាន លោក អ៊ូច ឡេង លោក ហេង ស្រស់ លោក ម៉ែន មុត លោក ហេង រុន និង ផង ឈាង ត្រូវបានមន្រ្តីបរិស្ថានខេត្តក្រចេះ ចាប់ខ្លួននៅរសៀលថ្ងៃទី០៥ខែកុម្ភៈនេះ។

ស្នងការនគរបាលខេត្តក្រចេះ លោក លន់ សុផាត ឆ្លើយយ៉ាងខ្លីថា ពិតជាមានករណីចាប់ខ្លួនមែន ប៉ុន្តែ លោកបដិសេធមិនផ្តល់ព័ត៌មានបន្ថែម ដោយសារករណីចាប់ខ្លួននោះ ខាងបរិស្ថានជាអ្នកអនុវត្ត។

លោក លន់ សុផាត ប្រាប់ថា៖ «ខ្ញុំទទួលរបាយការណ៍ពីអធិការមកមានករណីនេះ។ ចង់ច្បាស់ទាល់ទាក់ទងទៅបរិស្ថាន។ បរិស្ថានអ្នកអនុវត្តការងារនេះ»។

ប្រធានមន្ទីរបរិស្ថានខេត្តក្រចេះ លោក ឆាយ ឌួងសាវុធ បញ្ជាក់ថាពិតជាមានការចាប់ខ្លួនពួកគេទាំង៥នាក់មែន ប៉ុន្តែលោកមិនទាន់អាចបញ្ជាក់បន្ថែមពីមូលហេតុនៃការចាប់ខ្លួននេះទេ។

លោក ឌួងសាវុធ ប្រាប់ VOD តាមទូរសព្ទមុននេះបន្តិចថា៖«ការឃាត់ខ្លួនគាត់នេះ គឺសមត្ថកិច្ចកំពុងតែសាកសួរព័ត៌មាន។ ខ្ញុំសូមជម្រាបប៉ុណ្ណឹង ខ្ញុំអត់មានឆ្លើយអីបានទេ»។

VOD មិនអាចទាក់ទងសុំការបញ្ជាក់បន្ថែមពី អ្នកនាំពាក្យក្រសួងបរិស្ថាន លោក នេត្រ ភក្ត្រា បាននៅឡើយទេ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។