លោកនាយករដ្ឋមន្ត្រី ហ៊ុន សែន នៅល្ងាចថ្ងៃសុក្រនេះ បានប្រកាសលុបចោលគម្រោងចាក់វ៉ាក់សាំងស៊ីណូហ្វាមរបស់ចិន ដោយថាអាយុរបស់លោកនិងមន្ត្រីជាន់ខ្ពស់រដ្ឋាភិបាលមួយចំនួន លើសពីលក្ខខណ្ឌអាយុ។
លោកនាយករដ្ឋមន្រ្តី ហ៊ុន សែន បានសរសេរនៅក្នុងទំព័រហ្វេសប៊ុករបស់លោកថាតាមព័ត៌មានដែលលោកទទួលបាន ពីការិយាល័យនៃទីប្រឹក្សាសេដ្ឋកិច្ចនិងពាណិជ្ជកម្មប្រចាំស្ថានទូតចិនប្រចាំនៅកម្ពុជា បានបញ្ជាក់ថា វ៉ាក់សាំងឈ្មោះ ស៊ីណូហ្វាម(Sinopharm)ចាក់បានតែមនុស្ស ដែលមានអាយុពី១៨ឆ្នាំទៅ ៥៩ឆ្នាំតែប៉ុណ្ណោះ។
លោកបន្តថា រូបលោក មានអាយុជាង៦៨ឆ្នាំទៅហើយ ខណៈមន្ត្រីជាន់ខ្ពស់រដ្ឋាភិបាលភាគច្រើន ក៏មានអាយុលើសពី៦០ឆ្នាំដែរ ដែលមិនទាន់អាចចាក់វ៉ាក់សាំងនេះបានទេ។
លោកបានសរសេរថា៖ «សម្រាប់ខ្ញុំដែលមានអាយុជាង៦៨ឆ្នាំទៅហើយ មិនទាន់អាចចាក់បានទេ។ ដូចនេះគំរោងចាក់វ៉ាក់សាំងដែលគ្រោងចាក់នៅថ្ងៃទី១០ ខែកុម្ភៈ ឆ្នាំ២០២១ នៅមន្ទីរពេទ្យកាល់ម៉ែត្រនឹងត្រូវលុបចោល អាស្រ័យដោយទាំងខ្ញុំទាំងមន្ត្រីជាន់ខ្ពស់ផ្សេងទៀតភាគច្រើនមានអាយុលើសពី៦០ឆ្នាំទៅហើយ មិនអាចចាក់បានទេ»។
តែយ៉ាងណា លោកថា សម្រាប់កម្មវិធីចេញទៅទទួលជំនួយវ៉ាក់សាំង នៅព្រលានយន្តហោះអន្តរជាតិភ្នំពេញ នៅល្ងាចថ្ងៃទី០៧ ខែកុម្ភៈ នឹងរក្សាទុកនៅដដែល៕