ប្រមុខរដ្ឋាភិបាលបានប្រកាសថា វ៉ាក់សាំងប្រឆាំងវីរុសកូវីដ១៩របស់ចិននឹងមកដល់ប្រទេសកម្ពុជា នៅថ្ងៃអាទិត្យ ទី៧ ខែកុម្ភៈ ឆ្នាំ២០២១នេះ។
យោងតាមសារជាសំឡេងផ្ញើទៅកាន់ក្រុមការងារវ៉ាក់សាំង និងត្រូវបានផ្សព្វផ្សាយលើទំព័រហ្វេសប៊ុកលោកនាយករដ្ឋមន្ត្រី ហ៊ុន សែន បានណែនាំដល់មន្ត្រីសុខាភិបាល ត្រៀមរៀបចំកម្មវិធីទទួលវ៉ាក់សាំងប្រឆាំងកូវីដ១៩ នៅព្រលានយន្តហោះអន្តរជាតិភ្នំពេញ នៅថ្ងៃទី៧ ខែកុម្ភៈ។
លោកបានថ្លែងថា៖ «ខ្ញុំបានទទួលព័ត៌មានពីបង ម៉ម ប៊ុនហេង [រដ្ឋមន្ត្រីក្រសួងសុខាភិបាល] ថា វ៉ាក់សាំងនឹងមកដល់ថ្ងៃទី៧ គឺថ្ងៃអាទិត្យនេះ ហើយដូចការប្រកាសរបស់ខ្ញុំកន្លងទៅ គឺខ្ញុំបានបញ្ជាក់ថា ពេលវ៉ាក់សាំងមកដល់ ខ្ញុំនឹងទៅទទួល។ ហើយឥលូវនេះ គឺត្រូវរៀបចំកម្មវិធីទទួលវ៉ាក់សាំងនៅឯព្រលានយន្តហោះពោធិ៍ចិនតុង [ព្រលានយន្តហោះអន្តរជាតិភ្នំពេញ]»។
ស្របពេលគ្នានេះដែរ ក្រសួងសុខាភិបាលក៏បានចេញលិខិតមួយប្រកាសអនុញ្ញាតឱ្យប្រើប្រាស់វ៉ាក់សាំង Sinopharm COVID-19 របស់ប្រទេសចិន ក្នុងលក្ខខណ្ឌនៃការប្រើប្រាស់ជាបន្ទាន់ផងដែរ។
លិខិតរបស់ក្រសួងបានបញ្ជាក់ថា៖ «ក្រសួងសុខាភិបាលនៃព្រះរាជាណាចក្រកម្ពុជា អនុញ្ញាតឱ្យប្រើប្រាស់នូវវ៉ាក់សាំង Sinopharm COVID-19 ដែលផលិតដោយវិទ្យាស្ថាន Beijing Institute of Biological Products Co., Ltd នៃសាធារណរដ្ឋប្រជាមានិតចិន ក្នុងលក្ខខណ្ឌនៃការប្រើប្រាស់ជាបន្ទាន់ [Emergency Use Authorization] ដោយអនុវត្តតាមពិធីសារស្តីពីយុទ្ធនាការចាក់វ៉ាក់សាំងកូវីដ-១៩ របស់រាជរដ្ឋាភិបាល»។
កាលពីថ្ងៃម្សិលមិញ រថយន្តសម្រាប់ដឹកជញ្ជូនវ៉ាក់សាំងកូវីដ១៩ ចំនួន២គ្រឿង និងកុងតឺន័រត្រជាក់ចំនួន៥ ត្រូវបានត្រៀមជាសម្រេច សម្រាប់ដឹកជញ្ជូនវ៉ាក់សាំងកូវីដ១៩នេះ។
កាលពីពេលថ្មីៗនេះ រដ្ឋាភិបាលចិនបានសម្រេចផ្តល់ជំនួយវ៉ាក់សាំងបង្ការជំងឺកូវីដ១៩ ឈ្មោះ ស៊ីណូហ្វាម ចំនួន១លានដូស ដល់រដ្ឋាភិបាលកម្ពុជា ដើម្បីចាក់ជូនប្រជាពលរដ្ឋដោយឥតគិតថ្លៃ ក្នុងនោះ វ៉ាក់សាំងចំនួន៦០ម៉ឺនដូស នឹងត្រូវបញ្ជូនមកដល់កម្ពុជា ក្នុងដំណាក់កាលទី១ និងវ៉ាក់សាំងដែលនៅសល់ នឹងបញ្ជូនមកជាបន្តបន្ទាប់ទៀត។
បើតាមក្រសួងសុខាភិបាល គិតមកដល់ព្រឹកថ្ងៃទី០៤ ខែកុម្ភៈ ឆ្នាំ២០២១នេះ កម្ពុជាបានរកឃើញករណីវិជ្ជមានជំងឺកូវីដ១៩ សរុបចំនួន៤៦៧នាក់ ក្នុងនោះបានព្យាបាលជាសះស្បើយចំនួន៤៥១នាក់ និងកំពុងសម្រាកព្យាបាលចំនួន១៦នាក់៕