តុលាការបានសម្រេចច្រានចោលជាលើកទី៣ចំពោះសំណើសុំរបស់ក្រុមមេធាវីលោក កឹម សុខា ដែលបានស្នើឱ្យបើកដំណើរការឡើងវិញនូវសវនាការជំនុំជម្រះសំណុំរឿង«ក្បត់ជាតិ»ដែលចោទលើមេបក្សប្រឆាំងរូបនេះ ដោយសម្អាងទៅលើស្ថានភាពនៃការរីករាលដាលកូវីដ១៩ និងភាពចាំបាច់មួយចំនួនទៀតចេញដោយក្រសួងយុត្តិធម៌។
សហមេធាវីលោក កឹម សុខា កាលពីថ្ងៃទី២២ ខែមករាកន្លងមកនេះ បានដាក់លិខិតជាលើកទី៣ ស្នើសុំបន្តសវនាការសំណុំរឿងកូនក្តីឡើងវិញ ក្រោយសវនាការនេះត្រូវបានផ្អាកកាលពីចុងខែមីនាឆ្នាំមុន បន្ទាប់ពីកម្ពុជាផ្ទុះឡើងនូវជំងឺកូវីដ១៩។
ប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ លោក កូយ សៅ និយាយក្នុងលិខិតចុះថ្ងៃទី២ ខែកុម្ភៈ ថាសំណើសុំបន្តសវនាការឡើងវិញរបស់សហមេធាវីការពារ មិនអាចដាក់កម្មវិធីពេលនេះតាមការស្នើសុំបានទេ ដោយសម្អាងថា ការឆ្លងរាលដាលនៃមេរោគកូវី១៩នៅលើពិភពលោកនៅតែបន្តកើតមាន និងមិនទាន់មានភាពច្បាស់លាស់នៅឡើយ។
លោក កូយ សៅ រៀបរាប់ថា៖ «ដោយហេតុថា សាលាដំបូងរាជធានីភ្នំពេញក៏កំពុងមមាញឹកក្នុងចំណាត់ការសំណុំរឿងព្រហ្មទណ្ឌដែលមានជនត្រូវចោទកំពុងជាប់ឃុំយ៉ាងចង្អៀតក្នុងពន្ធនាគារ ដែលករណីនេះ ជាបញ្ហាប្រឈមដែលត្រូវចូលរួមឱ្យបានសកម្មនៅក្នុងយុទ្ធនាការនៃការដោះស្រាយសំណុំរឿងកកស្ទះ ដែលត្រូវបានដាក់ចេញដោយក្រសួងយុត្តិធម៌នាពេលកន្លងមកថ្មីៗនេះ»។
ចៅក្រមរូបនេះគូសបញ្ជាក់ថា នឹងពិចារណានូវគ្រប់ទិដ្ឋភាពទាំងអស់ ដើម្បីអាចមានលទ្ធភាពបន្តសវនាការឡើងវិញនាពេលវេលាសមស្របខាងមុខនេះ ដើម្បីធានានូវសិទ្ធិនិងផលប្រយោជន៍របស់ភាគីពាក់ព័ន្ធស្របតាមនីតិវិធីច្បាប់។
សហមេធាវី លោក ចាន់ ចេន និយាយថា ការបន្តលើកពេលសវនាការកូនក្តីដោយមិនកំណត់ពេល នឹងបន្តរំលោភបំពានលើសិទ្ធិកូនក្តីរបស់លោកក្នុងការទទួលបានការជំនុំជម្រះឆាប់រហ័ស និងយុត្តិធម៌ស្របតាមរដ្ឋធម្មនុញ្ញកម្ពុជា និងច្បាប់អន្តរជាតិ។
លោក ចាន់ ចេន ប្រាប់ថា៖ «ជាការយល់ឃើញរបស់ខ្ញុំ ការដែលពន្យារពេលសវនាការម្តងហើយម្តងទៀត ហើយពន្យារពេលអត់កំណត់ហ្នឹង វាធ្វើឱ្យប៉ះពាល់ដល់សិទ្ធិកូនក្តីខ្ញុំដែលមានចែងក្នុងកតិកាសញ្ញាដែលជាច្បាប់អន្តរជាតិ ដែលចែងថា ជនជាប់ចោទត្រូវទទួលបានការជំនុំជម្រះដោយឆាប់រហ័សនិងយុត្តិធម៌»។
បើតាមការចុះផ្សាយរបស់កាសែត ខ្មែរ ថែមស៍ កាលពីខែឧសភាឆ្នាំមុន លោកនាយករដ្ឋមន្ត្រី ហ៊ុន សែន បានថ្លែងក្នុងកិច្ចប្រជុំមួយនៅទីស្តីការគណៈរដ្ឋមន្ត្រីថា សំណុំរឿងលោក កឹម សុខា អាចពន្យារពេលដល់ឆ្នាំ២០២៤ ក្រោយពីតុលាការផ្អាកសវនាការសំណុំរឿងនេះ។
នាយករងអង្គការឃ្លាំមើលសិទ្ធិមនុស្សអង្គការលីកាដូ លោក អំ សំអាត ប្រាប់ថា ហេតុផលលើកឡើងដោយតុលាការបានដើរផ្ទុយគ្នាទៅនឹងការអនុវត្តជាក់ស្ដែងរយៈពេលប៉ុន្មានខែថ្មីៗនេះ ដែលលោកសំដៅទៅដល់ដំណើរការសវនាការជំនុំជម្រះសំណុំរឿងខ្លះដែលមានជនជាប់ចោទដល់ទៅ៦០នាក់ឬលើសពីនេះទៅទៀត។
លោក អំ សំអាត ប្រាប់ថា៖ «បើសិនជាយើងនិយាយថាទាក់ទិនកូវីដ១៩ រឿងខ្លះមានជនត្រូវចោទដល់ទៅ៥០ទៅ៦០នាក់ ម៉េចក៏យើងធ្វើបាន ធំៗដែរ! អ៊ីចឹងហេតុផលទាក់ទងនឹងឯកឧត្តម កឹម សុខា នេះ ត្រូវបានគេចាត់ទុកថាជារឿងនយោបាយមួយដ៏ធំដែរ»។
កាលពីចុងឆ្នាំមុន កម្ពុជាបានប្រកាសឱ្យស្ថាប័នជាតិដំណើរការជាប្រក្រតីឡើងវិញ ក្រោយពីប្រកាសថា បានទប់ស្កាត់កូវីដ១៩ចម្លងចូលសហគមន៍បានដោយជោគជ័យ ដែលរដ្ឋាភិបាលហៅថា «ព្រឹត្តិការណ៍២៨វិច្ឆិកា»។
បើតាមសេចក្ដីប្រកាសព័ត៌មានរបស់ក្រសួងសុខាភិបាលនៅថ្ងៃនេះ កម្ពុជាមិនទាន់មានអ្នកស្លាប់ដោយសារកូវីដ១៩ទេ បើទោះបីកម្ពុជារកឃើញអ្នកឆ្លង៤៦៧នាក់ហើយក្ដីចាប់ពីដើមឆ្នាំ២០២០មក ដោយព្យាបាលជាសះស្បើយ៤៥១នាក់ និង១៦នាក់ទៀតកំពុងសម្រាកព្យាបាល។
លោក កឹម សុខា ត្រូវបានតុលាការដកហូតសិទ្ធិធ្វើនយោបាយជាង៣ឆ្នាំមកហើយគិតចាប់ពីថ្ងៃដែលសមត្ថកិច្ចចាប់ខ្លួនលោកកាលពីអំឡុងខែកញ្ញា ឆ្នាំ២០១៧ ក្រោមបទចោទថា គប់គិតជាមួយបរទេសចង់ផ្តួលរំលំរដ្ឋាភិបាល។
កាលពីចុងខែកញ្ញាឆ្នាំមុន អ្នកជំនាញសិទ្ធិមនុស្សអង្គការសហប្រជាជាតិ អ្នកស្រី រ៉ូណា ស្មីត បានចាត់ទុកសំណុំរឿងចោទប្រកាន់លើលោក កឹម សុខា ជារឿងនយោបាយ ដែលក្លាយទៅជាគំរូអាក្រក់មួយឆ្លុះបញ្ចាំងពីការអនុវត្តច្បាប់មិនត្រឹមត្រូវទៅលើគូប្រជែងនយោបាយ៕