មន្ត្រីជាន់ខ្ពស់ក្រសួងមុខងារសាធារណៈ បានលើកឡើងថា ការដែលក្រសួងមួយនេះសុំផ្លាស់ប្តូរទៅកាន់ទីតាំងថ្មីនៅលើផ្ទៃដីបឹងតាមោកនោះ ដោយសារតែទីតាំងចាស់មានទីធ្លាតូចចង្អៀត និងដើម្បីពង្រឹងប្រសិទ្ធការងារ។
កាលពីថ្ងៃទី២៨ ខែមករា ឆ្នាំ២០២១ រដ្ឋាភិបាលបានចេញសេចក្តីជូនដំណឹងមួយ ដោយអនុញ្ញាតឱ្យកាត់ដីទំហំ ៤ហិកតា នៅបឹងតាមោក ស្ថិតនៅខណ្ឌព្រែកព្នៅ រាជធានីភ្នំពេញ ទៅឱ្យក្រសួងមុខងារសាធារណៈ ដើម្បីសាងសង់អគារទីស្តីការក្រសួងថ្មី។
អ្នកនាំពាក្យក្រសួងមុខងារសាធារណៈ លោក យក់ ប៊ុនណា មានប្រសាសន៍នៅថ្ងៃទី០៤ ខែកុម្ភៈនេះថា ទីតាំងក្រសួងបច្ចុប្បន្ន មានលក្ខណៈតូចចង្អៀត និងពិបាកធ្វើបំពេញការងារ។
លោក យក់ ប៊ុនណា បន្តថា៖ «បច្ចុប្បន្នការងាររបស់ក្រសួងមុខងារសាធារណៈ វាមានទំហំធំទៅៗ ដោយសារកិច្ចការដែលយើងត្រូវធ្វើផ្នែកសេវាសាធារណៈ ផ្នែកគ្រប់គ្រងស្ត្រី ការកសាងកន្លែងសម្រាប់មន្ត្រីសាធារណៈ ត្រូវការកន្លែងដែលធំទូលាយជាងមុន និងមានសុវត្ថិភាពជាងមុន អីចឹងត្រូវគិតគូរពីការរៀបចំហេដ្ឋារចនាសម្ព័ន្ធថ្មី ដើម្បីគាំទ្រអភិវឌ្ឍន៍មុខងារ»។
ចំពោះទីតាំងទីស្តីការក្រសួងមុខងារសាធារណៈបច្ចុប្បន្ន ដែលស្ថិតនៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញនោះ លោក យក់ ប៊ុនណា ពុំបានដឹងថាតើរដ្ឋាភិបាល នឹងយកទុកសម្រាប់ប្រើប្រាស់ធ្វើអ្វីបន្តទៀតនោះទេ។
កាលពីឆ្នាំ២០១៦ រដ្ឋាភិបាលកម្ពុជា បានចេញអនុក្រឹត្យមួយ ស្ដីពីការកំណត់ផ្ទៃបឹងតាមោក ជាសម្បតិ្តរបស់រដ្ឋ ដែលមានផ្ទៃដីសរុបប្រមាណ ៣ ២៣៩ហិកតា សម្រាប់ស្តុកទឹកកខ្វក់ និងរំដោះទឹកចេញពីរាជធានីភ្នំពេញ។
ក្រោយមកចាប់តាំងពីឆ្នាំ២០១៨ ដល់ឆ្នាំ២០២០ រដ្ឋាភិបាលបានសម្រេចកាត់ផ្ទៃបឹងតាមោកសរុបជាង ៥៨០ហិកតា ទៅឱ្យស្ថាប័នរដ្ឋមួយចំនួន ដូចជា ក្រសួងយុត្តិធម៌ ក្រសួងការពារជាតិ សាលារាជធានីភ្នំពេញ សាលាដំបូងរាជធានីភ្នំពេញ សាលាឧទ្ធរណ៍ និងក្រុមហ៊ុនឯកជន សម្រាប់សាងសង់អគារ និងហេដ្ឋារចនាសម្ព័ន្ធផ្សេងៗជាដើម។
កាលពីថ្ងៃទី២២ ខែមករា ឆ្នាំ២០២១ លោកនាយករដ្ឋមន្រ្តី ហ៊ុន សែន បានលើកឡើងថា រដ្ឋាភិបាល នៅបន្តកាត់ដីនៅបឹងតាមោក ដោយមិនខ្វល់ចំពោះការរិះគន់ដដែលៗជុំវិញការកាត់បឹងនេះទេ។ លោកបានបញ្ជាក់ថា ការសម្រេចកាត់ដីបឹងនោះ ធ្វើឡើងដើម្បីបម្រើផលប្រយោជន៍រួម ខណៈដីខ្លះទៀតជាដីស្រែប្រាំងដែលជាកម្មសិទ្ធិរបស់ពលរដ្ឋរួចទៅហើយ។
កន្លងមក មន្ត្រីសង្គមស៊ីវិល និងសាធារណជនមួយចំនួន តែងតែនិយាយរិះគន់រដ្ឋាភិបាល ជុំវិញការចេញអនុក្រឹត្យលុបផ្ទៃបឹងតាមោក ឬបឹងកប់ស្រូវ នៅខណ្ឌព្រែកព្នៅ រាជធានីភ្នំពេញ និងបឹងផ្សេងទៀត ទៅឱ្យស្ថាប័នរដ្ឋ ក្រុមហ៊ុនឯកជន សម្រាប់សាងសង់អគារ និងហេដ្ឋារចនាសម្ព័ន្ធផ្សេងៗ ដោយថា ការលុបបឹងទាំងនេះ នឹងធ្វើឱ្យការបាត់អាងស្តុកទឹកដ៏សំខាន់សម្រាប់រាជធានីភ្នំពេញ៕