មន្រ្តីទូតកម្ពុជាប្រចាំប្រទេសម៉ាឡេស៊ី បានអន្តរាគមន៍ជួយនាំយកពលករខុសច្បាប់១៥នាក់ និង កុមារខ្មែរ២នាក់ឱ្យវិលត្រលប់មកមាតុភូមិវិញ។
ស្ថានទូតកម្ពុជាប្រចាំប្រទេសម៉ាឡេស៊ីបានបង្ហោះលើទំព័រហ្វេសប៊ុករបស់ខ្លួនថាដោយសារ តែមានការជួយពីស្ថានទូត ពលករខ្មែរខុសច្បាប់ទាំងជាង១០នាក់ និងកុមារ២នាក់ ដែលចេញ ទៅម៉ាឡេស៊ីតាមឪពុកម្តាយដែលជាពលករនោះបានត្រលប់មកដល់កម្ពុជាវិញហើយកាលពីល្ងាចម្សិលមិញ។
អ្នកនាំពាក្យក្រសួងការបរទេស លោក កុយ គួង បានឱ្យដឹងថាដោយសារតែពលករទាំងនោះ ពុំមានការងារធ្វើ ម្យ៉ាងសុទ្ធតែខុសច្បាប់ ហើយប្រសិន បើបន្តរស់នៅទីនោះទៀតនឹងប្រឈម មុខក្នុងការចាប់ខ្លួន និងការបង់ពិន័យធ្ងន់ធ្ងរ ទើបស្ថានទូតកម្ពុជាបានសហការជាអាជ្ញាធរ ម៉ាឡេស៊ីជួយសម្រួលឱ្យពួកគេបានត្រលប់មកកម្ពុជាវិញ។
លោកបន្តថាពលករទាំងនោះមិនមែនជាជនរងគ្រោះអ្វីឡើយ គ្រាន់តែមានទំលាប់ ទៅការងារធ្វើដោយខុសច្បាប់ ខណៈលោកថាបញ្ហានេះបានកើតមានឡើងជាយូរហើយ។
អ្នកនាំពាក្យរូបនេះ និយាយទៀតថា ពលករទាំងនោះ ជាអ្នកទៅរកការងារធ្វើដោយខ្លួនឯង តាមមិត្តភក្ដិ និងទៅតាមមេខ្យល់ ខណៈពួកគេមានខ្លះធ្វើការយូរឆ្នាំ និងខ្លះទៀត ទើបតែធ្វើការបាន ២ ទៅ៣ ឆ្នាំប៉ុណ្ណោះ។
លោក បន្ថែមទៀតថា ក្នុងប្រទេសម៉ាឡេស៊ី ការងារដែលពលករទាំងនោះធ្វើ រួមមាន ការធ្វើការរោងចក្រ កម្មករសំណង់ កម្មករនៅតាមចំការ កាត់ដេរតាមផ្ទះ និងធ្វើជាអ្នកលក់ការរ៉េមតាមម៉ូតូជាដើម។
សម្រាប់កុមារទាំង២នាក់ លោក កុយ គួង បញ្ជាក់ថាពូកគេម្នាក់ជាកុមារា១១ឆ្នាំ និងម្នាក់ទៀតជាកុមារីអាយុ១ឆ្នាំ៨ខែ ដែលពួកគេសុទ្ធតែទៅតាមឪពុកម្តាយដែលជាពលករ។ លោកឱ្យដឹងទៀតថាកុមារាអាយុ១១ឆ្នាំនោះមិនបានចូលរៀនទេ ដោយសារតែទៅរស់ម៉ាឡេស៊ីដោយខុសច្បាប់ជាមួយឪពុកម្តាយរបស់ខ្លួន៕