ជនជាប់ចោទក្នុងសំណុំរឿងព្រំដែន លោក រ៉ុង ឈុន បាននិយាយក្នុងសវនាការនៅថ្ងៃនេះថា សេចក្ដីថ្លែងការណ៍របស់លោកជុំវិញបញ្ហាព្រំដែនដែលនាំឱ្យឈានដល់ការចោទប្រកាន់នៅតុលាការនេះ មិនបានធ្វើឱ្យប៉ះពាល់កេរ្តិ៍ឈ្មោះរបស់លោកនាយករដ្ឋមន្រ្តី ហ៊ុន សែន នោះទេ ប៉ុន្តែថា ការចាប់ឃុំខ្លួនលោកទៅវិញទេដែលធ្វើឱ្យប៉ះពាល់ដល់កេរ្តិ៍ឈ្មោះប្រមុខរដ្ឋាភិបាល។
សាលាដំបូងរាជធានីភ្នំពេញ នៅថ្ងៃនេះ បានបន្តបើកសវនាការសំណុំរឿងរបស់តំណាងក្រុមប្រឹក្សាឃ្លាំមើលកម្ពុជា លោក រ៉ុង ឈុន, កញ្ញា ស កនិ្នកា សមាជិកយុវជនខ្មែរថាវរៈ និងលោក តុន និមល ជាអ្នករត់ម៉ូតូកង់បី ក្រោមបទចោទប្រកាន់ «ញុះញង់បង្កឱ្យមានភាពវឹកវរធ្ងន់ធ្ងរដល់សង្គម»។
ក្នុងសវនាការ មេធាវីការពារឱ្យរដ្ឋាភិបាល លោក ឈិន បូរ៉ាវុធ បានសួរទៅលោក រ៉ុង ឈុន ថាហេតុអ្វីបានជាលោកចេញសេចក្ដីថ្លែងការណ៍ពាក់ព័ន្ធនឹងរឿងព្រំដែន ខណៈដែលលោកចុះទៅទីនោះក្នុងគោលបំណងជួយអន្តរាគមន៍ឱ្យមានដំណោះស្រាយរឿងដីធ្លី។
ពាក់ខោអាវអ្នកទោស ឈរក្នុងរង្វង់ក្រចកសេះ លោក រ៉ុង ឈុន ប្រាប់ទៅមេធាវីថា ការចុះទៅខេត្តត្បូងឃ្មុំនោះ លោកគ្មានគោលបំណងទៅមើលឬនិយាយរឿងព្រំដែនទេ ប៉ុន្តែបើតាមពលរដ្ឋអះអាងប្រាប់លោកថា ដើមចមនៃវិវាទដីធ្លីរបស់ពួកគាត់ពាក់ព័ន្ធនឹងការបោះបង្គោលព្រំដែនរវាងកម្ពុជានិងវៀតណាម ដែលធ្វើឱ្យបាត់បង់ដីធ្លី ហើយប៉ះពាល់ជីវភាពរស់នៅរបស់ពួកគាត់។
មេធាវីដែលចោទសួរ បានចាត់ទុកការចេញសេចក្ដីថ្លែងការណ៍នៅថ្ងៃទី២០ ខែកក្កដា ឆ្នាំ២០២០ ថាបានធ្វើឱ្យប៉ះពាល់កេរ្តិ៍ឈ្មោះរដ្ឋាភិបាល។
ប៉ុន្តែលោក រ៉ុង ឈុន ថាការចេញសេចក្ដីថ្លែងការណ៍របស់គាត់មិនធ្វើឱ្យប៉ះពាល់កេរ្តិ៍ឈ្មោះរដ្ឋាភិបាលនោះទេ ប៉ុន្តែលោកថា ការចាប់ឃុំខ្លួនលោកទៅវិញទេដែលធ្វើឱ្យប៉ះពាល់ដល់កេរ្តិ៍ឈ្មោះរដ្ឋាភិបាលនោះ។
លោក រ៉ុង ឈុន បាននិយាយថា៖ «ខ្ញុំជួយពលរដ្ឋមិនមែនផលប្រយោជន៍ រ៉ុង ឈុន ទេ! ហើយតាមរយៈការចេញសេចក្ដីថ្លែងការណ៍មិនបានប៉ះពាល់កេរ្តិ៍ឈ្មោះនាយករដ្ឋមន្ត្រីទេ ប៉ុន្តែអស់លោកដែលចាប់ខ្លួនខ្ញុំទៅវិញទេ ធ្វើឱ្យប៉ះពាល់ដល់កេរ្តិ៍ឈ្មោះនាយករដ្ឋមន្ត្រី»។
បន្ទាប់ពីបញ្ចប់ការសាកសួរលោក រ៉ុង ឈុន រួច ប្រធានចៅក្រមជំនុំជម្រះ បានឱ្យឆ្មាំពន្ធនាគារនាំខ្លួនកញ្ញា ស កនិ្នកា ចូលក្នុងសវនាការដើម្បីសាកសួរបន្ត។
អំឡុងពេលសវនាការនោះ ចៅក្រមក៏បានប៉ះពាក្យសម្ដីគ្នាជាមួយមេធាវី លោក ជួង ជូងី ដែលការពារក្ដីឱ្យកញ្ញា ស កនិ្នកា ខណៈដែលចៅក្រមបង្ហាញឯកសារភស្តុតាង តែត្រូវលោកមេធាវី ជួង ជូងី និយាយកាត់និងបានទះតុ។
លោកចៅក្រមបានចាត់ទុកសកម្មភាពឡើងនិយាយកាត់និងទះតុរបស់មេធាវី ថាជាការមើលងាយលោកដែលជាចៅក្រម។
លោកចៅក្រម លិ សុខា បានថ្លែងថា៖ «លោកមើលខ្ញុំផង! ខ្ញុំជាអ្នកដឹកនាំ [សវនាការ] លោកមើលងាយខ្ញុំមែនទេ»។
ក្រោយពីមានការប៉ះពាល់ពាក្យសម្ដីនោះ តំណាងអយ្យការ លោក សេង ហៀង បានឡើងកាត់ដោយឱ្យលោកមេធាវី ជួង ជូងី រក្សាក្រមសីលធម៌ បើមិនដូច្នោះទេ លោកនឹងស្នើចៅក្រមឱ្យលោកមេធាវី ជួង ជូងី ចេញក្រៅបន្ទប់សវនាការ។
លោក សេង ហៀង បាននិយាយថា៖ «សូមលោកមេធាវីរក្សាក្រមសីលធម៌ […] បើមិនអ៊ីចឹងទេ ខ្ញុំស្នើសុំលោកប្រធានក្រុមប្រឹក្សា ឱ្យលោកមេធាវីចេញក្រៅបន្ទប់សវនាការ»។
យ៉ាងណាក៏ដោយ បន្ទាប់ពីប៉ះពាក្យសម្ដីគ្នា ចៅក្រម តំណាងអយ្យការ និងមេធាវីរដ្ឋាភិបាល ក៏បានបន្តសួរទៅកញ្ញា ស កន្និកា និងលោក តុន និមល ពាក់ព័ន្ធនឹងគោលបំណងនៃការបង្កើត«សមាគមកម្មករសេដ្ឋកិច្ចក្រៅប្រព័ន្ធដើម្បីសង្គម» ហើយឈ្មោះអ្នកចូលរួមនិងការបង្កើតក្រុមឆាតក្នុងហ្វេសប៊ុកនិងតេឡេក្រាមក្នុងគោលបំណងអ្វី ហើយមានជជែកពីសេចក្ដីថ្លែងការណ៍និងការចាប់ខ្លួនលោក រ៉ុង ឈុន។
ក្រៅពីសួរសំណួរខាងលើនេះ ចៅក្រមក៏បានសួរអំពីការចូលរួមតវ៉ាទាមទារឱ្យមានការដោះលែង លោក រ៉ុង ឈុន ផងដែរ។
កញ្ញា ស កន្និកា រៀបរាប់ថា ការបង្កើតសមាគមនេះធ្វើឡើងក្នុងគោលបំណងជួយដល់សង្គមប៉ុណ្ណោះ ខណៈសមាគមនេះមិនទាន់ចេញជារូបរាង និងមិនទាន់រៀបចំរចនាសម្ព័ន្ធគ្រប់គ្រងនៅឡើយ។
កញ្ញាថា ការបង្កើតក្រុមឆាតក្នុងហ្វេសប៊ុកនិងតេឡេក្រាមដែលបង្កើតនេះ មិនបានជជែកអំពីការចាប់ខ្លួនលោក រ៉ុង ឈុន ហើយក៏មិនបានចែករំលែកសេចក្តីថ្លែងការណ៍ចូលក្នុងក្រុមនេះដែរ។
ចំណែកលោក តុន និមល បានឆ្លើយថា លោកមិនបានដឹងពីការបង្កើតក្រុមឆាតក្នុងហ្វេសប៊ុក និងតេឡេក្រាមនេះទេ។
កញ្ញា កន្និកា និងលោក តុន និមល បញ្ជាក់ថា មូលហេតុដែលពួកគេចូលរួមតវ៉ាទាមទារឱ្យដោះលែងលោក រ៉ុង ឈុន នោះ ដោយសារតែពួកគេយល់ថា ការចាប់ខ្លួននោះជារឿងអយុត្តិធម៌ ខណៈអ្នកទាំងពីរជាអ្នកគាំទ្រនិងបានចាត់ទុកលោកអាយដល (Idol)។
កញ្ញា កន្និកា និងលោក តុន និមល បន្តថា សកម្មភាពលោក រ៉ុង ឈុន កន្លងមក ពួកគាត់មើលឃើញថាមិនបានធ្វើខុសច្បាប់នោះទេ ព្រោះលោក រ៉ុង ឈុន បានជួយពលរដ្ឋរងគ្រោះដីធ្លីនិងកម្មករច្រើន ហើយថា ការឈឺឆ្អាលរឿងព្រំដែនក៏មិនមានអ្វីខុសច្បាប់នោះដែរ។
ក្រោយពីដេញដោលពេញមួយព្រឹក ចៅក្រមជំនុំជម្រះ លោក លិ សុខា បានសម្រេចផ្អាកសវនាការ ដោយនឹងបន្តនៅថ្ងៃទី១៧ ខែកុម្ភៈ ឆ្នាំ២០២១នេះ។
សហមេធាវីការពារក្ដីមួយរូបក្នុងចំណោម៣រូបផ្សេងទៀតដែលការពារក្ដីឱ្យលោក រ៉ុង ឈុន កញ្ញា ស កន្និកា និងលោក តុន និមល គឺលោក សំ សុគង់ សង្កេតឃើញថា ការសួរនាំរបស់ចៅក្រមហាក់មានភាពលម្អៀង ដោយចាត់ទុកកូនក្ដីរបស់លោកថាមានទោសរួចទៅហើយ ដោយសារ សំណួរដែលសួរភាគច្រើនជាសំណួរដាក់បន្ទុកកូនក្ដីរបស់លោក។
លោកថា៖ «ភាគច្រើនគាត់សួរទៅហាក់ដូចជាគាត់ដឹងថា អ្វីដែលកូនក្ដីយើងបានធ្វើគឺខុសបាត់ទៅហើយ គឺគាត់ចង់ទាញទៅខុស។ វាខុសពីក្រមសីលធម៌ ក៏ដូចជាច្បាប់ហ្នឹង គឺតម្រូវឱ្យចៅក្រមជំនុំជម្រះជាចៅក្រមមួយឯករាជ្យ ហើយគាត់នៅជាអាជ្ញាកណ្ដាល ហើយគាត់សួរទាំងដោះផងនិងដាក់បន្ទុកផង ដើម្បីស្វែងរកការពិត»។
លោក រ៉ុង ឈុន ត្រូវសមត្ថកិច្ចចាប់ខ្លួននៅគេហដ្ឋានរបស់លោកនៅរាជធានីភ្នំពេញ កាលពីថ្ងៃទី៣១ ខែកក្កដា ឆ្នាំ២០២០ ក្រោយពីលោកបានបង្ហោះសារលើបណ្តាញសង្គមហ្វេសប៊ុក ពាក់ព័ន្ធនឹងការបោះបង្គោលព្រំដែនរវាងកម្ពុជាជាមួយវៀតណាម។
ចំណែកកញ្ញា ស កន្និកា ត្រូវសមត្ថកិច្ចចាប់ខ្លួនកាលពីថ្ងៃទី៧ ខែសីហា ឆ្នាំ២០២០ ខណៈ លោក តុន និមល ត្រូវបានសមត្ថកិច្ចចាប់ខ្លួនបន្ទាប់ពីលោកបានទៅតវ៉ានៅមុខស្ថានទូតចិនកាលពីថ្ងៃទី២៣ ខែតុលា ឆ្នាំ២០២០។
អ្នកជំនាញសិទ្ធិមនុស្សអង្គការសហប្រជាជាតិ លោកស្រី រ៉ូណា ស្មីត (Rhona Smith) កាលពីខែសីហា ឆ្នាំ២០២០ បានស្នើឱ្យរដ្ឋាភិបាលកម្ពុជាបង្ហាញមូលដ្ឋានច្បាប់លើរបៀបនៃការចាប់ និងឃុំខ្លួន លោក រ៉ុង ឈុន ថាតើស្របតាមបទដ្ឋានសិទ្ធិមនុស្សអន្តរជាតិទាក់ទងនឹងសិទ្ធិសេរីភាពក្នុងការបញ្ចេញមតិ និងសិទ្ធិចូលរួមក្នុងកិច្ចការសាធារណៈដែរឬយ៉ាងណា៕
