តុលាការកំពូល គ្រោងប្រកាសសាលដីកាលើសំណុំរឿងសុំនៅក្រៅឃុំរបស់សកម្មជនបរិស្ថានចំនួន៣នាក់នៅដើមសប្តាហ៍ក្រោយ ក្រោយពីបើកសវនាការអសាធារណៈលើសំណុំរឿងនេះ នៅថ្ងៃទី១ ខែកុម្ភៈនេះ។
កាលពីថ្ងៃទី៣ ខែកញ្ញា ឆ្នាំ២០២០ តុលាការសាលាដំបូងរាជធានីភ្នំពេញ បានសម្រេចឃុំខ្លួនសកម្មជនបរិស្ថានបីរូប រួមមាន កញ្ញា ឡុង គន្ធា កញ្ញា ភួន កែវរស្មី និងលោក ថុន រដ្ឋា ក្រោមបទចោទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» បន្ទាប់ពីពួកគេបានប្រកាសធ្វើយុទ្ធនាការដើរថ្មើរជើងពីវត្តភ្នំ ទៅកាន់ផ្ទះលោកនាយករដ្ឋមន្ត្រី ហ៊ុន សែន ដើម្បីដាក់ញត្តិសុំឱ្យបញ្ឈប់ការលុបបឹងតាមោក។
នាយករងអង្គការការពារសិទ្ធិមនុស្សលីកាដូ លោក អំ សំអាត ដែលឃ្លាំមើលករណីនេះ មានប្រសាសន៍ថា នៅថ្ងៃទី១ ខែកុម្ភៈ ឆ្នាំ២០២១នេះ តុលាការកំពូលបានបើកសវនាការអសាធារណៈមួយទៅលើនីតិវិធីសុំនៅក្រៅឃុំរបស់សកម្មជនបរិស្ថានទាំង៣រូបនេះ។
លោក អំ សំអាត បន្តថា កន្លងមក សកម្មជនបរិស្ថានទាំងបីនាក់ និងមេធាវី ធ្លាប់ប្តឹងជំទាស់នឹងសេចក្តីសម្រេចមិនអនុញ្ញាតឱ្យនៅក្រៅឃុំរបស់ចៅក្រមស៊ើបសួរនៃសាលាដំបូងរាជធានីភ្នំពេញ ទៅតុលាការសាលាឧទ្ធរណ៍ ប៉ុន្តែសាលាឧទ្ធរណ៍បានតម្កល់សេចក្តីសម្រេចរបស់សាលាដំបូងរាជធានីភ្នំពេញទៀត ទើបពួកគេសម្រេចប្តឹងសាទុក្ខទៅតុលាការកំពូល។
មន្ត្រីសិទ្ធិមនុស្សរូបនេះឱ្យដឹងទៀតថា បើតាមរយៈមេធាវី គឺនៅក្នុងសវនាការនៅថ្ងៃនេះ សកម្មជនបរិស្ថានទាំង៣នាក់នោះបានស្នើសុំទៅចៅក្រមអនុញ្ញាតឱ្យពួកគេនៅក្រៅឃុំ ដោយសម្អាងថា ខ្លួនមានអាសយដ្ឋានច្បាស់លាស់ មានការធានាពីក្រុមគ្រួសារត្រឹមត្រូវ មានការធានាពីការចូលរួមគ្រប់ដំណាក់កាលនៃនីតិវិធីរបស់តុលាការ និងមានភារកិច្ចក្នុងការចិញ្ចឹមបីបាច់គ្រួសារផងដែរ ប៉ុន្តែត្រូវតុលាការកំពូលលើកពេលប្រកាសសាលដីកា នៅថ្ងៃទី៨ ខែកុម្ភៈ ឆ្នាំ២០២១ ខាងមុខនេះ។
លោកបន្ថែមថា៖ «ចំពោះការចាប់ខ្លួនសកម្មជនបរិស្ថានទាំងអស់នេះ គឺមិនថាអង្គការសិទ្ធិមនុស្សជាតិឬអន្តរជាតិទេ សូម្បីតែអ្នករាយការណ៍ពិសេសរបស់ក្រុមប្រឹក្សាសិទ្ធិមនុស្ស ក៏គេចាត់ទុកថា ការចាប់និងឃុំខ្លួនហ្នឹងជាការរំលោភបំពានទៅលើសិទ្ធិដែលជាសិទ្ធិមូលដ្ឋានរបស់ពួកគាត់ដែរ ដោយពួកគាត់គ្រាន់តែបំពេញការងារក្នុងការងារបរិស្ថានសម្រាប់ជួយសង្គមសោះ។ អ៊ីចឹងខ្ញុំគិតថា ពួកគាត់គួរតែត្រូវបានអនុញ្ញាតឱ្យនៅក្រៅឃុំបណ្តោះអាសន្ន»។
បើតាមលោក អំ សំអាត សាលាដំបូងរាជធានីភ្នំពេញ គ្រោងនឹងចាប់ផ្តើមបើកសវនាការអង្គសេចក្តីលើសំណុំរឿងរបស់សកម្មជនបរិស្ថានទាំង៣នាក់ នៅថ្ងៃទី២៤ ខែកុម្ភៈ ឆ្នាំ២០២១នេះ៕
