តុលាការសាលាដំបូងរាជធានីភ្នំពេញ បានសម្រេចឃុំខ្លួននាយកគ្រប់គ្រងទូទៅនៃក្រុមហ៊ុន ហ្គោលវែល ជាបណ្តោះអាសន្ននៅពន្ធនាគារ ដោយចោទប្រកាន់ពីបទ «រំលោភលើសេចក្តីទុកចិត្តពិសេសដោយអភិបាល»។
កាលពីថ្ងៃទី២៧ ខែមករា ឆ្នាំ២០២១ កម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃ បានចាប់ឃាត់ខ្លួនបុរសឈ្មោះ ស៊ិន ដាវុធ អាយុ៤៦ឆ្នាំ រស់នៅខណ្ឌឫស្សីកែវ រាជធានីភ្នំពេញ និងបានបញ្ជូនខ្លួនទៅសាលាដំបូងរាជធានីភ្នំពេញ ក្រោយពីមានបណ្តឹងរបស់ជនជាតិចិន៣នាក់បានប្តឹងបុរសរូបនោះ ថាបានស៊ីដាច់លុយរត់ការច្បាប់ឱ្យពួកគេចូលសញ្ជាតិកម្ពុជា ចំនួន៧៦ម៉ឺនដុល្លារ។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន មានប្រសាសន៍នៅថ្ងៃទី២៨ ខែមករា ឆ្នាំ២០២១ ថា ក្រោយការសាកសួរចប់ ចៅក្រមស៊ើបសួរសាលាដំបូង បានសម្រេចឃុំខ្លួនជនសង្ស័យឈ្មោះ ស៊ិន ដាវុធ ដាក់ពន្ធនាគារបណ្តោះអាសន្ន ដោយចោទប្រកាន់ពីបទ «រំលោភលើសេចក្តីទុកចិត្តពិសេសដោយអភិបាល» ពាក់ព័ន្ធនឹងការត់ការចូលសញ្ជាតិខ្មែរឱ្យជនបរទេស៕
