រដ្ឋាភិបាលព្យាករថា ក្រោយពីស្ថានភាពកូវីដ១៩ធូរស្រាលនៅឆ្នាំ២០២១នេះ សេដ្ឋកិច្ចប្រទេសកម្ពុជានឹងកើនឡើង៤% បើធៀបនឹងឆ្នាំមុន។
ក្នុងវេទិកាសាធារណៈស្តីពី «ការគ្រប់គ្រងម៉ាក្រូសេដ្ឋកិច្ច និងច្បាប់ថវិកា ឆ្នាំ២០២១» នាព្រឹកថ្ងៃនេះ រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត បានថ្លែងថា អំឡុងពេលស្ថានភាពកូវីដ១៩ ធ្វើឱ្យសេដ្ឋកិច្ចនៅលើសកលលោកធ្លាក់ចុះជាបន្តបន្ទាប់ ក្នុងនោះកម្ពុជាក៏ជួបបញ្ហាប្រឈមនឹងសេដ្ឋកិច្ចនេះផងដែរ ប៉ុន្តែស្ថិតនៅកម្រិតទាបតែប៉ុណ្ណោះ មិនមានអ្វីគួរឱ្យព្រួយបារម្ភនោះទេ។
នៅក្នុងរបាយការណ៍របស់ក្រសួងសេដ្ឋកិច្ច និងហិរញ្ញវត្ថុ បានឱ្យដឹងនៅថ្ងៃនេះថា ក្នុងឆ្នាំ២០២០ កំណើនសេដ្ឋកិច្ចកម្ពុជាធ្លាក់ចុះមកត្រឹម -៣,១% បើធៀបនឹងឆ្នាំ២០១៩ កំណើនសេដ្ឋកិច្ចមានចំនួន ៧,១%។
ទោះជាបែបនេះក្តី លោក វិស្សុត អះអាងថា នៅឆ្នាំ២០២១នេះ សេដ្ឋកិច្ចកម្ពុជានឹងងើបឡើងវិញក្នុងអត្រាកំណើនទាប ពោលគឺ ៤% បើធៀបនឹងឆ្នាំ២០២០ ដោយសារវិធានការរដ្ឋាភិបាលរឹងមាំក្នុងការទប់ស្កាត់កូវីដ១៩ ទទួលបានផលវិជ្ជមាន។
លោកថ្លែងដូច្នេះថា៖ «កំណើនសេដ្ឋកិច្ចយើងកើនឡើង ៤% មិនជាអាក្រក់ណាស់ទេ។ យើងងើបពី -៣,១% មកវិញ ទៅជាវិជ្ជមានទាំងអស់ កន្លែងដែលអវិជ្ជមានងើបឡើងវិញទាំងអស់»។
លោកបានបន្ថែមថា កំណើនសេដ្ឋកិច្ចកើនឡើងដោយសារកម្ពុជាមានសុវត្ថិភាពសុខភាពសង្គមដោយទប់ស្កាត់ទាន់ពេលវេលានូវការរីករាលដាលនៃជំងឺកូវីដ១៩ កិច្ចព្រមព្រៀងពាណិជ្ជកម្មសេរីជាមួយចិន ការគិតគូររបស់រដ្ឋាភិបាលដល់អ្នកវិនិយោគក្នុងស្រុក កំណើននៃពន្ធគយ ការចាយវាយចំគោលដៅនិងបទបែនតាមសភាពការណ៍ និងមានច្បាប់វិនិយោគដែលនឹងចូលជាធរមានក្នុងពេលឆាប់ៗ។
អគ្គនាយកនៃអគ្គនាយកដ្ឋានគោលនយោបាយ នៃក្រសួងសេដ្ឋកិច្ច និងហរិញ្ញវត្ថុ លោក ឈាង វណ្ណារិទ្ធ ថ្លែងក្នុងវេទិកាសាធារណៈនោះថា ហានិភ័យនិងបញ្ហាប្រឈមសេដ្ឋកិច្ចកម្ពុជា ក្រោយពីការរីករាលដាលនៃជំងឺកូវីដ១៩ នាំឱ្យមានជម្លោះពាណិជ្ជកម្ម ធ្វើឱ្យមានវិបត្តិហិរញ្ញវត្ថុ ការប្រែប្រួលអាកាសធាតុ និងគ្រោះមហន្តរាយផ្សេងៗជាដើម។
យ៉ាងណាក៏ដោយ លោក វណ្ណារិទ្ធ អះអាងថា រដ្ឋាភិបាលបានរៀបចំផែនការស្តារសេដ្ឋកិច្ចឡើងវិញក្រោយវិបត្តិជំងឺកូវីដ១៩ ចាប់ពីឆ្នាំ២០២១ ដល់ឆ្នាំ២០២៣ ផ្អែកតាមអភិក្រមចំនួន៣សំខាន់ៗ រួមមាន ការរក្សាលំនឹងនិងស្តារឡើងវិញនូវសង្គម-សេដ្ឋកិច្ច ការកែទម្រង់ភាពប្រកួតប្រជែង និងការកសាងភាពធន់ប្រកបដោយចីរភាព ជាដើម។
ទីប្រឹក្សាសេដ្ឋកិច្ចជាន់ខ្ពស់របស់ក្រុមហ៊ុន Emerging Markets Consulting (EMC) លោក ង៉ែត ជូ មានប្រសាសន៍ថា នៅក្នុងឆ្នាំ២០២១នេះ បើស្ថានភាពកូវីដល្អឡើងវិញ នោះកំណើនសេដ្ឋកិច្ចនៅកម្ពុជានឹងមានការកើនឡើង ប៉ុន្តែលោកថា ពិបាកនឹងស្មានថាកើនប៉ុន្មានភាគរយ ដោយសារអ្នកវិនិយោគទាំងជាតិនិងអន្តរជាតិភាគច្រើនរងផលប៉ះពាល់ពីបញ្ហាជំងឺកូវីដ១៩ដូចគ្នា។
លោកផ្តល់ជាអនុសាសន៍ថា រដ្ឋាភិបាលត្រូវមានគោលនយោបាយសេដ្ឋកិច្ចផ្សេងទៀត ដូចជាជួយគាំទ្រដល់សហគ្រាសធុនតូចនិងមធ្យមនៅក្នុងស្រុក កែច្នៃផលិតផលក្នុងស្រុក និងរកទីផ្សារឱ្យពលរដ្ឋ ដើម្បីធ្វើឱ្យកំណើនសេដ្ឋកិច្ចទទួលបានផលវិជ្ជមានច្រើន៕