លោកនាយករដ្ឋមន្ត្រី ហ៊ុន សែន នៅថ្ងៃនេះ បានប្រកាសបន្តកាត់ប្រាក់បៀវត្សចំនួន៧ខែបន្ថែមទៀត ប្រគល់ជូនក្រសួងសុខាភិបាល ដើម្បីចូលរួមប្រយុទ្ធប្រឆាំងជំងឺកូវីដ១៩។
លោកនាយករដ្ឋមន្ត្រី ហ៊ុន សែន បានសរសេរនៅក្នុងទំព័រហ្វេសប៊ុករបស់លោក នៅថ្ងៃទី២៦ ខែមករា ឆ្នាំ២០២១នេះថា ក្នុងឆ្នាំ២០២០កន្លងមក លោកបានកាត់ប្រាក់បៀវត្សទាំងអស់ក្រោយការបង់ពន្ធលើបៀវត្សជូនរដ្ឋ រយៈពេល៧ខែ ដើម្បីជូនទៅក្រសួងសុខាភិបាលក្នុងការប្រយុទ្ធប្រឆាំងនឹងកូវីដ១៩។
លោកបន្តថា ដោយសារតែកូវីដ១៩ នៅតែបន្តកើតមាននៅទូទាំងពិភពលោក រាប់ទាំងកម្ពុជាផងនោះ លោកនឹងបន្តកាត់បៀវត្សទាំងអស់ក្រោយការបង់ពន្ធ រយៈពេល៧ខែទៀត ជូនក្រសួងសុខាភិបាល ដោយគិតចាប់ពីខែកុម្ភៈ ដល់ខែសីហា ឆ្នាំ២០២១។
លោកគូសបញ្ជាក់ថា៖ «បៀវត្សរបស់ខ្ញុំ ១០លានរៀលក្នុងមួយខែ ត្រូវបង់ពន្ធ ៩១០ ០០០រៀលក្នុងមួយខែ និងប្រគល់ជូនក្រសួងសុខាភិបាល ៩ ០៩០០ ០០០រៀលក្នុងខែ សរុប៧ខែ ចំនួន ៦៣ ៦៣៩ ០០០រៀល»។
ជាមួយគ្នានេះដែរ លោកក៏បានថ្លែងអំណរគុណដល់ថ្នាក់ដឹកនាំ និងមន្ត្រីរាជការមកពីក្រសួងស្ថាប័ននានា ទាំងស្ថាប័នស៊ីវិល និងកម្លាំងប្រដាប់អាវុធគ្រប់ប្រភេទ ដែលបានបរិច្ចាគដោយការកាត់បៀវត្សទាំងស្រុងឬមួយផ្នែក រយៈពេលខ្លីឬវែង តាមការស្ម័គ្រចិត្ត ដើម្បីជួយដល់ការងារប្រយុទ្ធប្រឆាំងកូវីដ១៩ ដែលជាការបង្ហាញឱ្យឃើញនូវសាមគ្គីភាពក្នុងខឿនការពារសុខភាពរបស់ប្រជាពលរដ្ឋ។
កាលពីថ្ងៃទី១ ខែមេសា ឆ្នាំ២០២០ លោកនាយករដ្ឋមន្ត្រី ហ៊ុន សែន បានប្រកាសបរិច្ចាគប្រាក់ខែរបស់ខ្លួនចំនួន៧ខែមកហើយ ដើម្បីប្រយុទ្ធប្រឆាំងនឹងជំងឺកូវីដ១៩ ហើយជាបន្តបន្ទាប់មន្ត្រីជាន់ខ្ពស់រាជរដ្ឋាភិបាល និងមន្ត្រីរាជការផ្សេងៗ រួមទាំងកងកម្លាំងប្រដាប់អាវុធគ្រប់ប្រភេទ ក៏បានប្រកាសបរិច្ចាគប្រាក់ខែរបស់ខ្លួនមួយចំនួន ដើម្បីចូលរួមជាមួយរដ្ឋាភិបាលផងដែរ៕