ក្រសួងសុខាភិបាល រកឃើញករណីឆ្លងជំងឺកូវីដ១៩ថ្មីចំនួន២នាក់ទៀត និងមានអ្នកជាសះស្បើយពីជំងឺនេះចំនួន៣នាក់។
សេចក្តីជូនដំណឹងរបស់ក្រសួងសុខាភិបាល នៅថ្ងៃទី២៦ ខែមករា ឆ្នាំ២០២១នេះ ឱ្យដឹងថា អ្នកឆ្លងជំងឺកូវីដ១៩ ទាំង២នាក់នោះ រួមមាន បុរសជនជាតិឥណ្ឌូនេស៊ី ធ្វើដំណើរមកពីប្រទេសឥណ្ឌូនេស៊ី មកកម្ពុជា កាលពីថ្ងៃទី១២ ខែមករា ឆ្នាំ២០២១ និងពលរដ្ឋខ្មែរម្នាក់ដែលត្រឡប់មកពីថៃក្នុងថ្ងៃដដែលនោះ។
ក្រសួងបន្តថា បច្ចុប្បន្ន ពួកគេត្រូវបានដាក់ឱ្យសម្រាកព្យាបាលនៅមជ្ឈមណ្ឌលជាតិកម្ចាត់រោគរបេង និងហង់សិន រាជធានីភ្នំពេញ និងនៅមន្ទីរពេទ្យបង្អែកខេត្តបន្ទាយមានជ័យ។
ក្រសួងសុខាភិបាលបន្តទៀតថា នៅថ្ងៃទី២៥ ខែមករា ឆ្នាំ២០២១ មានអ្នកព្យាបាលជាសះស្បើយចំនួន៣នាក់ ក្នុងនោះរួមមាន ស្ត្រីខ្មែរមកពីសហរដ្ឋអាមេរិកម្នាក់ បុរសជនជាតិឥណ្ឌូនេស៊ីម្នាក់មកពីប្រទេសឥណ្ឌូនេស៊ី និងពលករខ្មែរមកពីថៃម្នាក់។
គួរបញ្ជាក់ថា គិតមកដល់ព្រឹកថ្ងៃទី២៦ ខែមករា ឆ្នាំ២០២១ កម្ពុជាបានរកឃើញអ្នកឆ្លងជំងឺកូវីដ១៩ ឡើងដល់៤៦០នាក់ ក្នុងនោះបានព្យាបាលជាសះស្បើយចំនួន៤១២នាក់ និងកំពុងសម្រាកព្យាបាលចំនួន៤៨នាក់៕
