លោកនាយករដ្ឋមន្រ្តី ហ៊ុន សែន បានលើកឡើងថា លោកមិនខ្វាយខ្វល់នឹងការរិះគន់ដដែលៗជុំវិញការកាត់បឹងតាមោកទេ ដោយថា ការកាត់ដីនោះធ្វើឡើងដើម្បីប្រយោជន៍រួម ហើយដីខ្លះទៀតជាដីស្រែប្រាំងដែលជាកម្មសិទ្ធិរបស់ពលរដ្ឋ។
ក្នុងពិធីសម្ពោធសមិទ្ធផលថ្មីរបស់ក្រសួងសាធារណការ និងដឹកជញ្ជូន នាព្រឹកថ្ងៃសុក្រនេះ លោកនាយករដ្ឋមន្ត្រី ហ៊ុន សែន ថ្លែងថា កន្លងមកមានមន្ត្រីសង្គមស៊ីវិលនិងសាធារណជនមួយចំនួនតែងតែនិយាយរិះគន់រដ្ឋាភិបាល ជុំវិញការចេញអនុក្រឹត្យលុបផ្ទៃបឹងតាមោកឬបឹងកប់ស្រូវ នៅខណ្ឌព្រែកព្នៅ រាជធានីភ្នំពេញ ទៅឱ្យស្ថាប័នរដ្ឋនិងក្រុមហ៊ុនឯកជនសម្រាប់សាងសង់អគារនិងហេដ្ឋារចនាសម្ព័ន្ធផ្សេងៗ។
លោកនាយករដ្ឋមន្ត្រី បន្តថា ដើមចមដែលនាំឱ្យលោកសម្រេចកាត់ផ្ទៃបឹងតាមោកឱ្យទៅស្ថាប័នរដ្ឋ និងផ្នែកខ្លះទៀតឱ្យទៅក្រុមហ៊ុនឯកជនធ្វើការអភិវឌ្ឍនោះ គឺដើម្បីបម្រើផលប្រយោជន៍សាធារណៈ មិនមែនដូចការលើកឡើងរបស់អ្នករិះគន់ដែលថាធ្វើឱ្យប៉ះពាល់ដល់កន្លែងស្តុបទឹកកង្វក់និងរំដោះទឹកចេញពីភ្នំពេញនោះទេ។
លោកបន្តថា៖ «ទីក្រុងរបស់យើងមិនមែនត្រឹមតែអភិវឌ្ឍត្រឹមទីក្រុងចាស់ទេ ពង្រីកពីជាង៣០០គីឡូម៉ែត្រការ៉េ ទៅជាង៧០០គីឡូម៉ែត្រការ៉េហើយ។ អ៊ីចឹងបានជាខ្ញុំមានការធុញទ្រាន់ជាមួយនឹងការលើកឡើងច្រំដែលនៃមនុស្សមួយចំនួនដែលថាយើងលុបបឹង យើងលុបអានេះ យើងលុបអានោះ»។
ទោះជាបែបនេះក្តី លោក ហ៊ុន សែន បញ្ជាក់ថា មិនចាប់អារម្មណ៍នឹងការរិះគន់ពីមជ្ឈដ្ឋាននានានោះទេ។
លោកបានថ្លែងថា៖ «ប្រាប់ឱ្យហើយ ខ្ញុំនឹងកាត់បន្តទៅទៀត ព្រោះសុទ្ធតែស្រែប្រាំងប្រជាជន បើមិនកាត់ឱ្យប្រជាជន […] ប៉ុន្តែមិនមែនអ្នកណាចេះតែទៅធ្វើបានទេ […] ប៉ុន្តែអនុក្រឹត្យនេះទុកឱ្យខ្ញុំចាត់ចែង អាណាគួរធ្វើ អាណាមិនគួរធ្វើ ប្រទេសនានាគេបូមដល់សមុទ្រ ពង្រីកដល់សមុទ្រ យកដីដើម្បីអភិវឌ្ឍទៅហើយ ម៉េចក៏កម្ពុជាធ្វើនេះក៏ខុស ធ្វើនោះក៏ខុស ច្រណែនឬអី»។
ទោះជាយ៉ាងណា លោកនាយករដ្ឋមន្ត្រី ហ៊ុន សែន បានគូសបញ្ជាក់ថា រដ្ឋាភិបាលមិនចេញអនុក្រឹត្យលុបបឹងដើម្បីអភិវឌ្ឍ ហើយធ្វើឱ្យប៉ះពាល់ដល់ប្រជាពលរដ្ឋនៅតំបន់នោះទេ ហើយលោកក៏មិនឯកភាពចំពោះការបិទមុខទឹកនៅក្នុងរាជធានីភ្នំពេញនោះដែរ។
លោកថ្លែងដូចនេះថា៖ «ទីក្រុងប្រទេសរបស់យើងក៏កាន់តែធំ កន្លែងធ្វើការរបស់យើងក៏កាន់តែច្រើន ហើយពង្រីកមកខាងហ្នឹង [បឹងតាមោក] វាមានទាក់ទិនអីនឹងការស្តុបទឹក ទឹកមកពីលើបុកមកទម្លាក់ទៅខាងណោះទៅ។ កន្លងទៅ ទំនប់របស់យើងមួយខ្សែអត់មានរបាំងនៅពីមុខបាន វាចេះតែបុកនឹងទំនប់កប់ស្រូវនោះ កាលណាមានរបាំងនៅពីមុខហើយ វាមានអ្វីទៅប៉ះពាល់អីទៀត គេលុបបឹងធ្វើទីក្រុងអស់ហើយ នៅតែជេរឯងចុះឡើងៗ។ ទេ! អ្នកជេរគេជេរទៅ យើងធ្វើ នៅតែធ្វើ»។
នាយកប្រតិបត្តិសមាគមធាងត្នោត (STT) លោក សឿង សារ៉ន មានប្រសាសន៍ថា សង្គមស៊ីវិល មិនជំទាស់នឹងគម្រោងអភិវឌ្ឍន៍របស់រដ្ឋាភិបាលនោះទេ។
ប៉ុន្តែលោកថា ដើម្បីកុំឱ្យមានការិះគន់ រដ្ឋាភិបាលត្រូវបង្ហាញរបាយការណ៍ជាក់លាក់ និងធ្វើការសិក្សាឱ្យបានច្បាស់លាស់ជុំវិញការកាត់ផ្ទៃបឹងនេះ។ លោកក៏បានស្នើដល់រដ្ឋាភិបាលផ្តល់ព័ត៌មានជូនសាធារណជននិងសង្គមស៊ីវិល និងទុកឱកាសឱ្យពួកគេបានផ្តល់ជាយោបល់ទៅរដ្ឋាភិបាលជុំវិញករណីនេះផងដែរ។
លោក សារ៉ន មានប្រសាសន៍ថា៖ «រដ្ឋាភិបាលអាចធ្វើការវាយតម្លៃផលប៉ះពាល់ផ្សេងៗ ទាក់ទងនឹងសង្គមសេដ្ឋកិច្ចហើយនិងបរិស្ថាន ដើម្បីធានាថា ការអភិវឌ្ឍប្រកបដោយចីរភាព ហើយរបាយការណ៍គួរតែចេញផ្សាយជាសាធារណៈ ដើម្បីឱ្យប្រជាពលរដ្ឋឬសាធារណទូទៅគាត់បានទទួលនិងពិគ្រោះយោបល់ផងដែរ»។
កាលពីដើមខែកុម្ភៈ ឆ្នាំ២០១៦ រដ្ឋាភិបាលកម្ពុជាបានចេញអនុក្រឹត្យស្ដីពីការកំណត់ផ្ទៃបឹងតាមោក ជាសម្បតិ្តរបស់រដ្ឋ ដែលមានផ្ទៃដីសរុបប្រមាណ៣ ២៣៩ហិកតា សម្រាប់ស្តុកទឹកកខ្វក់និងរំដោះទឹកចេញពីរាជធានីភ្នំពេញ។
ចាប់តាំងពីឆ្នាំ២០១៨ ដល់ឆ្នាំ២០២០ រដ្ឋាភិបាលបានកាត់ផ្ទៃបឹងតាមោកសរុបជាង៥៨០ហិកតា ទៅឱ្យស្ថាប័នរដ្ឋ ដូចជា ក្រសួងយុត្តិធម៌ ក្រសួងការពារជាតិ សាលារាជធានីភ្នំពេញ សាលាដំបូងរាជធានីភ្នំពេញ សាលាឧទ្ធរណ៍ និងក្រុមហ៊ុនឯកជន សម្រាប់សាងសង់អគារនិងហេដ្ឋារចនាសម្ព័ន្ធផ្សេងៗជាដើម។
របាយការណ៍ដែលចេញផ្សាយដោយសមាគមធាងត្នោត កាលពីថ្ងៃទី២៦ ខែធ្នូ ឆ្នាំ២០១៩ បង្ហាញថា បឹងធម្មជាតិទាំងអស់នៅរាជធានីភ្នំពេញ កំពុងប្រឈមនឹងការចាក់ដីលុបអស់ទាំងស្រុង។
របាយការណ៍បញ្ជាក់ថា គិតចាប់ពីឆ្នាំ១៩៩០មក បឹងចំនួន១៦ហើយត្រូវបានចាក់ដីលុបទាំងស្រុង ខណៈបឹងចំនួន១០ទៀតត្រូវគេចាក់លុបមួយផ្នែកៗជាបណ្ដើរៗ៕