ក្រសួងសុខាភិបាល រកឃើញករណីឆ្លងជំងឺកូវីដ១៩ ចំនួន៣នាក់បន្ថែមទៀត ដែលជាអ្នកធ្វើដំណើរមកពីក្រៅប្រទេស និងមានពលករ៣នាក់បានជាសះស្បើយ។
សេចក្តីជូនដំណឹងរបស់ក្រសួងសុខាភិបាល នៅថ្ងៃទី២២ ខែមករា ឆ្នាំ២០២១នេះ ឱ្យដឹងថា ក្នុងចំណោមអ្នកឆ្លងជំងឺកូវីដ១៩ ទាំង៣នាក់ មានពលរដ្ឋខ្មែរ២នាក់ជាអ្នកដំណើរមកពីសហរដ្ឋអាមេរិក និងម្នាក់ទៀតជាបុរសជនជាតិនីហ្សេរីយ៉ា ធ្វើដំណើរមកពីប្រទេសនីហ្សេរីយ៉ា។
ក្រសួងបន្តថា ពួកគាត់បានមកដល់ប្រទេសកម្ពុជាកាលពីថ្ងៃទី២០ ខែមករា ឆ្នាំ២០២១ ហើយបច្ចុប្បន្ន ពួកគេត្រូវបានដាក់ឱ្យសម្រាកព្យាបាលនៅមជ្ឈមណ្ឌលជាតិកម្ចាត់រោគរបេងនិងហង់សិន និងមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ។
ចំពោះអ្នកដែលធ្វើដំណើរតាមយន្តហោះជាមួយអ្នកឆ្លងជំងឺកូវីដ ក្រសួងថា មានចំនួន១២៧នាក់ ត្រូវបានដាក់ឱ្យធ្វើចត្តាឡីស័កចំនួន១៤ថ្ងៃ នៅតាមសណ្ឋាគារមួយចំនួនក្នុងរាជធានីភ្នំពេញ។
ក្រសួងសុខាភិបាលបន្តទៀតថា នៅថ្ងៃទី២១ ខែមករា ឆ្នាំ២០២១ មានពលករខ្មែរដែលទើបមកពីថៃចំនួន៣នាក់បានព្យាបាលជាសះស្បើយ។
គួរបញ្ជាក់ថា គិតមកដល់ព្រឹកថ្ងៃទី២២ ខែមករា ឆ្នាំ២០២១ កម្ពុជាបានរកឃើញអ្នកឆ្លងជំងឺកូវីដ១៩ ឡើងដល់៤៥៦នាក់ ក្នុងនោះបានព្យាបាលជាសះស្បើយចំនួន៣៩៩នាក់ និងកំពុងសម្រាកព្យាបាលចំនួន៥៧នាក់៕
