ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃនេះ បានជូនដំណឹងដល់ម្ចាស់រោងចក្រសហគ្រាសទាំងអស់ ត្រូវបើកប្រាក់រំឭកនិងប្រាក់ដំណាច់អតីតភាពការងារជូនកម្មករឡើងវិញ ក្រោយពីក្រុមកម្មករផ្ទុះការតវ៉ាជាបន្តបន្ទាប់នៅដើមឆ្នាំ២០២១នេះ។
កាលពីសប្តាហ៍មុននិងនៅសប្តាហ៍នេះ កម្មកររាប់ពាន់នាក់នៅរាជធានីភ្នំពេញ និងខេត្តពោធិ៍សាត់ បានផ្ទុះការតវ៉ាដើម្បីទាមទារប្រាក់រំឭកប្រាក់ដំណាច់អតីតភាពការងារ និងអត្ថប្រយោជន៍ផ្សេងៗទៀត ក្រោយពីថៅកែរោងចក្រទាំងនោះពន្យារពេលបើកប្រាក់អតីតភាពការងារឱ្យពួកគេ។
ក្នុងសេចក្តីជូនដំណឹងចុះថ្ងៃទី២១ ខែមករា ឆ្នាំ២០២១នេះ ក្រសួងការងារបានប្រាប់ឱ្យម្ចាស់រោងចក្រសហគ្រាសទាំងអស់ ត្រូវចាប់ផ្តើមអនុវត្តឡើងវិញក្នុងឆ្នាំ២០២១នេះ នូវការបើកប្រាក់រំឭកប្រាក់ដំណាច់អតីតភាពការងារដែលមានមុនឆ្នាំ២០១៩ ប្រាក់ដំណាច់អតីតភាពការងារក្នុងឆ្នាំ២០២០និងឆ្នាំ២០២១ ក្រោយក្រសួងប្រកាសពន្យារពេលបើកកាលឆ្នាំមុន។
ក្រសួងការងារបញ្ជាក់ថា ប្រាក់រំឭកប្រាក់អតីតភាពការងារមានមុនឆ្នាំ២០១៩ (ប្រសិនបើមាន) ដែលថៅកែនៅជំពាក់កម្មករនោះ ត្រូវបើកជូនកម្មករនៅឆ្នាំ២០២០ ដោយអនុវត្តទូរទាត់នៅក្នុងត្រីមាសទី១ និងត្រីមាសទី៣ ខណៈប្រាក់រំឭកប្រាក់អតីតភាពការងារមានមុនឆ្នាំ២០១៩នេះដែរ ដែលត្រូវបើកក្នុងឆ្នាំ២០២១ គឺត្រូវអនុវត្តទូរទាត់ជូនកម្មករក្នុងត្រីមាសទី២ និងទី៤។
ចំពោះប្រាក់ដំណាច់អតីតភាពការងារក្នុងឆ្នាំ២០២០ ក្រសួងថា ថៅកែត្រូវទូរទាត់ជូនកម្មករនៅក្នុងត្រីមាសទី១ និងទី៣ ហើយប្រាក់ដំណាច់អតីតភាពការងារក្នុងឆ្នាំ២០២១ ថៅកែត្រូវទូរទាត់ជូនក្នុងត្រីមាសទី២ និងត្រីមាសទី៤។
តែយ៉ាងណា ក្រសួងថា កម្មករនិងថៅកែអាចចរចាគ្នាកំណត់នីតិវិធីនិងកាលបរិច្ឆេទជាក់លាក់នៃការទូរទាត់ប្រាក់ដំណាច់អតីតភាពការងារទាំងនេះ ដោយស្របទៅតាមស្ថានភាពរោងចក្រ សហគ្រាស និងអាជីវកម្មរបស់ខ្លួនបាន។
វីអូឌី មិនអាចសុំការអត្ថាធិប្បាយជុំវិញបញ្ហានេះពីប្រធានសមាគមរោងចក្រកាត់ដេរកម្ពុជា (GMAC) លោក ខេន លូ បានទេនៅថ្ងៃនេះ។
ពាក់ព័ន្ធប្រាក់រំឭកប្រាក់ដំណាច់អតីតភាពការងារនេះដែរ កម្មកររោងចក្រកាត់ដេរសម្លៀកបំពាក់ វ៉ាយ&ដាប់បែលយូ ហ្គាមេន (Y&W GARMENT CO.,LTD) ស្ថិតនៅភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ បានតវ៉ារហូតដល់មានការបិទកំណាត់ផ្លូវលេខ២១៧ ចំនួន២ថ្ងៃជាប់ៗគ្នា តាំងពីថ្ងៃម្សិលមិញនិងថ្ងៃនេះ។
អ្នកនាង ចាប ស្រីមុំ អះអាងថា ជាកម្មការិនីផ្នែកដេរធ្វើការងារនៅរោងចក្រ Y&W រយៈពេល៤ឆ្នាំ បានប្រាប់វីអូឌីនៅកន្លែងតវ៉ាថា ការដែលកម្មករ-កម្មការិនីរោងច្រកនេះជាង៥ពាន់នាក់បាននាំគ្នាប្រមូលផ្តុំតវ៉ាមុខរោងចក្រ គឺដោយសារតែពួកគាត់មិនពេញចិត្តចំពោះថៅកែដែលពន្យារពេលម្តងហើយម្តងទៀត ដោយមិនបើកប្រាក់ដំណាច់ឆ្នាំ ប្រាក់៥ភាគរយដល់កម្មករ និងអត្ថប្រយោជន៍ផ្សេងទៀតជូនកម្មករ។
អ្នកស្រីបន្ថែមថា៖ «ថៅកែគាត់រំលោភលើកម្មករណាស់ គាត់ជំពាក់កម្មករម្តងហើយម្តងទៀត។ គាត់អត់ចង់បើកឱ្យកម្មករនោះទេ គាត់យកលេសអញ្ចេះ យកលេសអញ្ចោះ។ ឆ្នាំ២០២០ គាត់យកលេសកូវីដ សុំពន្យារពេលដល់៦ខែ។ ៦ខែ កម្មករយល់ព្រម ដោយសារយោគយល់ នឹកឃើញថៅកែគាត់ខាត ក្រោយមកគាត់សុំលើកដល់១ឆ្នាំ [ពួកខ្ញុំ] ព្រមទៀត តែដល់ថ្ងៃដែលត្រូវបើកឱ្យពួកខ្ញុំ បែរជាគាត់អត់បើកឱ្យពួកខ្ញុំ»។
កម្មការិនីផ្នែកដេរម្នាក់ទៀត អ្នកស្រី សំ គា អាយុ៤២ឆ្នាំ និយាយថា ការពន្យារពេលម្តងហើយម្តងទៀតពីសំណាក់ភាគីរោងចក្រនេះ បានធ្វើឱ្យពួកគាត់ជួបការលំបាកជាខ្លាំងក្នុងជីវភាពគ្រួសារ ដោយសារតែពួកគាត់ត្រូវការចំណាយច្រើន ទាំងថ្លៃទឹក ភ្លើង បង់ថ្លៃសាលាឱ្យកូន និងអ្នកខ្លះជំពាក់បំណុលធនាគារជាដើម។
អ្នកស្រីបន្ថែមថា៖ «ខ្ញុំអំពាវនាវដល់សម្តេច [នាយករដ្ឋមន្ត្រី] ជួយដោះស្រាយដល់ពួកខ្ញុំផង ក្នុងគ្រួសារកម្មករម្នាក់ៗជួបបញ្ហាលំបាកដូចតែខ្ញុំដែរ ត្រូវការលុយផ្ញើជូនម៉ែឪនៅស្រុក កូនរៀន ថ្លៃទឹកភ្លើង បន្ទប់ជួល ត្រូវការលុយបង់សងធនាគារ និងចាយវាយប្រចាំថ្ងៃ និយាយទៅកម្មករជួបការលំបាកច្រើនណាស់»។
បើតាមអ្នកស្រី សំ គា ការតវ៉ារបស់ពួកគាត់កាលពីម្សិលមិញនេះ ក៏មានការប៉ះទង្គិចគ្នាជាមួយសមត្ថកិច្ចរយៈពេលខ្លីដែរ ដោយសមត្ថកិច្ចបានចាប់ឃាត់ខ្លួនកម្មករពីរនាក់ដាក់លើរថយន្ត និងមានស្ត្រីមានផ្ទៃពោះម្នាក់រងរបួសក្បាលដោយសារតែការគប់ដុំថ្មដាក់គ្នារវាងអាជ្ញាធរនិងក្រុមកម្មករ។
អភិបាលរងខណ្ឌដង្កោ លោក ជ គឹមស៊ បានប្រាប់ចំពោះមុខកម្មករថា អាជ្ញាធរបានដោះលែងកម្មករពីរនាក់ដែលចាប់ខ្លួននោះវិញហើយកាលពីថ្ងៃម្សិលមិញ។
ប្រធានរដ្ឋបាលរោងចក្រ (Y&W) អ្នកស្រី ជៀប ពេជ្យនារី មានប្រសាសន៍ថា រោងចក្រពិតជាបានជំពាក់ប្រាក់ដំណាច់អតីតភាពការងារមួយឆ្នាំ គឺឆ្នាំ២០២០។
អ្នកស្រីថា ការដែលថៅកែជំពាក់នោះ ដោយសារតែរោងចក្រមានបញ្ហាផ្នែកហិរញ្ញវត្ថុ ដោយសារវិបត្តិជំងឺកូវីដ១៩ និងគ្រោះទឹកជំនន់នាពេលកន្លងមក។ អ្នកស្រីបន្តថា ថៅកែគ្រោងបើកប្រាក់ដំណាច់អតីតភាពការងារចំនួនពាក់កណ្តាលជូនកម្មករនៅថ្ងៃទី៣០ ខែមករា និងពាក់កណ្តាលទៀតបើកជូននៅខែមេសា ឆ្នាំ២០២១នេះ ប៉ុន្តែក្រុមកម្មករមិនព្រម។
អ្នកស្រីបន្ថែមថា៖ «ខាងរោងចក្រថា បើកឱ្យគាត់កន្លះឆ្នាំដោយបើកឱ្យនៅថ្ងៃទី៣០ ខែមករាហ្នឹង ប៉ុន្តែចំណុចដែលគាត់ទាមទារ គាត់បានទាមទារផ្សេងៗទៀត។ គាត់ទារបានមួយ គាត់ទារមួយទៀត ហើយមួយទៀត ពួកគាត់អត់មានអ្នកណាមួយជាជំហរមកដោះស្រាយទេ។ យើងតំណាងជាជំហរក្នុងការដោះស្រាយ ប៉ុន្តែពួកគាត់អត់ទេ។ ហើយភាគច្រើនកម្មករប្រុសដែលគាត់តវ៉ាហ្នឹង គាត់ប្រើគ្រឿងស្រវឹងច្រើន ហើយបានចូលមកដោះស្រាយ ដល់ពេលអ៊ីចឹងយើងពិបាកនិយាយគ្នាណាស់»។
ពាក់ព័ន្ធការតវ៉ារបស់កម្មកររោងចក្រ Y&W នេះ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ប្រាប់វីអូឌីតាមតេឡេក្រាម (Telegram) ថា ការតវ៉ារបស់ក្រុមកម្មករចំនួន២ថ្ងៃនេះ គឺមានជនក្លែងបន្លំធ្វើជាកម្មករនិងបានបង្កហិង្សា ដែលលោកថា សមត្ថកិច្ចកំពុងតាមដាននិងវែករកមុខ។ លោកបន្តថា កម្មករដែលតវ៉ាមានប្រមាណជិត១ ០០០នាក់ប៉ុណ្ណោះ ក្នុងចំណោមកម្មករសរុបជាង៥ ០០០នាក់ ដែលសល់ពីនោះ ពួកគាត់នៅធ្វើការធម្មតា។
លោកបន្ថែមថា៖ «ដូច្នេះមិនមានអ្វីជាបញ្ហាទៀតទេ ពីព្រោះគ្រប់ភាគីដឹងនូវអ្វីដែលជាសិទ្ធិនិងយន្តការត្រូវដោះស្រាយ។ អ្នកណាធ្វើខុសច្បាប់ ទទួលខុសត្រូវ អ្នកមិនពាក់ព័ន្ធបំពេញការងារជាធម្មតា»។
ប្រធានសហភាពការងារកម្ពុជា លោក អាត់ ធន់ បានស្នើឱ្យក្រសួងការងារ និងថៅកែរោងចក្រ Y&W សម្របសម្រួលដោះស្រាយប្រាក់អតីតភាពការងារជូនកម្មករ ដើម្បីបញ្ចប់បញ្ហានិងការតវ៉ារបស់ក្រុមកម្មករ។
លោកបន្ថែមថា៖ «ទី១ ក្រសួងការងារ ត្រូវចុះទៅឱ្យក្រុមហ៊ុនប្រើប្រាស់កិច្ចសន្យាឱ្យបានត្រឹមត្រូវ ហើយទី២ អនុវត្តបើកប្រាក់ហ្នឹងតាមប្រកាសថ្មីហ្នឹងទៅ បានតែម្តង»។
ជាមួយគ្នានេះដែរ លោក អាត់ ធន់ ក៏បានបង្ហាញការគាំទ្រចំពោះសេចក្តីជូនដំណឹងរបស់ក្រសួងការងារ ដែលតម្រូវឱ្យម្ចាស់រោងចក្រសហគ្រាសទូរទាត់ប្រាក់រំឭកប្រាក់អតីតភាពការងារជូនកម្មករ ដោយពុំមានការពន្យារតទៅទៀតបែបនេះ។ លោកថា ប្រសិនបើបន្តពន្យារពេលទៀត អាចនឹងធ្វើឱ្យកម្មកររោងចក្រផ្សេងៗផ្ទុះការតវ៉ាបន្ថែមទៀត៕