តុលាការសាលាដំបូងរាជធានីភ្នំពេញ បានចេញដីកាកោះហៅមន្ត្រីជាន់ខ្ពស់នៅទីស្តីការគណៈរដ្ឋមន្ត្រី និងក្រសួងយុត្តិធម៌ ចំនួន២រូប ឱ្យចូលខ្លួនទៅបំភ្លឺនៅចុងខែមករានិងដើមខែកុម្ភៈខាងមុខនេះ ពាក់ព័ន្ធនឹងសំណុំរឿងឆបោក។
យោងតាមដីកាបង្គាប់ឱ្យចូលខ្លួនដាច់ដោយឡែកពីគ្នាចំនួន២ របស់ចៅក្រមស៊ើបសួរសាលាដំបូងរាជធានីភ្នំពេញ លោក ឌុច សុខសារិន ចុះថ្ងៃទី១១ ខែមករា ឆ្នាំ២០២១ បានបង្គាប់ឱ្យ លោក ឆែម ពេត អនុរដ្ឋលេខាធិការទីស្តីការគណៈរដ្ឋមន្ត្រី ចូលខ្លួនទៅសាលាដំបូង នៅថ្ងៃទី២៦ ខែមករា និងលោក មាស សាវឿន អនុរដ្ឋលេខាធិការក្រសួងយុត្តិធម៌ ចូលខ្លួននៅថ្ងៃទី៣ ខែកុម្ភៈ ខាងមុខ។
ក្នុងដីកាដដែលបញ្ជាក់ថា ការកោះហៅមន្ត្រីទាំង២រូបដើម្បីសាកសួរនេះ ធ្វើឡើងក្រោយពីមានបណ្តឹងរបស់ឈ្មោះ កាន រិទ្ធី ដែលបានប្តឹងពួកគេពីបទ «ឆបោក» ប្រព្រឹត្តនៅរាជធានីភ្នំពេញ កាលពីថ្ងៃទី២១ ខែតុលា ឆ្នាំ២០១៦ ដែលជាបទល្មើសព្រហ្មទណ្ឌ។ បើតាមដើមចោទនិងចុងចោទ បណ្តឹងលើសំណុំរឿងឆបោកនេះ គឺពាក់ព័ន្ធករណីឆបោកទិញលក់ដីទំហំ២ហិកតា នៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។
លោក ឆែម ពេត អនុរដ្ឋលេខាធិការទីស្តីការគណៈរដ្ឋមន្ត្រី មានប្រសាសន៍នៅថ្ងៃពុធនេះថា លោកនឹងចូលខ្លួនទៅបំភ្លឺនៅសាលាដំបូងរាជធានីភ្នំពេញ នៅថ្ងៃទី២៦ ខែមករានេះ តាមការបង្គាប់របស់តុលាការ ខណៈដែលលោកអះអាងថា ពុំបានប្រព្រឹត្តដូចការចោទប្រកាន់ឡើយ។
លោកបានបញ្ជាក់ថា៖ «ជារឿងមិនពិតទេ ជាការចោទប្រកាន់ខ្ញុំទេ! ឈ្មោះ កាន រិទ្ធី [ដើមបណ្តឹង] គាត់រកទិញដី ហើយឈ្មោះ មាស សាវឿន គាត់ថា គាត់មានដីលក់»។
លោកបានបញ្ជាក់បន្ថែមថា៖ «ខ្ញុំក៏បានប្រាប់ [ទៅឈ្មោះ កាន រិទ្ធី] ថា មាស សាវឿន គេមានដីលក់។ ហើយលោក រិទ្ធី គាត់ចង់ទិញ ហើយគាត់ក៏បានទៅជួបគ្នាជាមួយ មាស សាវឿន ទៅ ហើយបាត់រហូតទៅ រហូតដល់មានពាក្យបណ្តឹងហ្នឹង។ ដូច្នេះការឆបោក អត់ពាក់ព័ន្ធដល់ខ្ញុំទេ ខ្ញុំគ្រាន់តែជាអ្នកនាំអ្នកទិញនិងអ្នកលក់ជួបគ្នា»។
លោក មាស សាវឿន អនុរដ្ឋលេខាធិការក្រសួងយុត្តិធម៌ ដែលត្រូវបានតុលាការកោះហៅដែរនោះ មិនអាចទាក់ទងសុំអត្ថាធិប្បាយបានទេ នៅថ្ងៃពុធនេះ។
ចំណែកលោក កាន រិទ្ធី ជាដើមបណ្តឹង និងជាអតីតអភិបាលរងខេត្តប៉ៃលិន បានបញ្ជាក់ថា នៅអំឡុងខែសីហា ឆ្នាំ២០១៦ ឈ្មោះ ឆែម ពេត បានណែនាំអូសទាញរូបលោកឱ្យទិញដីមួយកន្លែងពីឈ្មោះ មាស សាវឿន ដែលពេលនោះ រូបលោកមិនស្គាល់ថាលោក មាស សាវឿន ជាអ្នកណានោះទេ។
លោកបន្តថា ដោយមានការអូសទាញអស់រយៈពេលប្រមាណ៣ខែពីសំណាក់លោក ឆែម ពេត នៅថ្ងៃទី២១ ខែតុលា ឆ្នាំ២០១៦ លោកក៏បានសម្រេចទិញដីដែលមានទំហំ ២០ ០០០ ម៉ែត្រការ៉េ (ស្មើ២ហិកតា) នោះ ក្នុងតម្លៃ ២០០ ដុល្លារក្នុងមួយម៉ែត្រការ៉េ។ លោកអះអាងថា ក្នុងដំណើរការទិញដីនោះ លោកបានកក់អស់ចំនួន១សែនដុល្លារ ដើម្បីឱ្យភាគីម្ខាងទៀតរត់ការធ្វើប្លង់។
លោកបានបញ្ជាក់ថា៖ «ពេលគាត់យកលុយ១សែនដុល្លារហ្នឹងទៅ គឺទៅបាត់រហូតទៅ[…] លោក ឆែម ពេត គឺជាអ្នកលួងលោមឱ្យឈ្មោះ មាស សាវឿន បោកយើង ហើយវាធានាអះអាងថា វាជាអ្នកកាន់ឯកសារ»។
យោងតាមដីកាសន្និដ្ឋានបញ្ជូនរឿងឱ្យស៊ើបសួររបស់អយ្យការអមសាលាដំបូងរាជធានីភ្នំពេញ ចុះថ្ងៃទី០១ ខែធ្នូ ឆ្នាំ២០២០ បានសម្រេចដាក់ឱ្យលោក មាស សាវឿន និងលោក ឆែម ពេត ស្ថិតនៅក្នុងការឃុំខ្លួនបណ្តោះអាសន្ន ដើម្បីបញ្ចប់បទល្មើស ឬបង្ការបទល្មើសកុំឱ្យកើតជាថ្មី ដើម្បីរារាំងកុំឱ្យមានការកៀបសង្កត់លើសាក្សីឬជនរងគ្រោះ ឬដើម្បីទប់ស្កាត់ការត្រូវរ៉ូវគ្នារវាងជនត្រូវចោទនិងអ្នកសមគំនិត។
ដីកាដដែលបន្តថា ការសម្រេចនេះក៏ដើម្បីធានារក្សាជនត្រូវចោទទុកជូនតុលាការចាត់ការតាមនីតិវិធី និងដើម្បីធានារក្សាសណ្តាប់ធ្នាប់សាធារណៈកុំឱ្យមានការច្របូកច្របល់ដែលបណ្តាលមកពីបទល្មើសនេះ។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានថ្លែងថា៖ «វាជារឿងធម្មតានៃការអនុវត្តច្បាប់ មិនថាមន្ត្រីរដ្ឋាភិបាលឬរាស្ត្រសាមញ្ញធម្មតា នៅពេលមានការចោទប្រកាន់ គាត់ត្រូវចូលរួមក្នុងដំណើរការនីតិវិធីតុលាការ ហើយធ្វើការពារខ្លួនតាមផ្លូវច្បាប់»។
លោក ជិន ម៉ាលីន បានបន្តថា រហូតដល់ពេលនេះ មានមន្ត្រីជាន់ខ្ពស់ក្រសួងយុត្តិធម៌ចំនួនពីររូបហើយ ក្នុងនោះមានលោក មាស សាវឿន អនុរដ្ឋលេខាធិការក្រសួងយុត្តិធម៌ និងលោក សេង សុវណ្ណារ៉ា អតីតអនុរដ្ឋលេខាធិការក្រសួងយុត្តិធម៌ ដែលត្រូវបានតុលាការចេញដីកាឃុំខ្លួនជាបណ្តោះអាសន្ន ដោយចោទប្រកាន់ចំនួន៤បទល្មើស ពាក់ព័ន្ធនឹងករណីរំលោភយកដីរដ្ឋប្រមាណ១ ០០០ហិកតា នៅខេត្តមណ្ឌលគិរី៕
