ក្រសួងកសិកម្ម រុក្ខាប្រមាញ់ និងនេសាទ ស្នើសុំគោលការណ៍ពីលោកនាយករដ្ឋមន្ត្រី ហ៊ុន សែន ដើម្បីចាត់វិធានការទៅលើអ្នកឃុបឃិតរំលោភយកដីដែលរដ្ឋាភិបាលបានធ្វើសម្បទានសេដ្ឋកិច្ចឱ្យក្រុមហ៊ុនឯកជនចំនួន២ នៅស្រុកអូររាំង និងក្រុងសែនមនោរម្យ ខេត្តមណ្ឌលគិរី។
ក្នុងលិខិតមួយចុះថ្ងៃទី១៣ ខែមករា ឆ្នាំ២០២១ ក្រសួងកសិកម្ម បានជម្រាបទៅលោកនាយករដ្ឋមន្ត្រី ហ៊ុន សែន ថាដីរាប់ពាន់ហិកតារបស់ក្រុមហ៊ុន វូជីសាន អិលអេស គ្រុបខូលធីឌី និងក្រុមហ៊ុន ហួរ លីង អ៊ិនធើណេសិនណល អ៊ីនសឺរេន ដែលទទួលបានការអនុញ្ញាតពីរដ្ឋាភិបាលនៅឆ្នាំ២០០៥ និង២០១០ ដើម្បីវិនិយោគដាំដើមស្រល់ នៅស្រុកអូររាំង និងក្រុងសែនមនោរម្យ ត្រូវបានរំលោភយកកាន់កាប់ខុសច្បាប់យ៉ាងអនាធិបតេយ្យ។
លិខិតដដែលនោះឱ្យដឹងថា ក្នុងចំណោមដីដែលរងការរំលោភកាន់កាប់នោះ ក៏មានទីតាំងខ្លះ មានការបញ្ជាក់ទិញ-លក់ដី ពីបុគ្គលម្នាក់ទៅបុគ្គលម្នាក់ ពីសំណាក់អាជ្ញាធរមូលដ្ឋាន ហើយកន្លែងខ្លះទៀតមានទាំងបណ្ណសម្គាល់សិទ្ធិកាន់កាប់អចលនវត្ថុទៀតផង។
ក្រសួងកសិកម្ម បន្ថែមទៀតថា ផ្ទៃដីព្រៃធម្មជាតិនិងព្រៃឈើស្រល់របស់រដ្ឋដែលបានរក្សាទុក ក្នុងតំបន់សម្បទានដីសេដ្ឋកិច្ចរបស់ក្រុមហ៊ុនទាំងពីរនោះ ក៏រងការកាប់ទន្ទ្រានដីនិងហ៊ុមរបងព័ទ្ធយកធ្វើជាកម្មសិទ្ធិផងដែរ ដោយទីតាំងខ្លះមានដល់ទៅវិញ្ញាបនបត្រសម្គាល់ម្ចាស់អចលនវត្ថុ និងលិខិតកាន់កាប់ទៀតផង។
ក្រសួងកសិកម្ម បានស្នើទៅលោកនាយករដ្ឋមន្ត្រី ហ៊ុន សែន ដើម្បីសុំការអនុញ្ញាតក្នុងការចាត់វិធានការទប់ស្កាត់បញ្ហាមួយចំនួន ក្នុងនោះរួមមាន ឱ្យរដ្ឋបាលខេត្តមណ្ឌលគិរី ចេញលិខិតនិរាករណ៍លើលិខិតទាំងឡាយណាដែលចេញដោយអាជ្ញាធរភូមិ-ឃុំ-ស្រុកនិងខេត្ត ហើយត្រូវដកហូតដីទាំងនោះមកធ្វើជាសម្បត្តិរដ្ឋវិញ។
ក្រសួងកសិកម្ម ក៏ស្នើឱ្យចាត់វិធានការផ្លូវច្បាប់ចំពោះបុគ្គលដែលជាប់ពាក់ព័ន្ធនឹងការរៀបចំឯកសារក្លែងក្លាយ ការចេញវិញ្ញាបនបត្រសម្គាល់ម្ចាស់អចលនវត្ថុមិនប្រក្រតី ការបំប្លែងដីរដ្ឋខុសច្បាប់ និងបញ្ហាផ្សេងៗទៀត។
បើយោងតាមលិខិតដែលខុទ្ទកាល័យនាយករដ្ឋមន្ត្រី បានទទួលកាលពីថ្ងៃទី១៥ ខែមករា ឆ្នាំ២០២១នេះ គឺលោកនាយករដ្ឋមន្ត្រី ហ៊ុន សែន បានចារឯកភាពតាមការស្នើសុំរបស់ក្រសួងកសិកម្ម។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន សុំមិនទាន់ធ្វើអត្ថាធិប្បាយបន្ថែមជុំវិញករណីនេះទេ ដោយរង់ចាំមានការចេញសេចក្តីប្រកាសរបស់រដ្ឋាភិបាលសិន។
លោកបានថ្លែងថា៖ «ប្រសិនជាការចេញ ស.ជ.ណ និងមានបទបញ្ជា យើងនឹងអនុវត្តហើយ ប៉ុន្តែឥលូវរង់ចាំមើលការចេញ ស.ជ.ណ សិន»។
វីអូឌី មិនអាចសុំការឆ្លើយតបពីអភិបាលខេត្តមណ្ឌលគិរី លោក ស្វាយ សំអៀង និងលោក ជាក់ ម៉េងហ៊ាង អភិបាលរងខេត្ត បានទេ នៅថ្ងៃនេះ។
ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តមណ្ឌលគិរី លោក ម៉ៅ ចំរើន មានប្រសាសន៍ថា លោកមិនបានដឹងថាមានករណីរំលោភដីរដ្ឋនិងក្លែងឯកសារនៅស្រុកអូររាំងនិងក្រុងសែនមនោរម្យនោះទេ។
លោកបន្ថែមថា៖ «ខ្ញុំអត់ដឹងរឿងហ្នឹងដែរ ទាល់តែយើងចុះស្រាវជ្រាវមើលសិន។ ពេលដែលយើងចុះអនុវត្ត យើងរកឃើញបែបហ្នឹង យើងអនុវត្តតាមហ្នឹងទៅ»។
មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាន នៃសមាគមការពារសិទ្ធិមនុស្សអាដហុក លោក ប៉ែន ប៊ុណ្ណារ៍ បានបង្ហាញការគាំទ្រក្រសួងកសិកម្មដែលទាមទារឱ្យមានវិធានការចំពោះអ្នកឃុបឃិតរំលោភយកដីរដ្ឋក្នុងខេត្តមណ្ឌលគិរីនេះ។
លោកបន្តថា នៅក្នុងខេត្តនេះ មានករណីរំលោភយកដីរដ្ឋជាច្រើនករណីដោយមន្ត្រីមានលុយមានអំណាច ហើយរូបលោកនិងប្រជាសហគមន៍ ក៏ធ្លាប់បានប្តឹងករណីរំលោភដីរដ្ឋនិងការចេញបណ្ណកម្មសិទ្ធិលើដីព្រៃខុសច្បាប់ ទៅតុលាការជាង១០បណ្តឹងផងដែរ។
លោកបន្ថែមថា៖ «មួយរយៈចុងក្រោយនេះ ផ្ទុះរឿងច្រើននៅខេត្តមណ្ឌលគិរី ទាំងករណីរំលោភយកដីរដ្ឋ ទាំងកាប់ឈើ។ នេះជារឿងមួយដែលត្រូវដល់ពេលដែលត្រូវចាត់វិធានការ [ករណី]បាត់បង់ដីរដ្ឋ។ អ្នកដែលប្រព្រឹត្តត្រូវតែប្រឈមមុខជាមួយច្បាប់ ត្រូវតែផ្តន្ទាទោសទៅតាមច្បាប់ ដើម្បីឱ្យសង្គមមួយមានការគោរពច្បាប់ និងមិនបន្តឱ្យមានអំពើពុករលួយ»។
កាលពីខែកុម្ភៈ ឆ្នាំ២០២០ ប្រជាសហគមន៍នៅស្រុកអូររាំង និងមន្ត្រីសិទ្ធិមនុស្ស បានប្តឹងអាជ្ញាធរពាក់ព័ន្ធមួយចំនួននៅស្រុកអូររាំង ខេត្តមណ្ឌលគិរី ទៅសាលាដំបូងខេត្ត ដោយចោទថា អាជ្ញាធរទាំងនោះបានកាប់រាននិងឈូសឆាយដីព្រៃខុសច្បាប់ ធ្វើជាកម្មសិទ្ធិផ្ទាល់ខ្លួន៕
