ក្រសួងសុខាភិបាល រកឃើញពលករខ្មែរចំនួន៧នាក់ដែលទើបមកពីប្រទេសថៃ បានឆ្លងជំងឺកូវីដ១៩ ដែលនាំឱ្យចំនួនពលករដែលឆ្លងជំងឺនេះកើនដល់៧៧នាក់ គិតមកដល់ព្រឹកថ្ងៃពុធនេះ។
ក្នុងសេចក្ដីប្រកាសព័ត៌មានរបស់ក្រសួងសុខាភិបាល ចេញផ្សាយនៅថ្ងៃនេះ ឱ្យដឹងថា អ្នកឆ្លងកូវីដទាំង៧នាក់នោះ មានអាសយដ្ឋាននៅស្រុកត្រាំកក់ ខេត្តតាកែវ និងស្រុកមង្គលបូរី ស្រុកថ្មពួក ខេត្តបន្ទាយមានជ័យ។
ក្រសួងបន្តថា ក្នុងចំណោមអ្នកឆ្លងទាំង៧នាក់ដែលសុទ្ធតែជាពលករខ្មែរធ្វើការនៅប្រទេសថៃនោះ គឺមាន២នាក់បានមកដល់កម្ពុជាកាលពីថ្ងៃទី៦ ខែមករា ឆ្នាំ២០២១ និង៥នាក់ទៀត មកដល់កម្ពុជានៅថ្ងៃទី១៧ ខែមករា ឆ្នាំ២០២១។
ក្រសួងបន្ថែមថា នៅថ្ងៃទី១៩ ខែមករា ឆ្នាំ២០២១ ក៏មានពលករចំនួន៦នាក់ត្រូវបានព្យាបាលជាសះស្បើយផងដែរ។
បើតាមក្រសួងសុខាភិបាល គិតត្រឹមព្រឹកថ្ងៃទី២០ ខែមករា ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ១៩ ចំនួន៤៤៨នាក់ ក្នុងនោះ អ្នកព្យាបាលជាសះស្បើយចំនួន៣៩២នាក់ (ពលករមកពីថៃ២៨នាក់) និងអ្នកដែលកំពុងសម្រាកនៅមន្ទីរពេទ្យចំនួន៥៦នាក់៕