គណបក្សហ៊្វុនស៊ិនប៉ិច បានប្រកាសនៅថ្ងៃនេះថា សម្ដេចក្រុមព្រះនរោត្តម រណឫទ្ធិ គ្រោងយាងទៅដឹកនាំបក្ស និងប្រឡូកក្នុងឆាកនយោបាយវិញនាចុងខែកុម្ភៈខាងមុខ។
អ្នកនាំពាក្យគណបក្សហ៊្វុនស៊ិនប៉ិច លោក ផាន់ សិទ្ធី មានប្រសាសន៍ក្នុងសន្និសីទសារព័ត៌មានថា បច្ចុប្បន្ន ព្រះរាជសុខភាពសម្ដេចក្រុមព្រះនរោត្តម រណឫទ្ធិ មានភាពល្អប្រសើរឡើងវិញហើយ បន្ទាប់ពីព្រះអង្គបាននិងកំពុងសម្រាកព្យាបាលព្រះរាជសុខភាពរយៈពេលយូរនៅប្រទេសបារាំង។
លោកបានថ្លែងបញ្ជាក់ថា៖ «ព្រះរាជសុខភាពរបស់សម្ដេចក្រុមព្រះ លោកមានព្រះរាជសុខភាពប្រសើរច្រើន លោកយាងខ្លួនឯងបាន មានបន្ទូលបានច្រើន។ ព្រះអង្គនឹងយាងមកដឹកនាំ [គណបក្ស] ដោយផ្ទាល់វិញ អាចសមាជគណបក្សដែលគ្រោងធ្វើនៅថ្ងៃទី២៧ ខែកុម្ភៈ»។
បើតាមលោក ផាន់ សិទ្ធី គណបក្សហ៊្វុនស៊ិនប៉ិច បានរៀបចំគម្រោងការជាក់លាក់ ដើម្បីចូលរួមប្រកួតប្រជែងការបោះឆ្នោតក្រុមប្រឹក្សាឃុំ-សង្កាត់ ក្នុងឆ្នាំ២០២២ និងការបោះឆ្នោតជ្រើសតាំងតំណាងរាស្ត្រ នៅឆ្នាំ២០២៣ ខាងមុខ។
សម្តេចក្រុមព្រះនរោត្តម រណឫទ្ធិ បានរងរបួសជាទម្ងន់នៅក្នុងគ្រោះថ្នាក់ចរាចរណ៍មួយនៅតាមបណ្ដោយផ្លូវជាតិលេខ៤ ក្នុងស្រុកព្រៃនប់ ខេត្តព្រះសីហនុ កាលពីថ្ងៃទី១៧ ខែមិថុនា ឆ្នាំ២០១៨។ ហេតុការណ៍គ្រោះថ្នាក់ចរាចរណ៍លើកនោះ បានបណ្ដាលឱ្យអ្នកម្នាងរបស់ព្រះអង្គទទួលមរណភាព ខណៈដែលព្រះអង្គត្រូវគង់លើព្រះទីនាំងកៅអីរុញចាប់ពីពេលនោះមក។
ចាប់តាំងពីព្រះអង្គជួបគ្រោះថ្នាក់ចរាចរណ៍ គណបក្សហ៊្វុនស៊ិនប៉ិច បានប្រែប្រួលសមាសភាពមួយចំនួនជាបន្តបន្ទាប់ ដោយមន្ត្រីចាស់ៗខ្លះត្រូវបានដកហូតតំណែងនិងបញ្ចប់តួនាទីក្នុងបក្សទៀតផង។
អនុប្រធានគណបក្សហ៊្វុនស៊ិនប៉ិច លោក ហេង ចាន់ថា លើកឡើងថា គណបក្សនេះមានការបែកបាក់ផ្ទៃក្នុងច្រើន ចាប់តាំងពីឆ្នាំ១៩៩៨មក ដែលចាំបាច់ត្រូវតែប្រមូលកម្លាំងរួបរួមគ្នាឡើងវិញ។ លោកអះអាងថា សម្ដេចក្រុមព្រះ នៅតែមានឥទ្ធិពលក្នុងឆាកនយោបាយកម្ពុជា។
លោកថា៖ «ជំងឺដែលធំបំផុតរបស់គណបក្សហ៊្វុនស៊ិនប៉ិច គឺមកពីមានការបែកបាក់គ្នាទៅជាចម្រៀកតូចៗ ហើយចេះតែបន្តបែកគ្នារហូត។ នេះមកពីការមិនយល់អធ្យាស្រ័យគ្នា អ៊ីចឹងហើយបានសម្តេចក្រុមព្រះ អំពាវនាវឱ្យបំភ្លេចរឿងស្អីទាំងអស់ពីមុនមក ឱ្យមករួមគ្នាឡើងវិញ»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ស្វាគមន៍ដំណឹងយាងត្រឡប់មកធ្វើនយោបាយដោយផ្ទាល់វិញ របស់សម្ដេចក្រុមព្រះនរោត្តម រណឫទ្ធិ។ លោកថា ការធ្លាក់ចុះខ្សោយរបស់គណបក្សហ៊្វុនស៊ិនប៉ិច មិនទាក់ទងនឹងបក្សប្រជាជននោះទេ។
លោក សុខ ឥសាន ថ្លែងថា៖ «ការធ្លាក់ចុះឬកើនឡើងប្រជាប្រិយភាពរបស់បក្សនេះ ជារឿងផ្ទៃក្នុងរបស់គណបក្សហ៊្វុនស៊ិនប៉ិចទេ មិនពាក់ព័ន្ធនឹងគណបក្សប្រជាជនកម្ពុជាឡើយ ចំពោះបងប្អូនដែលចូលគណបក្សប្រជាជនកម្ពុជា ជាសមានចិត្តរបស់ពួកគាត់ប៉ុណ្ណោះ»។
អ្នកឃ្លាំមើលបញ្ហាសង្គមនិងនយោបាយនៅកម្ពុជា លោកបណ្ឌិត មាស នី មានប្រសាសន៍ថា តួអង្គសម្តេចក្រុមព្រះនរោត្តម រណឫទ្ធិ នៅតែសំខាន់សម្រាប់គណបក្សហ្វ៊ុនស៊ិនប៉ិច ពិសេសការបង្ក្រាបទំនាស់នៅក្នុងបក្ស ប៉ុន្តែព្រះអង្គទំនងហាក់មិនមានទម្ងន់ប៉ុន្មានឡើយក្នុងការទាក់ទាញសំឡេងម្ចាស់ឆ្នោត។
បណ្ឌិត មាស នី មានប្រសាសន៍ថា៖ «តាំងពីព្រឹត្តិការណ៍ឆ្នាំ១៩៩៧មក បក្សនេះធ្លាក់ខ្សោយរហូត។ គណបក្សនេះកាន់តែមានកេរ្តិ៍ឈ្មោះមិនល្អក្នុងនាមជាអ្នកចេញមុខប្ដឹងរំលាយគណបក្សសង្គ្រោះជាតិផង ដូច្នេះបក្សហ្វ៊ុនស៊ិនប៉ិចមិនងាយស្រួលទាក់ទាញសំឡេងឆ្នោតឡើយ»។
សម្តេចក្រុមព្រះនរោត្តម រណឫទ្ធិ បច្ចុប្បន្នមានព្រះជន្ម៧៦ព្រះវស្សា។ ទ្រង់ជាអតីតនាយករដ្ឋមន្ត្រីទី១ ក្នុងរដ្ឋាភិបាលចម្រុះដែលឈ្នះឆ្នោតកាលពីឆ្នាំ១៩៩៣។ ប៉ុន្តែព្រះអង្គត្រូវបានទម្លាក់ព្រះរាជតំណែង បន្ទាប់ពីព្រឹត្តិការណ៍បង្ហូរឈាម កាលពីថ្ងៃទី៥និង៦ ខែកក្កដា ឆ្នាំ១៩៩៧។
ព្រះអង្គបានកាន់ព្រះរាជតំណែងជាប្រធានរដ្ឋសភា បន្ទាប់ពីឈ្នះអាសនៈសភាលំដាប់ទី២ កាលពីការបោះឆ្នោតឆ្នាំ១៩៩៨។ ព្រះអង្គបានរបូតព្រះរាជតំណែងជាប្រធានរដ្ឋសភាវិញ កាលពីឆ្នាំ២០០៦ និងត្រូវបណ្ដេញចេញពីបក្សបន្ទាប់ពីរងនូវបក្សប្រហារក្នុងឆ្នាំដដែលនោះ។នៅខែកញ្ញា ឆ្នាំ២០០៨ ព្រះអង្គបានប្រកាសចូលនិវត្តន៍ពីឆាកនយោបាយ។
នៅឆ្នាំ២០១៤ ព្រះអង្គបានបង្កើតគណបក្សមួយឈ្មោះថា «គណបក្សសង្គមរាស្រ្តរាជាធិបតេយ្យ» មុនពេលដឹកនាំគណបក្សហ៊្វុនស៊ិនប៉ិចម្តងទៀត ក្នុងឆ្នាំ២០១៥។
គណបក្សហ៊្វុនស៊ិនប៉ិច ដែលដឹកនាំដោយសម្ដេចក្រុមព្រះ បានទទួលអាសនៈជាង៤០ បន្ទាប់ពីតុលាការកំពូលប្រកាសរំលាយអតីតគណបក្សសង្គ្រោះជាតិ កាលពីខែវិច្ឆិកា ឆ្នាំ២០១៧៕