កម្មករ-កម្មការិនីបម្រើការងារនៅរោងចក្រ យីងហ៊ី ខេមបូឌា ហ្គាមេន ខូលអិលធីឌី (YING FE Cambodia GARMENT Co.,LTD) ស្ថិតក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ បានចូលបម្រើការងារវិញនៅព្រឹកសុក្រនេះ ក្រោយថៅកែសន្យាបើកប្រាក់អតីតភាពការងារជូនពួកគេ។
កាលពីម្សិលមិញ កម្មករ-កម្មការិនីប្រហែល១ពាន់នាក់ ធ្វើការនៅក្នុងរោងចក្រ យីងហ៊ី បានប្រមូលផ្តុំគ្នាតវ៉ាមុខរោងចក្រ ដើម្បីទាមទារទៅថៅកែឱ្យបើកប្រាក់រំឭកអតីតភាពការងារដែលពួកគេអះអាងថា ថៅកែបានជំពាក់រយៈពេល១ឆ្នាំមកហើយ។
កម្មការិនីផ្នែកដេរ បម្រើការងារនៅរោងចក្រ យីងហ៊ី អ្នកស្រី ឆេង សុខឃឿន ប្រាប់វីអូឌីនៅថ្ងៃសុក្រនេះថា ក្រុមកម្មករបានចូលធ្វើការងារវិញហើយនៅព្រឹកនេះ។ អ្នកស្រីថា ក្រោយតវ៉ា ភាគីរោងចក្របានសន្យាថា នឹងបើកប្រាក់រំឭកអតីតភាពការងារចំនួនពាក់កណ្តាលនៅក្នុងខែកុម្ភៈ និងបើកឱ្យពាក់កណ្តាលទៀតនៅខែមេសា ឆ្នាំ២០២១ ខាងមុខនេះ។
ប្រធានរដ្ឋបាលរោងចក្រ យីងហ៊ី លោក លី ឌី មិនអាចទាក់ទងបានទេនៅថ្ងៃនេះ។
ប៉ុន្តែលោកបានប្រាប់វីអូឌីកាលពីថ្ងៃម្សិលមិញថា មូលហេតុដែលថៅកែមិនអាចទូរទាត់ប្រាក់អតីតភាពការងារជូនកម្មករជាកញ្ចប់បាន ដោយសារតែខាងរោងចក្រអនុវត្តទៅតាមសេចក្តីជូនដំណឹងរបស់ក្រសួងការងារ ដែលអនុញ្ញាតឱ្យរោងចក្រអាចពន្យារពេលបើកប្រាក់អតីតភាពការងារដល់ឆ្នាំ២០២២។
បើយោងតាមសេចក្តីជូនដំណឹងរបស់ក្រសួងការងារ កាលពីថ្ងៃទី២៣ ខែធ្នូ ឆ្នាំ២០២០ ស្តីពីវិធានការបន្ថែមជុំទី៧ ដើម្បីគ្រប់គ្រងផលប៉ះពាល់លើវិស័យសំខាន់ៗនៃសេដ្ឋកិច្ចកម្ពុជា និងការស្ដារឡើងវិញក្រោយវិបត្តិជំងឺកូវីដ១៩នោះ រដ្ឋាភិបាលបានសម្រេចបន្តអនុញ្ញាតឱ្យរោងចក្រ សហគ្រាស និងអាជីវកម្មគ្រប់វិស័យ ពន្យារពេលទូរទាត់ប្រាក់រំឭកអតីតភាពការងារមុនឆ្នាំ២០១៩ អតីតភាពការងារសម្រាប់ឆ្នាំ២០២០និងឆ្នាំ២០២១ ទៅធ្វើនៅឆ្នាំ២០២២វិញ៕
