ប្រជាពលរដ្ឋ ៣២គ្រួសារ រស់នៅសហគមន៍បឹងសំរោង ក្នុងសង្កាត់សំរោង បានប៉ះទង្គិចគ្នាដោយហិង្សា ជាមួយអាជ្ញាធរខណ្ឌព្រែកព្នៅ បណ្តាលឱ្យពលរដ្ឋ២នាក់ រងរបួសស្រាល ខណៈអាជ្ញាធរចុះអនុត្តនីតិវិធីរុះរើផ្ទះពលរដ្ឋ៩គ្រួសារ ដែលបានទទួលយកគោលនយោបាយរួចតែមិនទាន់រុះរើ។
អ្នកស្រី រស់ យាន អាយុ ៥២ឆ្នាំ ជាប្រជាពលរដ្ឋម្នាក់ក្នុងចំណោម ៣២គ្រួសារនោះ មានប្រសាសន៍ប្រាប់វីអូឌីថា ពួកគាត់បានរស់នៅតំបន់នោះ តាំងពីឆ្នាំ១៩៩៦មក ដោយបានរស់នៅ និងអាស្រ័យផលដាំដំណាំ និងដាក់សម្រាស់ចិញ្ចឹមត្រីជាដើម។
អ្នកស្រីបន្តថា ថ្មីៗនេះ អាជ្ញាធរខណ្ឌ បានស្នើឱ្យពលរដ្ឋចាកចេញពីតំបន់នេះ ដោយផ្តល់គោលនយោបាយដីទំហំ ៤,២គុណ១៨ម៉ែត្រ ចំពោះពលរដ្ឋដែលមានផ្ទះ ខណៈអ្នកមានដីមិនទទួលបានសំណងឡើយ។
អ្នកស្រី រស់ យាន បន្ថែមថា ប្រជាពលរដ្ឋមួយចំនួន បានយល់ព្រមទទួលយកគោលនយោបាយរបស់អាជ្ញាធរ ដោយសារតែពួកគេភ័យខ្លាចនឹងការគំរាមកំហែងរបស់អាជ្ញាធរ ប៉ុន្តែពួកគាត់ទាំង៣២គ្រួសារនេះ មិនអាចទទួលយកបានទេ ដោយសារគោលនយោបាយនោះ ពុំអាច ឱ្យគាត់រស់នៅ និងដាំដំណាំចិញ្ចឹមជីវិតបាន។
អ្នកស្រីថា៖ «ខ្ញុំសុំស្នើឱ្យគាត់ដោះស្រាយ ទារតែ៣ម៉ឺន[ដុល្លារ]ទេ សម្រាប់រកទីតាំងនៅក្បែររោងចក្រ សម្រាប់ពួកខ្ញុំលក់បាយចិញ្ចឹមគ្រួសារ»។
ពលរដ្ឋម្នាក់ទៀត អ្នកស្រី នេត សូនី ដែលជាស្ត្រីមេម៉ាយនិងមានកូន៥នាក់ក្នុងបន្ទុក បានឱ្យដឹងបន្ថែមថា នៅព្រឹកមិញនេះ អាជ្ញាធរខណ្ឌជាច្រើននាក់ បានចុះទៅរុះរើផ្ទះពលរដ្ឋមួយចំនួន ក្នុងហេតុការណ៍នោះក៏មានប៉ះទង្គិចគ្នា បណ្តាលឱ្យមនុស្សពីរនាក់រងរបួសស្រាល នៅពេលដែលពួកគេព្យាយាមថតវីដេអូ ពីសកម្មភាពរុះរើនោះ។
អ្នកស្រីថា៖ «កូនខ្ញុំគ្រាន់តែថត គាត់រុញឡើងមានស្នាមរបួស ចំណែកខ្ញុំត្រូវគេរុញឱ្យកប់ភក់[…]ស្ត្រីម្នាក់ទៀតត្រូវបានគេបោចសក់ ពេលគាត់ព្យាយាមទៅដណ្តើមទូរស័ព្ទ[ពីអាជ្ញាធរ]មកវិញ»។
កាលពីថ្ងៃទី២៨ ខែធ្នូ ឆ្នាំ២០២០ រដ្ឋបាលខណ្ឌព្រែកព្នៅ បានចេញសេចក្តីជូនដំណឹងលើកចុងក្រោយ ឱ្យប្រជាពលរដ្ឋចំនួន ៩គ្រួសារ ដែលមិនព្រមទទួលយកគោលនយោបាយក្នុងការដោះដូរដីឡូតិ៍ដែលអាជ្ញាធរផ្តល់ជូននោះ ឱ្យរុះរើលំនៅឋានខុសច្បាប់ ចេញពីទំនប់យាយបាវ ក្នុងបឹងសំរោង ស្ថិតនៅសង្កាត់សំរោង និងសង្កាត់ព្រែកព្នៅ ដោយទុករយៈពេល៧ថ្ងៃ ចាប់ពីថ្ងៃទី២៩ ខែធ្នូ ឆ្នាំ២០២០ រហូតដល់ថ្ងៃទី៤ ខែមករា ឆ្នាំ២០២១។
រដ្ឋបាលខណ្ឌ បន្តថា ក្នុងករណីប្រជាពលរដ្ឋមិនព្រមរុះរើតាមទេ រដ្ឋបាលខណ្ឌនឹងចាត់វិធានការរដ្ឋបាលដោយចុះរុះរើ និងមិនទទួលខុសត្រូវលើការខូចខាត ឬបាត់បង់សម្ភារៈនោះឡើយ។
នាយករដ្ឋបាលខណ្ឌព្រែកព្នៅ លោក ស៊ីម សុថន មានប្រសាសន៍ប្រាប់អ្នកសារព័ត៌មាននៅពេលលោក និងក្រុមការងារចុះទៅពិនិត្យទីតាំងដែលផ្តល់គោលនយោបាយជូនពលរដ្ឋសហគមន៍បឹងសំរោង នៅរសៀលនេះថា នៅតំបន់បឹងសំរោងនេះ មានប្រជាពលរដ្ឋចំនួន ៣៣៦គ្រួសារ បានអាស្រ័យផលចិញ្ចឹមត្រី និងដាំដំណាំ ក្នុងនោះមានពលរដ្ឋចំនួន ១០៨គ្រួសារ បានទៅតាំងទីលំនៅជាក់ស្តែង និងរស់នៅដោយខុសច្បាប់នៅទីនោះ។
តែយ៉ាងណា លោកថា ថ្មីៗនេះ សាលារាជធានីភ្នំពេញ មានគម្រោងអភិវឌ្ឍន៍បឹងសំរោងនេះ ដោយរៀបចំផ្លូវបេតុងថ្មើរជើង និងសួនសាធារណៈសម្រាប់បម្រើផលប្រយោជន៍ប្រជាពលរដ្ឋទូទៅ ទើបមានការផ្តល់គោលនយោបាយជាដីឡូតិ៍ឱ្យពលរដ្ឋទាំង ១០៨គ្រួសារនោះ។
លោកថា៖ «កន្លងទៅ គាត់រស់នៅកន្លែងបឹង[ទីតាំងចាស់]នោះ ពុំមានផ្លូវចេញចូល ហើយបើនិយាយពីសិទ្ធិស្របច្បាប់គ្មាន គឺគាត់អត់មានកម្មសិទ្ធិស្របច្បាប់ទេ តែមកដល់កន្លែងនេះ[ទីតាំងថ្មី]គឺរដ្ឋផ្តល់ប័ណ្ណកម្មសិទ្ធិស្របច្បាប់ដល់គាត់ ហើយនិងចាត់ចែងហេដ្ឋារចនាសម្ព័ន្ធផ្សេងៗដើម្បីសម្រួលដល់ការរស់នៅឱ្យពួកគាត់បានល្អប្រសើរ»។
បើតាម លោក ស៊ីម សុថន គិតមកដល់ថ្ងៃនេះ មានពលរដ្ឋ ៩៩គ្រួសារហើយ ដែលទទួលយកគោលនយោបាយ និងទៅរស់នៅនៅទីតាំងថ្មី ខណៈពលរដ្ឋ៩គ្រួសារទៀត មិនព្រមរុះរើនៅឡើយ។
លោកបន្ថែមថា៖ «ពលរដ្ឋដែលមិនទាន់ទទួលយកគោលនយោបាយនេះ គាត់តែងតែនិយាយបំផ្លើស គ្មានការពិត តែងតែវាយប្រហារមកលើអាជ្ញាធរខណ្ឌព្រែកព្នៅ ថារំលោភសិទ្ធិបងប្អូនប្រជាពលរដ្ឋ ឬក៏យ៉ាងនោះ គឺមិនពិតទេ ទោះបីបច្ចុប្បន្ន គាត់មិនព្រមមកទទួលយកគោលនយោបាយនោះ ក៏អាជ្ញាធរនឹងបន្តសម្រួលនិងធ្វើការទំនាក់ទំនងគាត់ ជូនដំណឹងគាត់ ដើម្បីឱ្យគាត់ឆាប់បានមកនៅទីតាំងកន្លែងដ៏សមស្របនេះ»។
បឹងសំរោង មានទំហំ ២៣៦ហិចតា មានទីតាំងស្ថិតសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ត្រូវបានរដ្ឋាភិបាល សម្រេចធ្វើអនុបយោគ ពីទ្រព្យសម្បត្តិសាធារណៈរបស់រដ្ឋ ទៅជាទ្រព្យសម្បត្តិឯកជនរបស់រដ្ឋ កាលពីខែមេសាឆ្នាំ២០១៩៕
