ក្រសួងសុខាភិបាលប្រកាសពីការរកឃើញករណីឆ្លងជំងឺកូវីដ១៩ចំនួន១៣នាក់បន្ថែមទៀត ក្នុងនោះមានពលករខ្មែរដែលទើបមកពីប្រទេសថៃចំនួន៨នាក់ និងអ្នកធ្វើដំណើរមកពីក្រៅប្រទេស៥នាក់។
សេចក្តីជូនដំណឹងរបស់ក្រសួងសុខាភិបាល នៅថ្ងៃទី១៤ ខែមករា ឆ្នាំ២០២១នេះ ឱ្យដឹងថា ពលករខ្មែរចំនួន៨នាក់ដែលរកឃើញថាបានឆ្លងជំងឺកូវីដ១៩នោះ មានអាយុចន្លោះពី២២ឆ្នាំ ទៅ៣៨ឆ្នាំ រស់នៅខេត្តសៀមរាប និងបន្ទាយមានជ័យ។
ក្រសួងបន្តថា ពលករទាំងនោះបានមកដល់ប្រទេសកម្ពុជា កាលពីថ្ងៃទី១១ ខែមករា ឆ្នាំ២០២១ ហើយបច្ចុប្បន្នកំពុងដាក់ឱ្យសម្រាកព្យាបាលនៅមន្ទីរពេទ្យបង្អែកខេត្តបន្ទាយមានជ័យ។
ពលករខ្មែរដែលមកពីប្រទេសថៃ រកឃើញថាបានឆ្លងជំងឺកូវីដ គិតមកដល់ព្រឹកថ្ងៃព្រហស្បតិ៍នេះសរុបមានចំនួន៤១នាក់។
ដោយឡែក សម្រាប់អ្នកជំងឺកូវីដ១៩ ដែលជាអ្នកធ្វើដំណើរមកពីក្រៅប្រទេសចំនួន៥នាក់ទៀត ក្រសួងបានប្រាប់អត្តសញ្ញាណថា ពួកគាត់ជាជនជាតិខ្មែរមកពីសហរដ្ឋអាមេរិក ជនជាតិឥណ្ឌូនេស៊ីមកពីប្រទេសឥណ្ឌូនេស៊ី និងជនជាតិជប៉ុនមកពីប្រទេសជប៉ុន បានមកដល់ប្រទេសកម្ពុជា កាលពីថ្ងៃទី១២ ខែមករា ឆ្នាំ២០២១ ហើយបច្ចុប្បន្នកំពុងដាក់ឱ្យសម្រាកព្យាបាលនៅមជ្ឈមណ្ឌលកំចាត់រោគរបេង និងហង់សិន រាជធានីភ្នំពេញ។
ក្រសួងបន្ថែមថា អ្នកដំណើរចំនួន១០០នាក់ដែលធ្វើដំណើរតាមយន្តហោះជាមួយអ្នកជំងឺកូវីដ១៩ ទាំង៥នាក់ ត្រូវបានដាក់ឱ្យធ្វើចត្តាឡីស័កចំនួន១៤ថ្ងៃ នៅសណ្ឋាគារមួយចំនួន និងនៅស្ថានទូតអាមេរិក ក្នុងរាជធានីភ្នំពេញ។ ចំណែកអ្នកជាសះស្បើយវិញ ក្រសួងថា មានម្នាក់ជាពលករខ្មែរដែលធ្វើដំណើរមកពីប្រទេសថៃ។
គួរបញ្ជាក់ថា គិតមកដល់ព្រឹកថ្ងៃទី១៤ ខែមករា ឆ្នាំ២០២១ កម្ពុជាបានរកឃើញអ្នកឆ្លងជំងឺកូវីដ១៩ ឡើងដល់៤១១នាក់ ក្នុងនោះបានព្យាបាលជាសះស្បើយចំនួន៣៧៧នាក់ និងកំពុងសម្រាកព្យាបាលចំនួន៣៤នាក់៕
