អ្នកជំនាញទាក់ទងការអភិរក្សធនធានធម្មជាតិក្នុងរាជធានី និង គណបក្សនយោបាយ ស្នើឱ្យរដ្ឋាភិបាលរៀបចំកន្លែងអភិវឌ្ឍន៍លើដីគោកធម្មតា ចៀសវាងការលប់បឹងដើម្បីទុកធ្វើជាអាងរំដោះទឹក ហើយក៏ទុកជាកន្លែងពលរដ្ឋក្រីក្ររស់និងប្រកបរបរចិញ្ចឹមជីវិត។
ប្រធានកម្មវិធីនៃអង្គការសមាគមធាងត្នោតលោក ឯម ខេមរា មានប្រសាសន៍ថា បឹងក្នុងរាជធានីភ្នំពេញបានដើរតួយ៉ាងសំខាន់ក្នុងការស្តុបទឹក និងរំដោះទឹកក្នុងរដូវភ្លៀងធ្លាក់ ហើយលោកថា ជាកន្លែងដែលប្រជាពលរដ្ឋមួយចំនួនអាចអាស្រ័យផលដើម្បីចិញ្ចឹមជីវិតដោយការដាំដំណាំផ្សេងៗ។
លោក ឯម ខេមរា ៖«បឹងនេះវាសំខាន់ណាស់នៅក្នុងទីក្រុងភ្នំពេញ ទី១ គឺជាកន្លែងដែលស្តុកទឹក ដើម្បីការពារទឹកជំនន់នៅពេលដែលមានភ្លៀងធ្លាក់ខ្លាំង នៅក្នុងរដូវវស្សា។ ទី២ បឹងធំៗនៅភ្នំពេញ ដូចជាបឹងទំពន់ និងបឹងតាមោក គឺជាកន្លែងដែលប្រជាពលរដ្ឋគាត់អាចប្រកបរបរចិញ្ជឹមជីវិតដាំបន្លែ ដាំត្រកួន កញ្ឆែតអីហ្នឹង តាមរយៈការដាំដំណាំគាត់អាចបង្កើនប្រាក់ចំណូល។ មួយទៀតបឹងជារួមទាក់ទងបរិស្ថានវាធ្វើឱ្យទីក្រុងគឺត្រជាក់នៅពេលដែលមានទឹក»។
យោងតាមលិខិតរបស់រដ្ឋាភិបាលដែលបានចេញជាបន្តបន្ទាប់ថា ចាប់តាំងពីឆ្នាំ២០១៨ ដល់ឆ្នាំ២០២០ ផ្ទៃបឹងតាមោកប្រហែល១ ០០០ហិកតាហើយ ត្រូវបានរដ្ឋាភិបាលកាត់និងដោះដូរទៅឱ្យស្ថាប័នរដ្ឋនិងក្រុមហ៊ុនឯកជន សម្រាប់សាងសង់អគារនិងហេដ្ឋារចនាសម្ព័ន្ធផ្សេងៗ។
ដោយសារតែរដ្ឋាភិបាលនៅតែអនុញ្ញាតឲ្យកាត់ផ្ទៃដីបឹងក្នុងរាជធានីភ្នំពេញឲ្យទៅក្រុមហ៊ុនអភិវឌ្ឍ និងបុគ្គលឯកជន លោក ឯម ខេមា លើកឡើងថារដ្ឋាភិបាលគួរតែផ្តល់ដីដែលជំនួសដោយការកាត់ផ្ទៃបឹងដើម្បីការអភិវឌ្ឍ ហើយរក្សាទុកនូវធនធានធម្មជាតិនេះដើម្បីតម្រូវការរបស់ប្រជាពលរដ្ឋ និងបរិស្ថាននៃរាជធានីភ្នំពេញ។
លោកថា៖«យើងក៏មានការសោកស្តាយដែរដែលរដ្ឋាភិបាលគាត់បន្តកាត់ដីសាធារណៈរបស់រដ្ឋប្រគល់ឲ្យទៅបុគ្គលអញ្ចឹង ព្រោះដីជាដីសាធារណៈរបស់រដ្ឋហើយគិតថាភ្នំពេញធំហាសចឹងពេលខ្លះយើងមិនមែនថាតម្រូវថាត្រូវតែកាត់បឹងទេ វាមានដីផ្សេងៗដែលអាចដោះដូរឬក៏កាត់ជូនបុគ្គលឯកជនសម្រាបអភិវឌ្ឍ។ យើងចង់ឲ្យមានតម្លារភាពសម្រាប់ប្រជាពលរដ្ឋទូទៅដែលថាគាត់អាចទទួលផលប្រយោជន៍ដោយផ្ទាល់ និងដោយប្រយោលពីបឹង»។
ជាមួយគ្នានេះដែរ អ្នកនាំពាក្យគណបក្សប្រជាធិបតេយ្យមូលដ្ឋានលោក ឡឹក សុធា មានប្រសាសន៍ថា បឹងមួយចំនួនក្នុងរាជធានីភ្នំពេញត្រូវបានលុបជាបន្តបន្ទាប់ខណៈបឹងតាមោកគឺជាបឹងចុងក្រោយដែលកំពុងប្រឈមការលុប។
លោកបន្តថា បឹងទាំងនោះផ្តល់សារៈសំខាន់ណាស់ដោយបានផ្តល់ជាធនធានធម្មជាតិដូចជាត្រីជាដើម ហើយជាពិសេសទៀតនោះគឺវាបានជួយឲ្យមានបរិយាកាសបរិសុទ្ធសម្រាប់ប្រជាពលរដ្ឋក្នុងរាជធានីភ្នំពេញក្នុងការរស់នៅ និងដើរកំសាន្តផងដែរ។ លោកបន្ថែមថាបឹងទាំងនោះ គឺជាអាងស្តុកទឹកធម្មជាតិដ៏សំខាន់ដើម្បីបញ្ជៀសទឹកពីរាជធានីភ្នំពេញ។
លោក ឡឹក សុធា ថា៖«វាផ្តល់ផលប្រយោជន៍សំខាន់ជាច្រើនទី១គឺផ្នែកបរិស្ថាននឹងឯង នៅពេលដែលមានបឹងមានអីចឹងទៅវាជួយធ្វើឲ្យជីវិតយើងស្រស់បំព្រងសុខមាលភាពរបស់ប្រជាជន និងទី៣នោះគឺវាជួយទៅដល់ការរំដោះរាជធានីភ្នំពេញពីការជន់លិចជាដើម។
កាលពីខែមិថុនាឆ្នាំ២០២០ ប្រធានរាជ្យបណ្ឌិតសភាកម្ពុជាលោក សុខ ទូច អំពាវនាវដល់អ្នកពាក់ព័ន្ធឱ្យឈប់លុបបឹង ទុកធ្វើជាកន្លែងរំដោះទឹកកុំឱ្យលិចរាជធានី ហើយមើលគំរូអភិវឌ្ឍន៍តាមប្រទេសរីកចម្រើន និងកែប្រែទម្លាប់រក្សាគុណភាពបរិស្ថាន ដើម្បីជាប្រយោជន៍ដល់មនុស្សជំនាន់ក្រោយ។
ក្នុងអំឡុងពេលពិនិត្យស្ថានភាពទឹកជំនន់ក្នុងរាជធានីភ្នំពេញកាលពីខែតុលាឆ្នាំ២០២០ លោកនាយករដ្ឋមន្ត្រីហ៊ុន សែន អះអាងថា ទឹកជំនន់មិនពាក់ព័ន្ធការលុបបឹងនោះទេគឺដោយសារតែទឹកវាឡើងខ្លាំង។ លោកក៏បានលើកឡើងថា ប្រទេសផ្សេងក៏មានទឹកជំនន់ ហើយនៅតាមបណ្តាលខេត្តដែលមិនមានការលុបបឹងក៏មានទឹកជំនន់ដែរ។
លោក ហ៊ុន សែន៖«ឥឡូវតាមព្រែកត្នោតរបស់យើងពីខាងលើមកនេះ តើអ្នកណាលុបបឹង ព្រែកស្ទឹងពោធិ៍សាត់ ស្ទឹងមង្គលបុរីស្ទឹងសង្កែ? អានោះវាសុទ្ធតែស្ទឹង។ ប៉ុន្តែដោយសារតែទឹកពីលើវាខ្លាំងជ្រុលហួស វាហួសពីសមត្ថភាពស្រូប»។
របាយការណ៍អង្គការសមាគមធាងត្នោតដែលបានចេញផ្សាយកាលពីថ្ងៃទី២៦ ខែធ្នូ ឆ្នាំ២០១៩ថាបឹងចំនួន២៦ក្នុងរាជធានីភ្នំពេញត្រូវបានលុបទាំងស្រុងចំនួន១៦ដោយស្មើនឹង៦០%នៃផ្ទៃបឹងសរុប និងបឹងចំនួន១០ផ្សេងទៀតត្រូវបានលុបផ្នែកមួយចំនួននៃបឹង។
របាយការណ៍ដដែលបានបញ្ជាក់ថាមូលហេតុនៃការលុបបឹងទាំងនោះគឺបណ្តាលមកពីការសាងសង់បុរី តំបន់លំនៅដ្ឋាន និងទីក្រុងរណប។ របាយការនេះបង្ហាញថាការលុបបឹងទាំងនោះគឺជាការបាត់អាងស្តុកទឹកដ៏សំខាន់សម្រាប់ទីក្រុងភ្នំពេញ៕
អត្ថបទដោយ ប៉ា តុងចិន
