រដ្ឋមន្ត្រីក្រសួងមហាផ្ទៃ លោក ស ខេង បានបញ្ជាទៅកម្លាំងនគរបាល ពិសេសនគរបាលរាជធានីភ្នំពេញ សហការជាមួយក្រសួងសាធារណការ និងដឹកជញ្ជូន ដើម្បីស្រាវជ្រាវកំណត់អត្តសញ្ញាណម្ចាស់ម៉ូតូធំ ដែលកែច្នៃបង្កសំឡេងរំខានដល់ប្រជាពលរដ្ឋ។
ក្នុងកិច្ចប្រជុំអន្ដរក្រសួង ដើម្បីកែសម្រួលលក្ខណៈសម្បត្តិនៃគោលនយោបាយភូមិឃុំមានសុវត្ថិភាព នៅថ្ងៃសុក្រនេះ លោកឧបនាយករដ្ឋមន្ត្រី ស ខេង បានថ្លែងថា ថ្មីៗនេះ លោកនៅតែសង្កេតឃើញមានករណីក្មេងទំនើងមួយចំនួនបានជិះម៉ូតូធំដែលកែច្នៃបំពង់ស៊ីម៉ាំងខុសពីលក្ខណៈបច្ចេកទេសនៃទ្រង់ទ្រាយដើម ដែលមានសំឡេងឮខ្លាំងបង្កការរំខានដល់ប្រជាពលរដ្ឋ។
លោកបន្តថា រូបលោកក៏ធ្លាប់ជួបម៉ូតូធំដែលកែច្នៃបំពង់ស៊ីម៉ាំង ហើយករណីនេះ លោកជំរុញសមត្ថកិច្ចនិងក្រសួងពាក់ព័ន្ធ លុបបំបាត់ម៉ូតូធំដែលបង្កជាសំឡេងរំខាន កុំឱ្យមានបន្ដទៀតនៅក្នុងសង្គម។
លោកបានថ្លែងថា៖ «ស្នើក្រសួងសាធារណការ បញ្ជូនផ្លាកលេខ [ម៉ូតូធំដែលបង្កសំឡេងរំខាន] មកប៉ូលិស ដើម្បីឱ្យដឹងអាសយដ្ឋានម៉ូតូហ្នឹង ព្រោះម៉ូតូនេះសុទ្ធតែក្មេងទំនើងជិះ វាជិះហើយវាដកបំពង់ស៊ីម៉ាំងចេញ។ បើវាជិះមុខផ្ទះយើង បើដេកកំពុងតែស្ងប់ ដឹងតែភ្ញាក់ ខ្ញុំធ្លាប់ឮរអ៊ូលើបញ្ហានេះនៅម្ដុំវិមានឯករាជ្យ»។
លោក ស ខេង ក៏បានបញ្ជាទៅមន្ដ្រីនគរបាលឱ្យឃ្លាំមើលនិងសហការជាមួយក្រសួងសាធារណការ និងដឹកជញ្ជូន ដើម្បីកំណត់អត្តសញ្ញាណ និងអសយដ្ឋានអ្នកជិះម៉ូតូធំទាំងអស់នោះផងដែរ ដោយលោកថា កន្លងមក អ្នកជិះម៉ូតូធំៗទាំងនោះបានបើកបរក្នុងល្បឿនលឿន និងខ្លះទៀត បានបង្កការរំខានដល់ប្រជាពលរដ្ឋក្នុងមូលដ្ឋាន រួមទាំងរំខានដល់ដំណេកថ្នាក់ដឹកនាំផងដែរ។
អនុរដ្ឋលេខាធិការក្រសួងសាធារណការ និងដឹកជញ្ជូន លោក គង់ វិមាន មានប្រសាសន៍ថា មន្ត្រីជំនាញក្រសួង នឹងធ្វើការសហការជាមួយនគរបាល ដើម្បីធ្វើកិច្ចការងារនេះ។
លោកថា៖ «មធ្យោបាយ ដូចជាម៉ូតូ ដូចជាអីពាក់ព័ន្ធហ្នឹង មិនទាន់មានផ្លាកលេខ ផ្លាកអីហ្នឹង អាហ្នឹងយើងរកវាមិនទាន់ឃើញទេ។ ទាល់តែសមត្ថកិច្ចយើងតាមកាក់នៅនឹងកន្លែងតែម្ដង លើកលែងតែយានយន្តដែលបានមកចុះបញ្ជីហើយ អាហ្នឹងក្រសួងយើងអាចរកឃើញ»៕
