សកម្មជនបរិស្ថាន បង្ហាញក្តីបារម្ភពីវិនាសកម្មព្រៃឈើនៅតំបន់ព្រៃឡង់ ខណៈពួកគេសង្កេតឃើញមានបទល្មើសព្រៃឈើនៅតែបន្តកើតមានជារៀងរាល់ថ្ងៃ ដោយគ្មានការទប់ស្កាត់ទាន់ពេលវេលាពីអាជ្ញាធរពាក់ព័ន្ធ។
ការបារម្ភនេះបានកើតឡើងស្របពេលមានការផ្សព្វផ្សាយតាមបណ្តាញសង្គមហ្វេសប៊ុកមួយឈ្មោះ Thol Kt កាលពីថ្ងៃម្សិលមិញនិងថ្ងៃនេះ បានផុសឃ្លីបវីដេអូអំពីសកម្មភាពដឹកឈើចេញពីតំបន់ព្រៃឡង់ ក្នុងស្រុកសំបូរ ខេត្តក្រចេះ ចូលក្នុងដីក្រុមហ៊ុនមួយ។
ក្នុងវីដេអូឃ្លីបជាង១នាទីនោះបានបង្ហាញសកម្មភាពគោយន្តចំនួន៣គ្រឿងដឹកឈើហុបធំៗ ដោយអ្នកថតវីដេអូនិយាយថា ឈើហុបទាំងនោះដឹកចេញពីព្រៃឡង់ទៅក្រុមហ៊ុន។ ម្ចាស់ហ្វេសប៊ុកដដែលនោះបានបញ្ជាក់ប្រាប់វីអូឌីបន្ថែមថា ហេតុការណ៍នេះកើតឡើងក្នុងស្រុកសំបូរ ខេត្តក្រចេះ ប៉ុន្តែលោកបានបដិសេធអត្ថាធិប្បាយលម្អិតជុំវិញករណីនេះ។
បណ្តាញព្រៃឡង់ខេត្តក្រចេះ អ្នកស្រី សួន ចន្ទី បានលើកឡើងនៅថ្ងៃសុក្រនេះថា ក្នុងពេលថ្មីៗនេះ អ្នកស្រីក៏សង្កេតឃើញមានសកម្មភាពដឹកឈើចេញពីព្រៃឡង់តាមម៉ូតូ គោយន្ត និងឡានជាដើម ស្ទើរតែរៀងរាល់ថ្ងៃ ដោយពុំឃើញអាជ្ញាធរណាទប់ស្កាត់ឡើយ។
អ្នកស្រីបន្ថែមថា៖ «យប់ដឹកយ៉ាងគគ្រឹកគគ្រេង ទាំងឡាន ទាំងម៉ូតូ មិនឃើញមន្ត្រីជំនាញចុះទប់ស្កាត់ផង។ បើចុះទប់ស្កាត់ មិនមែនមានដឹកទាំងយប់ទាំងថ្ងៃអញ្ចឹងទេ»។
លោក ហឿន សុភាព ជាសកម្មជនព្រៃឡង់ និងជាអ្នកសម្របសម្រួលបណ្តាញព្រៃឡង់ប្រចាំខេត្តកំពង់ធំ មានប្រសាសន៍ដែរថា សកម្មភាពកាប់និងដឹកឈើចេញពីតំបន់ព្រៃឡង់នៅតែបន្តកើតមានស្ទើររាល់ថ្ងៃ ខណៈបណ្តាញព្រៃឡង់ទាំង៤ខេត្ត ត្រូវបានអាជ្ញាធរហាមឃាត់មិនឱ្យចូលល្បាតព្រៃឡង់។
លោកបន្តថា រយៈពេលដែលអាជ្ញាធរហាមឃាត់មិនឱ្យបណ្តាញព្រៃឡង់ចុះល្បាតនេះ ក៏ជាឱកាសសម្រាប់ជនល្មើសងាយស្រួលចូលទៅកាប់បំផ្លាញព្រៃឈើផងដែរ។ លោកថា តាមរបាយការណ៍ដែលបណ្តាញព្រៃឡង់ចុះល្បាតតាមផ្លូវនៅក្រៅតំបន់ព្រៃឡង់ គឺបានជួបគោយន្តដឹកឈើចេញពីព្រៃឡង់ក្នុងខេត្តកំពង់ធំ ក្នុង១ថ្ងៃមិនតិចជាង១៥គោយន្តឡើយ។
លោកបន្ថែមថា៖ «យើងមើលតែមន្ត្រីឧទ្យានុរក្សតាមស្នាក់ការនីមួយៗដែលគាត់យាមតាមច្រកចេញហើយ តែហេតុអីបានជាឈើនៅតែចេញបានតាមច្រកនោះ? យើងគិតតែប៉ុណ្ណោះបានហើយ។ ខ្ញុំឱ្យយ៉ាងយូរ៥ឆ្នាំ ប្រសិនបើគ្មានសមាសភាពរបស់ក្រុមយើងចូលទៅល្បាតក្នុងព្រៃឡង់ទៀត យ៉ាងយូរ៥ឆ្នាំទៀត ព្រៃឡង់នឹងអស់ហើយ។ វាមិនអស់ទាំងអស់ទេ ប៉ុន្តែឈើធំៗលែងមានតែម្តង»។
ចំណែកបណ្តាញសហគមន៍ព្រៃឡង់ខេត្តព្រះវិហារ លោក ស្រី ថី និយាយថា បច្ចុប្បន្នសកម្មភាពដឹកឈើចេញពីព្រៃឡង់ក្នុងខេត្តព្រះវិហារ ក៏នៅតែបន្តកើតមានជាហូរហែដដែល ដោយពុំមានការទប់ស្កាត់ពីអាជ្ញាធរនិងមន្ត្រីឧទ្យានុរក្សឡើយ។
លោកអះអាងថា ជនល្មើសបានប្រើប្រាស់គោយន្តជាមធ្យោបាយដឹកឈើចេញពីព្រៃឡង់ ហើយឡានធំៗរង់ចាំដឹកបន្តនៅស្រុកនិងខេត្ត។
លោកបន្ថែមថា៖ «ព្រៃនេះ ប្រហែលជាមិនអាចសល់ទៀតទេ ព្រោះអីគេដឹកឈើរាល់តែថ្ងៃ។ ពេលល្ងាច គេដឹករាល់ល្ងាច ៥ទៅ៦គោយន្ត។ យើងមិនសង្ឃឹមលើអាជ្ញាធរទេ ព្រោះគាត់ដូចជាបើកផ្លូវឱ្យគេដឹកឈើរហូតអញ្ចេះ។ គេដឹកដាក់ឈ្មួញកណ្តាល ហើយឈ្មួញកណ្តាលដឹកទៅដាក់ក្រុមហ៊ុននៅខេត្តកំពង់ធំបន្តទៀត»។
អ្នកនាំពាក្យក្រសួងបរិស្ថាន លោក នេត្រ ភក្ត្រា សុំមិនទាន់ធ្វើអធិប្បាយលើបញ្ហាការបន្តមានការកាប់ឈើចេញពីព្រៃឡង់នេះទេ ដោយលោកថា មិនទាន់ទទួលបានព័ត៌មាននៅឡើយ។ ប៉ុន្តែលោកធ្លាប់បានប្រាប់អ្នកសារព័ត៌មានក្នុងសន្និបាតបូកសរុបលទ្ធផលការងារបរិស្ថានឆ្នាំ២០២០ កាលពីខែធ្នូថា បទល្មើសព្រៃឈើក្នុងព្រៃឡង់នៅមាន តែលក្ខណៈទ្រង់ទ្រាយតូចតាចប៉ុណ្ណោះ។
ចំណែកប្រធានមន្ទីរបរិស្ថានខេត្តក្រចេះ លោក ឌួង ឆាយសាវុធ ប្រាប់វីអូឌីថា ក្រោយទទួលបានព័ត៌មានថា មានករណីដឹកឈើចេញពីព្រៃឡង់ភ្លាម លោកចាត់មន្ត្រីនិងអាជ្ញាធរពាក់ព័ន្ធចុះទៅទប់ស្កាត់ភ្លាមៗនៅតំបន់គោលដៅ ប៉ុន្តែមន្ត្រីរបស់គាត់ថា ពុំមានករណីនេះកើតឡើងឡើយ។
លោកបន្ថែមថា៖ «ខ្ញុំមិនហ៊ានថាព័ត៌មានដែលគាត់ផ្សាយហ្នឹងពិតឬមិនពិតទេ គ្រាន់តែពេលខ្ញុំទទួលបានព័ត៌មាននេះភ្លាម មន្ត្រីខ្ញុំទៅទប់ស្កាត់ភ្លាម ប៉ុន្តែអត់មានបញ្ហាហ្នឹងកើតឡើងទេ។ ខ្ញុំគ្រាន់បញ្ជាក់ថា ប្រសិនបើមានករណីអញ្ចឹងកើតឡើង ហើយផ្តល់ព័ត៌មានមកឱ្យខ្ញុំភ្លាម ខ្ញុំនឹងចាត់វិធានការភ្លាម»។
របាយការណ៍៩ខែ ឆ្នាំ២០២០ របស់ក្រសួងបរិស្ថាន បានឱ្យដឹងថា រយៈពេល៩ខែ ឆ្នាំ២០២០នេះ មន្ត្រីឧទ្យានុរក្សនិងសហគមន៍បានចុះល្បាតចំនួន១ ៨២៣លើក ដោយបានបង្ក្រាបបទល្មើសចំនួន៩៥៤ករណី ក្នុងនោះបញ្ជូនសំណុំរឿងទៅតុលាការចំនួន៤០ករណី និងរឹបអូសបានវត្ថុតាងនៃបទល្មើសមួយចំនួនទៀត ខណៈបទល្មើសព្រៃឈើនៅតំបន់មួយចំនួនបានថយចុះ។
បើតាមក្រសួងបរិស្ថាន ដែនជម្រកសត្វព្រៃព្រៃឡង់ត្រូវបានបង្កើតឡើងដោយអនុក្រឹត្យនៅខែឧសភា ឆ្នាំ២០១៦ មានផ្ទៃដីជាង៤៣ម៉ឺនហិកតា (៤៣១ ៦៨៣ហិកតា) ដែលក្នុងនោះមានជីវចម្រុះជិត៤០០ប្រភេទកំពុងរស់នៅ។ ដែនជម្រកសត្វព្រៃមួយនេះស្ថិតនៅក្នុងភូមិសាស្ត្រខេត្តចំនួន៤ រួមមាន ខេត្តកំពង់ធំ ខេត្តព្រះវិហារ ខេត្តក្រចេះ និងខេត្តស្ទឹងត្រែង។
ក្រសួងបរិស្ថាន ឱ្យដឹងថា បច្ចុប្បន្នមានមន្ត្រីឧទ្យានុរក្សចំនួន៨៤នាក់បាននិងកំពុងឈរជើងការពារ និងមានសហគមន៍តំបន់ការពារធម្មជាតិចំនួន១៩នៅក្នុងដែនជម្រកសត្វព្រៃព្រៃឡង់ ដែលបានចូលរួមសហការចុះល្បាតជាមួយមន្ត្រីឧទ្យានុរក្ស៕