អាណាព្យាបាលនិងក្មេងស្រីមួយចំនួនដែលចាញ់បោកមេខ្យល់នាំយកទៅលក់នៅប្រទេសចិន អំពាវនាវជាថ្មីទៅរដ្ឋាភិបាលកម្ពុជា ជួយពន្លឿននីតិវិធីក្នុងការជួយនាំពួកគេឱ្យបានត្រឡប់មកប្រទេសកម្ពុជាវិញ។
កាលពីអំឡុងខែធ្នូ ស្ត្រីខ្មែរចំនួន៣នាក់ដែលចាញ់បោកមេខ្យល់នាំទៅលក់នៅប្រទេសចិន និងសាច់ញាតិរបស់ពួកគេ ធ្លាប់បានស្នើឱ្យអាជ្ញាធរកម្ពុជាជួយអន្តរាគមន៍ឱ្យពួកគេបានត្រឡប់មកប្រទេសកម្ពុជាវិញ ក្រោយពីពួកគេរងការធ្វើបាបពីស្វាមីនៅប្រទេសចិន។
ក្មេងស្រីវ័យ១៤ឆ្នាំម្នាក់ ឈ្មោះ យ.ស.ដ.វ បានអះអាងប្រាប់វីអូឌីតាមសារជាសំឡេងលើបណ្តាញសង្គមហ្វេសប៊ុកនៅថ្ងៃពុធនេះថា រូបគាត់បានចាញ់បោកមេខ្យល់ដែលមិនស្គាល់អត្តសញ្ញាណ នាំយកទៅប្រទេសចិន រយៈពេល៤ខែមកហើយ។
ក្មេងស្រីរូបនោះបន្តថា រូបគាត់ត្រូវបានប្តីជនជាតិចិនវាយធ្វើបាបរាងកាយនិងទាញទម្លាក់ពីលើគ្រែដេកស្ទើរជារៀងរាល់ថ្ងៃ រហូតទ្រាំលែងបាន ទើបសម្រេចចិត្តលួចរត់ទៅប៉ុស្តិ៍ប៉ូលិសដែលមានចម្ងាយពីផ្ទះជនរងគ្រោះ១០គីឡូម៉ែត្រ ដោយពុំស្គាល់ទីតាំងភូមិសាស្ត្រនៅតំបន់នោះឈ្មោះអ្វីនោះទេ។
ក្មេងស្រីរូបនោះនិយាយទៀតថា គិតត្រឹមថ្ងៃទី៦ ខែមករា ឆ្នាំ២០២១នេះ មានរយៈពេលជិតកន្លះខែហើយ ត្រូវបានប៉ូលិសចិនទុកឱ្យស្នាក់នៅបណ្តោះអាសន្ន និងឱ្យបាយទឹកចំនួន៣ពេលក្នុងមួយថ្ងៃ ដើម្បីរង់ចាំអាជ្ញាធរកម្ពុជាជួយអន្តរាគមន៍ឱ្យគាត់បានត្រឡប់មកកម្ពុជាវិញ។
ក្មេងស្រីរូបនេះបានអះអាងទៀតថា គិតត្រឹមរសៀលថ្ងៃទី៦ ខែមករានេះ មិនទាន់មានមន្ត្រីស្ថានទូតខ្មែរប្រចាំនៅប្រទេសចិន មកសម្ភាសឬសួរនាំគាត់ពីបញ្ហារត់គេចខ្លួនពីផ្ទះរបស់បុរសជនជាតិចិនដែលធ្វើបាបនោះនាងនៅឡើយ។ ករណីនេះ រូបគាត់បានស្នើដល់អាជ្ញាធរកម្ពុជា ជួយពន្លឿនកិច្ចអន្តរាគមន៍ជួយគាត់ឱ្យបានឆាប់ ព្រោះបច្ចុប្បន្ននេះ គាត់រស់នៅក្នុងប៉ុស្តិ៍ប៉ូលិសទំាងមានផ្ទៃពោះជិត៣ខែយ៉ាងលំបាក។
ក្មេងស្រីរូបនោះនិយាយដូច្នេះថា៖ «នៅក្នុងប៉ុស្តិ៍ប៉ូលិស [ចិន] នៅឡើយទេ ព្រោះគេមិនទាន់ទាក់ទងមកយកខ្ញុំទៅដល់ខ្មែរផង ពិបាករឿងញ៉ាំ ណាមួយខ្ញុំពោះធំ ខ្ញុំចង់ទៅដល់ខ្មែរឱ្យបានលឿន»។
ឪពុកបង្កើតរបស់ក្មេងស្រីរងគ្រោះម្នាក់ទៀតដែលចាញ់បោកមេខ្យល់នាំទៅប្រទេសចិនដែរនោះ លោក យ.ប.រ បាននិយាយថា គាត់បានដាក់ពាក្យបណ្តឹងទៅការិយាល័យប្រឆាំងការជួញដូរមនុស្ស និងការពារអនីតិជន ប្រចាំនៅខេត្តបន្ទាយមានជ័យ ជិតមួយខែហើយ ឱ្យជួយអន្តរាគមន៍នាំកូនរបស់គាត់បានត្រឡប់មកកម្ពុជា ប៉ុន្តែរហូតមកដល់ថ្ងៃទី៦ ខែមករា ឆ្នាំ២០២១នេះ មិនទាន់ទទួលបានដំណឹងពីអាជ្ញាធរកម្ពុជានៅឡើយ ។
ករណីនេះ លោកបានអំពាវនាវទៅរដ្ឋាភិបាលកម្ពុជាជួយពន្លឿនកិច្ចអន្តរាគមន៍ ដើម្បីនាំកូនស្រីរបស់គាត់ឱ្យបានត្រឡប់មកម្ពុជាជួបជុំគ្រួសារវិញ ខណៈកូនស្រីគាត់កំពុងជួបបញ្ហាប្រឈមច្រើននៅពេលរស់នៅក្នុងប៉ុស្តិ៍ប៉ូលិសចិន។
លោកថា៖ «[កូនស្រីគាត់ប្រាប់ថា] នៅក្នុងហ្នឹង [ប៉ុស្តិ៍ប៉ូលិសនៅចិន] ម្ហូបអាហារចិនវាពិបាកហូប ហើយកន្លែងងូតទឹកពិបាក ហើមដៃ ហើមជើង នៅក្នុងបន្ទប់អត់មានទៅណាមកណាបានទេ អញ្ចឹងចង់ឱ្យគាត់បានមករួមរស់នៅក្នុងគ្រួសារឡើងវិញ ដូចពីមុនៗមក អត់ចង់ឱ្យទៅណាទៀតទេ»។
ចំណែកអ្នកស្រី ង.ឃ ដែលអះអាងថា ត្រូវជាម្តាយបង្កើតអ្នកនាង គ.ស.ល អាយុ១៨ឆ្នាំ ជាជនរងគ្រោះម្នាក់ទៀត ក៏បានអំពាវនាវដូចគ្នានេះដែរ ដោយគាត់ចង់ឱ្យក្រសួងនិងស្ថាប័នពាក់ព័ន្ធជួយពន្លឿននីតិវិធីក្នុងការអន្តរាគមន៍ជួយកូនគាត់ឱ្យត្រឡប់មកកម្ពុជាវិញឆាប់ៗ។
អ្នកស្រីនិយាយថា ដើមចមដែលនាំឱ្យគាត់ព្រមឱ្យកូនទៅប្រទេសចិន ដោយសារតែមេខ្យល់ដែលនាំទៅនោះសន្យារកការងារឱ្យធ្វើនៅប្រទេសនោះ។ ប៉ុន្តែអ្នកស្រីថា នៅពេលទៅដល់ប្រទេសចិនកាលពីថ្ងៃទី២១ ខែកក្កដា ឆ្នាំ២០២០ បែរជាមេខ្យល់យកទៅលក់ឱ្យបុរសជនជាតិចិន ស្ថិតនៅផ្លូវខាងលិចស្រុកណានឆាង ក្រុងណានឆាង ខេត្តជាងហ្វី និងឃុំក្នុងផ្ទះមិនឱ្យចេញទៅណាអស់រយៈពេលជិតកន្លះឆ្នាំ និងធ្វើទារុណកម្មគ្រប់រូបភាព និងបង្អត់អាហារទៀតផង។
អ្នកស្រីនិយាយថា៖ «ថ្ងៃមុនគេវាយឡើងជាំពេញខ្លួន វាឆាតបង្ហាញឱ្យម៉ែ ឱ្យបងមើល វាថាខ្ញុំគេធ្វើបាបខ្ញុំ គេបង្អត់[អាហារ]ខ្ញុំ គេមិនឱ្យយើងហូបបាយ ហូបទឹកផង ឥលូវកាលពីម្សិលមិញ គេថា ម៉ែ! រាល់ថ្ងៃមិនដឹងម៉េចទេជីវិតខ្ញុំ អាចរស់ឬក៏អត់ ឬងាប់ទៅ»។
វីអូឌី មិនអាចសុំការអត្ថាធិប្បាយជុំវិញការស្នើនេះពីរដ្ឋលេខាធិការក្រសួងមហាផ្ទៃ និងជាអនុប្រធានអចិន្រៃ្តយ៍នៃគណៈកម្មាធិការប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) លោកស្រី ជូរ ប៊ុនអេង បានទេ នៅរសៀលថ្ងៃនេះ។
អ្នកនាំពាក្យក្រសួងការបរទេស និងកិច្ចសហប្រតិបត្តិការអន្តរជាតិកម្ពុជា លោក កុយ គួង ប្រាប់ វីអូឌី តាមបណ្តាញសង្គមនៅថ្ងៃនេះថា បើតាមរបាយការណ៍ មន្ត្រីស្ថានទូតកម្ពុជាប្រចាំប្រទេសចិន បានជួបសម្ភាសស្ត្រីរងគ្រោះឈ្មោះ យ.ស.ដ.វ រួចហើយ ហើយស្ថានទូតកំពុងរៀបចំធ្វើលិខិតបើកផ្លូវ ដើម្បីបញ្ជូនគាត់មកមាតុប្រទេសវិញក្នុងពេលឆាប់ៗខាងមុខនេះ។
ដោយឡែក ទាក់ទងនឹងរឿងស្ត្រីម្នាក់ទៀត ឈ្មោះ គ.ស.ល អាយុ១៨ឆ្នាំ ដែលចាញ់បោកមេខ្យល់ដែរនោះ អ្នកនាំពាក្យក្រសួងការបរទេស លោក កុយ គួង មានប្រសាសន៍ថា នៅពេលទទួលដំណឹងថា ពលរដ្ឋខ្មែរដែលរងគ្រោះនៅបរទេស ជាពិសេសដោយសារការជួញដូរ រដ្ឋាភិបាលនិងក្រសួងការបរទេស រួមទាំងស្ថានតំណាងកម្ពុជានៅក្រៅប្រទេស តែងតែស្វះស្វែងអន្តរាគមន៍ជួយសង្គ្រោះឱ្យបានឆាប់បំផុត។
ចំណែកមេខ្យល់ លោកថា កន្លងមក អាជ្ញាធរមានសមត្ថកិច្ចទាំងពីរប្រទេស កម្ពុជា-ចិន តែងតែតាមចាប់ខ្លួនមេខ្យល់និងអ្នកពាក់ព័ន្ធមកផ្តន្ទាទោសតាមច្បាប់ មិនដែលអនុគ្រោះ លើកលែងម្តងណាឡើយ ព្រោះជាបទឧក្រិដ្ឋធ្ងន់ធ្ងរ។
មន្ដ្រីកម្មវិធីការពារសិទ្ធិពលករចំណាកស្រុកនៃអង្គការសង់ត្រាល់ លោក ឌី ថេហូយ៉ា មានប្រសាសន៍ថា បើតាមការជួបសម្ភាសជាមួយអ្នករងគ្រោះមួយចំនួនកន្លងមក ពួកគេអះអាងថា មន្ត្រីដែលបំពេញឯកសារនៅមូលដ្ឋានមួយចំនួនតូច ហាក់មានការឃុបឃិតគ្នាជាមួយមេខ្យល់ ទើបមានជនរងគ្រោះខ្លះមិនគ្រប់អាយុ ក៏អាចទៅប្រទេសចិនបានដែរ។
លោកអះអាងថា បើសិនជារដ្ឋាភិបាលនិងមន្ត្រីស្ថានទូតឬស្ថានកុងស៊ុលកម្ពុជា មិនចាត់វិធានការឱ្យមានប្រសិទ្ធភាពទេ នឹងធ្វើឱ្យប៉ះពាល់ដល់មុខមាត់រដ្ឋាភិបាល និងធ្វើឱ្យបញ្ហានេះនៅតែបន្តកើតមាននាពេលខាងមុខទៀត។
លោកមានប្រសាសន៍ថា៖ «រដ្ឋាភិបាលកម្ពុជា គួរតែធ្វើការសហការជាមួយអាជ្ញាធរចិននិងរដ្ឋាភិបាលចិន ធ្វើយ៉ាងណាចាត់វិធានការចំពោះការជួញដូរស្ត្រីខ្មែរពីកម្ពុជាទៅប្រទេសចិនឱ្យខានតែបាន។ នៅពេលដែលមានបញ្ហា អាណាព្យាបាលតំណាងឱ្យជាតិ តំណាងឱ្យប្រទេសទាំងមូល មិនចាត់វិធានការឱ្យមានប្រសិទ្ធភាពទេ វាធ្វើឱ្យកិត្យានុភាពជាតិរបស់យើងធ្លាក់ចុះ គេមើលងាយ មើលថោក ជាពិសេសរឿងទៅប្រទេសចិននោះឯង»៕