តំណាងជនជាតិដើមភាគតិចម្នាក់ដែលសកម្មក្នុងរឿងដីធ្លីនិងព្រៃឈើ គ្រោងទៅឆ្លើយបំភ្លឺនៅស្នងការដ្ឋាននគរបាលខេត្ត នៅថ្ងៃពុធស្អែក តាមការកោះហៅរបស់សមត្ថកិច្ចខេត្ត ពាក់ព័ន្ធនឹងករណីបង្ហោះសាររិះគន់រឿងទប់ស្កាត់បទល្មើសធនធានធម្មជាតិលើបណ្ដាញសង្គម។
កាលពីថ្ងៃទី០១ ខែមករា ឆ្នាំ២០២១ ស្នងការដ្ឋាននគរបាលខេត្តមណ្ឌលគិរី បានចេញលិខិតកោះហៅលោក គ្រឿង តុលា អ្នកសម្របសម្រួលបណ្តាញសហគមន៍ជនជាតិដើមភាគតិចប្រចាំខេត្តមណ្ឌលគិរី ឱ្យចូលខ្លួនទៅផ្តល់ចម្លើយនៅថ្ងៃទី០៤ ខែមករា ពាក់ព័ន្ធនឹងរឿងហេតុ «បង្ហោះសំណេរនិងរូបភាព ក្នុងគោលបំណងញុះញង់និងការប្រមាថ ធ្វើឱ្យប៉ះពាល់ដល់សេចក្ដីថ្លៃថ្នូរមន្រ្តីរាជការសាធារណៈ» តាមបណ្ដាញសង្គមហ្វេសប៊ុកកាលពីថ្ងៃទី២៤ ខែធ្នូ ឆ្នាំ២០២០។
ពាក់ព័ន្ធនឹងការកោះហៅនេះ លោក គ្រឿង តុលា ឱ្យដឹងនៅថ្ងៃអង្គារនេះថា លោកបានស្នើសុំទៅសមត្ថកិច្ច ដើម្បីពន្យារពេលចូលឆ្លើយបំភ្លឺ ដោយសារលោកជាប់រវល់។ លោកថា លោកនឹងចូលទៅឆ្លើយបំភ្លឺករណីនេះនៅថ្ងៃពុធស្អែកនេះ។
លោកបានគូសបញ្ជាក់ថា៖ «នៅក្នុងនេះ គេហៅខ្ញុំហ្នឹង រឿងញុះញង់ហើយប្រមាថអ្នករាជការសាធារណៈ ទៅលើការរិះគន់របស់ខ្ញុំ ពាក់ព័ន្ធការយកថ្មត្បូងនៅមណ្ឌលគិរីហ្នឹង»។
អ្វីដែលលោក គ្រឿង តុលា បានរៀបរាប់ក្នុងបណ្តាញសង្គមហ្វេសប៊ុក ដែលនាំឱ្យឈានដល់ការកោះហៅពីសមត្ថកិច្ចខេត្តនោះ៖
«កាលពីឆ្នាំ១៩៩៧ មានការដណ្ដើមគ្នាដឹកជញ្ជូនឈើហុប នៅឆ្នាំ២០០៦ ដីឡើងថ្លៃ ក៏ប្រជែងគ្នាទន្រ្ទានយកដី ខណៈបច្ចុប្បន្ននេះ រត់ជាន់ជើងគ្នាដឹកថ្មវិញម្ដង នៅពេលអស់ពីធនធានធម្មជាតិ ប្រហែលលក់ទាំងប្រពន្ធកូនទៀត»។
លោកក៏បានសរសេរបន្ថែមក្នុងបណ្តាញសង្គមទៀតថា «សូមលោកអភិបាលខេត្ត ស្វាយ សំអ៊ាង បើកត្រចៀកនិងភ្នែកមើលឱ្យឃើញបញ្ហាទាំងនេះ និងមានចិត្តស្រលាញ់ជាតិពិតប្រាកដ»។
វីអូឌី មិនអាចសុំការអត្ថាធិប្បាយពីលោក ឡោ សុខា ស្នងការនគរបាលខេត្តមណ្ឌលគិរីបានទេ នៅថ្ងៃអង្គារនេះ ដោយលោកថា កំពុងជាប់បេសកកម្មនៅក្នុងព្រៃ៕
