សមត្ថកិច្ចជំនាញ បានឃាត់ខ្លួនជនសង្ស័យម្នាក់ពាក់ព័ន្ធករណីបាញ់សម្លាប់មន្ត្រីនគរបាលមួយរូប នៅក្នុងខណ្ឌពោធិ៍សែនជ័យ រាជធានីភ្នំពេញ ខណៈសមត្ថកិច្ចខេត្តកណ្តាល ក៏បានបញ្ជូនជនសង្ស័យម្នាក់ទៅតុលាការ ក្រោយមានទំនាស់រឿងគ្រោះថ្នាក់ចរាចរណ៍ដូចគ្នានេះ។
មន្ត្រីនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ លោក រ៉េត ស៊ីណែត អាយុ៣៩ឆ្នាំ ត្រូវបានខ្មាន់កាំភ្លើងបាញ់ចំនួន២គ្រាប់ចំដងខ្លួន និង១គ្រាប់ចំក្បាល បណ្ដាលឱ្យស្លាប់នៅនឹងកន្លែងកើតហេតុ កាលពីយប់រំលងអធ្រាត្រឈានចូលថ្ងៃទី៣០ ខែធ្នូ ឆ្នាំ២០២០ ស្ថិតតាមបណ្ដោយផ្លូវសហព័ន្ធរុស្ស៊ី នៅមុខព្រលានយន្តហោះអន្តរជាតិភ្នំពេញ ក្រោយមានទំនាស់ជុំវិញបញ្ហាគ្រោះថ្នាក់ចរាចរណ៍។
ស្នងការនគរបាលខេត្តបាត់ដំបង លោក សាត គឹមសាន ប្រាប់ វីអូឌី នៅថ្ងៃចន្ទនេះថា សមត្ថកិច្ចខេត្តបាត់ដំបង បានសហការណ៍ជាមួយសមត្ថកិច្ចជំនាញមកពីរាជធានីភ្នំពេញ កាលពីថ្ងៃម្សិលមិញ បានឃាត់ខ្លួនបុរសអ្នកបើករថយន្ត Luxus Rx300 ពណ៌ខ្មៅដែលដឹកខ្មាន់កាំភ្លើងក្នុងករណីបាញ់សម្លាប់មន្រ្តីនគរបាលព្រហ្មទណ្ឌរាជធានីភ្នំពេញ។
ស្នងការរូបនេះបន្តថា ជនសង្ស័យ ឈ្មោះ កែ ចាន់មាន អាយុ២៤ឆ្នាំ មានទីលំនៅភូមិអន្លង់វិល ឃុំអន្សា ស្រុកកណ្តៀង ខេត្តពោធិ៍សាត់ ជាអ្នកបើករថយន្ត LuxusRx300 ពណ៌ខ្មៅ បានទៅសម្ងំលាក់ខ្លួននៅចំណុចសង្កាត់ទួលតាឯក ក្រុងបាត់ដំបង។
លោក សាត គឹមសាន បន្ថែមថា ក្រោយចាប់ខ្លួន ជនសង្ស័យត្រូវបានបញ្ជូនទៅរាជធានីភ្នំពេញភ្លាមៗកាលពីម្សិលមិញ ដើម្បីចាត់វិធានការបន្តតាមនីតិវិធីច្បាប់ និងកំពុងស្វែងរកចាប់ជនសង្ស័យម្នាក់ទៀត។
លោកបន្ថែមថា៖ «ម្សិលមិញ យើងឃាត់បានម្នាក់ ហើយដែលច្បាស់លាស់នោះ គឺឃាត់ខ្លួនអ្នកបើកឡានលុចស៊ីសនោះទេ គ្រាន់តែឃាត់ហើយបញ្ជូនទៅភ្នំពេញតែម្តង»។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន្ត សុខសីហា សុំមិនបកស្រាយច្រើនលើករណីនេះទេ ដោយលោកថា ទុកឱ្យសមត្ថកិច្ចជំនាញធ្វើការងារនេះសិន។
របាយការណ៍របស់នគរបាលខណ្ឌពោធិ៍សែនជ័យ បានឱ្យដឹងក្រោយកើតហេតុការណ៍នេះកាលពីសប្តាហ៍មុនថា ខ្មាន់កាំភ្លើងបានប្រើប្រាស់កាំភ្លើងខ្លីមួយដើមដែលមិនស្គាល់ប្រភេទ ហើយបានបាញ់ប្រហារចំនួន៩គ្រាប់ទៅលើមន្ត្រីនគរបាល ឈ្មោះ រ៉េត ស៊ីណែត ខណៈជនរងគ្រោះរូបនេះបានដកកាំភ្លើង Glock19 មួយដើម ភ្ជង់ទៅលើខ្មាន់កាំភ្លើងនៅក្នុងហេតុការណ៍គ្រោះថ្នាក់ចរាចរណ៍។
ចំណែកសមត្ថកិច្ចខេត្តកណ្តាល នៅថ្ងៃចន្ទនេះ ក៏បានបញ្ជូនបុរសជនសង្ស័យម្នាក់ទៅសាលាដំបូងខេត្តកណ្តាលផងដែរ ក្រោយគ្រោះថ្នាក់ចរាចរណ៍ ហើយបានផ្ទុះអាវុធជាមួយសមត្ថកិច្ច។
ស្នងការដ្ឋាននគរបាលខេត្តកណ្តាល បានឱ្យដឹងក្នុងទំព័រហ្វេសប៊ុកថា ហេតុការណ៍នេះបានកើតឡើងកាលពីថ្ងៃសៅរ៍ ទី២ ខែមករានេះ ដោយជនសង្ស័យម្នាក់ឈ្មោះ ពៅ ហុង អាយុ២៧ឆ្នាំ បានបើករថយន្តធុនធំ បុកបង្គោលភ្លើងចំនួន៣បង្គោល និងដាច់ខ្សែភ្លើងប្រមាណ៦០ម៉ែត្រ។
ស្នងការខេត្តបន្តថា ក្រោយការឃាត់ខ្លួននិងរង់ចាំការដោះស្រាយ ស្រាប់តែជនសង្ស័យរូបនេះ បានរត់ចូលបន្ទប់ការិយាល័យប៉ុស្តិ៍សំពៅពូន និងបានយកកាំភ្លើងសមត្ថកិច្ចដែលទុកក្នុងនោះ បាញ់រះជាច្រើនគ្រាប់មកលើសមត្ថកិច្ច។
តែយ៉ាងណា ស្នងការខេត្តបញ្ជាក់ថា ក្រោយការបង្ក្រាបនិងប្រើប្រាស់វិធានការដើម្បីទម្លុះទ្វារចូលទៅក្នុងការិយាល័យប៉ុស្តិ៍នោះ សមត្ថកិច្ចក៏បានឃាត់ខ្លួនជនសង្ស័យបាននៅយប់ថ្ងៃដដែលនោះ ដោយបច្ចុប្បន្ន សមត្ថកិច្ចជំនាញបានបញ្ជូនជនសង្ស័យទៅតុលាការ ដើម្បីចាត់ការបន្តតាមនីតិវិធីច្បាប់។
អ្នកនាំពាក្យសាលាដំបូងខេត្តកណ្តាល លោក សូ សារិន ប្រាប់វីអូឌីថា ជនបង្កគ្រោះថ្នាក់ចរាចរណ៍និងប្រើប្រាស់អាវុធបាញ់ទៅលើសមត្ថកិច្ចនៅខេត្តកណ្តាលនោះ ឈ្មោះ ពៅ ហុង ត្រូវបានចៅក្រមសម្រេចឱ្យឃុំខ្លួនហើយ ដោយចោទប្រកាន់ពីបទ«ប៉ុនប៉ងឃាតកម្មប្រឆាំងអ្នករាជការសាធារណៈ និងប្រើប្រាស់អាវុធដោយគ្មានការអនុញ្ញាត»។
នាយករងអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា ក្នុងឆ្នាំ២០២០ ការប្រើប្រាស់កាំភ្លើងសម្រាប់បាញ់ប្រហារនិងគំរាមកំហែងគ្នាបានកើតឡើងជាបន្តបន្ទប់។ លោកថា បញ្ហានេះកើតឡើងដោយសារតែការគ្រប់គ្រងអាវុធនិងការអនុវត្តច្បាប់មិនទាន់បានល្អ។
លោកបន្ថែមថា៖ «វាជាការបង្ហាញមួយអំពីការគ្រប់គ្រងអាវុធមិនបានល្អ ពីព្រោះយើងសង្កេតឃើញថា មានការប្រើប្រាស់អនាធិបតេយ្យច្រើន ហើយបានបង្កឱ្យមានការភ័យខ្លាចដល់ប្រជាពលរដ្ឋ។ អ៊ីចឹងអាជ្ញាធរពាក់ព័ន្ធគួរតែពង្រឹងទៅលើយន្តការនៃការគ្រប់គ្រងអាវុធជាតិផ្ទុះ និងអនុវត្តច្បាប់ហ្នឹងឱ្យបានតឹងរ៉ឹង»៕