តំណាងសហជីពនិងសមាគមប្រមាណ២០នាក់មកពីស្ថាប័នចំនួន៤ បានរកកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន ជួយឱ្យមានការដោះលែងលោក រ៉ុង ឈុន ឱ្យមានសេរីភាពវិញ ប៉ុន្តែមន្ត្រីខុទ្ទកាល័យមិនទទួលយកញត្តិសុំអន្តរាគមន៍នោះឡើយ។
សហជីពនិងសមាគមទាំង៤នោះ រួមមាន សហភាពសហជីពកម្ពុជា សហព័ន្ធសហជីពកម្ពុជា សមាគមគ្រូបង្រៀនកម្ពុជាឯករាជ្យ និងសហព័ន្ធនិស្សិតបញ្ញវន្តកម្ពុជា។
ប្រធានស្តីទីសហភាពសហជីពកម្ពុជា អ្នកស្រី យ៉ាង សុភ័ណ្ឌ មានប្រសាសន៍នៅក្បែរខុទ្ទកាល័យនាយករដ្ឋមន្ត្រី ក្បែរវត្តបទុមវតី រាជធានីភ្នំពេញ ថាកាលដែលពួកគាត់នាំគ្នាប្រមូលផ្តុំដាក់ញត្តិទៅខុទ្ទកាល័យនាយករដ្ឋមន្ត្រីនេះ គឺដើម្បីសុំអន្តរាគមន៍ពីលោក ហ៊ុន សែន ជួយឱ្យមានការដោះលែងនិងទម្លាក់ចោលការចោទប្រកាន់លើលោក រ៉ុង ឈុន ដោយថា លោក រ៉ុង ឈុន ពុំមានកំហុសដូចការចោទប្រកាន់។
អ្នកស្រីបន្តថា លោក រ៉ុង ឈុន ជាមនុស្សឆ្នើមមួយរូបដែលតែងតែហ៊ាននិយាយរិះគន់រដ្ឋាភិបាល ធ្វើសកម្មភាពការពារផលប្រយោជន៍ និងសិទ្ធិសេរីភាពស្របច្បាប់ជូនកម្មករ ប្រជាពលរដ្ឋ និងសង្គមជាតិ ប៉ុន្តែបែរជាត្រូវបានគេចាប់និងឃុំខ្លួនយ៉ាងអយុត្តិធម៌ទៅវិញ។
អ្នកស្រីនិយាយថា៖ «ខ្ញុំមើលឃើញថា ករណីលោកគ្រូ រ៉ុង ឈុន គឺគាត់រងនូវអំពើអយុត្តិធម៌ណាស់ ដោយសារគាត់បានដើរតួនាទីក្នុងនាមជាគ្រូបង្រៀន គាត់ជាតំណាងកម្មករ ហើយគាត់ជាពលរដ្ឋមួយរូបដែលបានឈឺឆ្អាលនឹងរឿងប្រទេសជាតិ ខ្ញុំគិតថាគាត់ធ្វើមិនខុសទេ។ ហើយខ្ញុំចង់ឱ្យប្រជាពលរដ្ឋខ្មែរទាំងមូល ជួយវិនិច្ឆ័យថា តើទង្វើដែលគាត់បានធ្វើហ្នឹងជាទង្វើខុសច្បាប់ឬយ៉ាងម៉េច»។
ពាក់ព័ន្ធនឹងការដាក់ញត្តិរបស់ក្រុមសហជីពនិងសមាគមនៅព្រឹកមិញនេះ មន្ត្រីខុទ្ទកាល័យនាយករដ្ឋមន្ត្រី មិនទទួលយកញត្តិរបស់ពួកគេនោះទេ ក្រោមហេតុផលថា ញត្តិនោះធ្វើមិនត្រឹមត្រូវតាមបែបបទរដ្ឋបាលរបស់ខុទ្ទកាល័យ និងខុសបច្ចេកទេស។
មន្ត្រីខុទ្ទកាល័យនាយករដ្ឋមន្ត្រី លោក គង់ ចំរើន បានពិនិត្យមើលញត្តិ ហើយបានប្រគល់ជូនតំណាងសហជីពនិងសមាគមវិញ។ លោកបានស្នើឱ្យធ្វើសារថ្មីទៅតាមបែបបទរដ្ឋបាលនិងបច្ចេកទេស ប៉ុន្តែលោកមិនបានបង្ហាញជាគំរូឡើយ។
លោកបន្ថែមថា៖ «ពីព្រោះនៅក្នុងញត្តិនេះ យើងដាក់ពួកគាត់ដែលសំណូមពរសុទ្ធតែសមាជិកអញ្ចឹង យើងត្រូវមានបញ្ជីហ្នឹងមួយដោយឡែក បានបញ្ជាក់ថា គាត់អាចស្នើសុំបាន។ មួយទៀត បើក្រមព្រហ្មទណ្ឌ បើកាលណាអង្គការយើងអត់មានពាក់ព័ន្ធនឹងការទទួលខុសត្រូវក្នុងរឿងបទល្មើសព្រហ្មទណ្ឌទេ យើងមិនអាចស្នើសុំអញ្ចឹងបានទេ។ មួយទៀត យើងសរសេរកម្មវត្ថុស្នើសុំឱ្យគាត់នៅក្រៅឃុំជាបណ្តោះអាសន្នបាន នៅក្នុងរឿងយើងជាជនត្រូវចោទ។ អញ្ចឹងត្រូវទៅកែឡើងវិញទើបអាចទទួលបាន បើធ្វើបែបនេះ មិនអាចទទួលបានទេ»។
ប្រធានសមាគមគ្រូបង្រៀនកម្ពុជាឯករាជ្យ លោកស្រី អ៊ុក ឆាយ៉ាវី បានបង្ហាញការខកចិត្តចំពោះមន្ត្រីខុទ្ទកាល័យដែលមិនទទួលញត្តិរបស់ពួកគាត់។ អ្នកស្រីថា ការមិនទទួលនេះជាចេតនាមួយមិនចង់ឱ្យមានការដោះលែង និងដាក់ទោសលោក រ៉ុង ឈុន យ៉ាងអយុត្តិធម៌ទៀត។
ប្រធានសមាគមរូបនេះចាត់ទុកករណីបន្តឃុំខ្លួនលោក រ៉ុង ឈុន នេះ ថាជាការគំរាមកំហែងដល់ទៅអ្នកដែលធ្វើការងារផ្នែកការពារសិទ្ធិគ្រូបង្រៀន សិទ្ធិកម្មករ និងជាការរឹតត្បិតសិទ្ធិសេរីភាពពួកគេថែមទៀត។
អ្នកស្រីបន្ថែថា៖ «ថ្ងៃនេះ យើងបានដាក់លិខិតសុំឱ្យនាយករដ្ឋមន្ត្រីដោះលែងលោក រ៉ុង ឈុន ឱ្យនៅក្រៅឃុំ ប៉ុន្តែអកុសល មន្ត្រីខុទ្ទកាល័យមិនទទួលញត្តិយើង ថាយើងធ្វើខុសនីតិវិធី ប៉ុន្តែគាត់មិនបានបង្រៀនយើងពីរបៀបធ្វើដែលគាត់ចង់បានទេ»។
មេដឹកនាំសហជីពមួយ និងជាសមាជិកក្រុមប្រឹក្សាឃ្លាំមើលកម្ពុជា លោក រ៉ុង ឈុន ត្រូវបានចាប់ខ្លួនកាលពីថ្ងៃទី៣១ ខែកក្កដា ឆ្នាំ២០២០ ហើយប៉ុន្មានថ្ងៃក្រោយមក លោកត្រូវបានតុលាការចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សង្គម» ពាក់ព័ន្ធនឹងការលើកឡើងពីការបោះបង្គោលព្រំដែនកម្ពុជាជាមួយប្រទេសវៀតណាម ដែលលោកនិយាយថា បានធ្វើឱ្យប៉ះពាល់ដីស្រែរបស់ពលរដ្ឋនៅក្នុងខេត្តត្បូងឃ្មុំ។ បច្ចុប្បន្ន លោក រ៉ុង ឈុន ត្រូវបានតុលាការបង្គាប់ឱ្យឃុំខ្លួនបណ្តោះអាសន្ននៅពន្ធនាគារព្រៃស ក្នុងរាជធានីភ្នំពេញ ដើម្បីរង់ចាំសវនាការ៕