លោកនាយករដ្ឋមន្ត្រី ហ៊ុន សែន បានលើកឡើងថា ចំណូលដែលបានមកពីការផលិតប្រេងដំបូងរបស់កម្ពុជា នឹងយកទៅប្រើប្រាស់ជាអាទិភាពក្នុងវិស័យអប់រំនិងវិស័យសុខាភិបាល។
នៅក្នុងការថ្លែងសារពិសេសមួយនៅថ្ងៃអង្គារនេះ លោកនាយករដ្ឋមន្ត្រី ហ៊ុន សែន បានប្រកាសថា កម្ពុជាបានចាប់ផ្តើមផលិតដំណក់ប្រេងលើកដំបូងរបស់ខ្លួននៅឈូងសមុទ្រក្នុងខេត្តព្រះសីហនុ នៅថ្ងៃទី២៩ ខែធ្នូ ឆ្នាំ២០២០នេះ។
លោកបន្តថា៖ «លុយបានមកពីប្រេង ខ្ញុំនឹងឆ្លើយប្រាប់ថា ខ្ញុំនឹងផ្ដល់អាទិភាពទៅលើវិស័យអប់រំនិងសុខាភិបាល»។
លោកនាយករដ្ឋមន្ត្រី ហ៊ុន សែន បានគូសបញ្ជាក់ដែរថា ការផលិតប្រេងរបស់កម្ពុជានៅ «ប្លុក A» នេះ ពុំមានពាក់ព័ន្ធនៅតំបន់ត្រួតស៊ីគ្នាជាមួយប្រទេសថៃនោះទេ ពោលគឺមានចម្ងាយតែប្រមាណ១៦០គីឡូម៉ែត្រពីក្រុងព្រះសីហនុ ខណៈតំបន់នេះមានចម្ងាយពីប្រទេសថៃប្រមាណជាង៣០០គីឡូម៉ែត្រ។
លោកបានបន្ថែមទៀតថា ក្រៅពីចំណូលបានមកពីតំណក់ប្រេងនេះនៅពេលខាងមុខ កម្ពុជាក៏មានប្រភពចំណូលបានមកពីធនធានធម្មជាតិផ្សេងៗបន្ថែមទៀតដែរ ដូចជា ប្រភពចំណូលបានពីរ៉ែមាសនិងចំណូលពីធ្យូងថ្មនៅខេត្តឧត្តរមានជ័យ ជាដើម៕