ប្រជាពលរដ្ឋ១៥គ្រួសារ នៅស្រុកស្ទឹងហាវ បានស្នើឱ្យអាជ្ញាធរដោះស្រាយបញ្ហាវិវាទដីធ្លីរបស់ពួកគេ ដោយពួកគេលើកឡើងថា បានរស់នៅលើដីនោះតាំងពីនៅជាដីព្រៃ។
លោក ឋុន បុណ អាយុ៣៥ឆ្នាំ ប្រកបរបរអារឈើ បានប្រាប់ថា លោកបានរស់នៅលើដីនោះជាងម្ភៃឆ្នាំមកហើយ ហើយបានព្យាយាមធ្វើប្លង់ច្រើនដងតាំងពីដីនៅជាដីព្រៃនៅឡើយ ប៉ុន្តែលោកថា ខាងសង្កាត់ប្រាប់ឱ្យរស់នៅសិនទៅ ដោយមិនចាំបាច់ធ្វើនោះទេ។
ពលរដ្ឋរូបនេះបន្តថា នៅពេលដែលដីនោះត្រូវបានកាត់ទៅជាដីភូមិមក គឺចាប់ផ្ដើមមានអ្នកមកប្រាប់ថាជាដីកម្មសិទ្ធិបន្តបន្ទាប់។
លោក បុណ បន្ថែមថា ភាគីដែលអះអាងជាម្ចាស់ដី បានហៅលោកទៅដោះស្រាយលើបញ្ហានេះ ដោយទាមទារឱ្យលោកធ្វើប្លង់លើក្បាលដីទំហំតែ១០ម៉ែត្រ ទើបបានអនុញ្ញាត ខណៈដែលគ្រួសាររបស់លោកមានដីរហូតដល់៥០ម៉ែត្រ ដែលឪពុកលោកបន្សល់ទុកឱ្យ។
លោក ឋាន បុណ និយាយថា៖ «ស្នើសុំខាងអាជ្ញាធរ ខាងស្អីហ្នឹង មកជួយដោះស្រាយច្បាស់លាស់»។
លោក ទូច ឃីម អាយុ៥៧ឆ្នាំ ប្រកបរបរជាជាងធ្វើផ្ទះ បានប្រាប់ថា លោកបានរស់នៅទីនោះជាង២៧ឆ្នាំហើយ ហើយលោកថា ដីនេះ ពីដំបូងជាកម្មសិទ្ធិរបស់បុរសម្នាក់ឈ្មោះ ចាន់ ថា តែបុរសនោះបានប្រាប់លោកថា ដីតិចតួចនេះទុកឱ្យលោករស់នៅចុះ។
ពលរដ្ឋរូបនោះនិយាយទៀតថា អំឡុងឆ្នាំ២០០០ លោក ចាន់ ថា បានលក់ដីនេះឱ្យទៅម្ចាស់ថ្មីដែលកំពុងមានជម្លោះបច្ចុប្បន្ននេះ តែក៏មិនដែលមានរឿងអ្វីកើតឡើង ទើបតែកាលពីថ្ងៃពុធកន្លងមកនេះ មានមនុស្សប្រហែលជិត២០នាក់ បានទៅកាប់បំផ្លាញដំណាំ រករឿងប្រជាពលរដ្ឋដែលរស់នៅទីនោះ។
លោកបន្តថា ខាងម្ចាស់ដីបានហៅលោកទៅដោះស្រាយដោយផ្ដល់ជាសំណងខ្លះដែរ តែលោកមិនយល់ព្រមនោះទេ ដោយសារតែវាតិចតួចពេក។ បើតាមលោក ឃីម ពលរដ្ឋចំនួន១៥គ្រួសារកំពុងមានវិវាទដីធ្លីនៅក្នុងភូមិមួយ ស្ថិតក្នុងឃុំទំនប់រលក។
លោកបញ្ជាក់ថា ដីដែលលោករស់នៅបច្ចុប្បន្នមិនមានប្លង់កាន់កាប់ទេ លោកបានព្យាយាមទៅធ្វើនៅសាលាឃុំច្រើនដងហើយ តែអាជ្ញាធរមិនព្រមធ្វើឱ្យ ដោយលើកឡើងថា ដីនោះជាដីកម្មសិទ្ធិរបស់លោកស្រី លីវ សំបូរ។
លោក ទូច ឃីម និយាយថា៖ «ជួយដោះស្រាយឱ្យបានទូលំទូលាយ កុំឱ្យចង្អៀតចង្អល់អញ្ចឹងពេក»។
មេភូមិ១ នៅក្នុងឃុំទំនប់រលក លោក គីម ហាក់ បាននិយាយថា ពីដើមឡើយមានតែពលរដ្ឋ៥គ្រួសារប៉ុណ្ណោះរស់នៅលើដីទំហំជិត១ហិកតានេះ។ មេភូមិរូបនេះបញ្ជាក់ថា ដីនេះកាន់កាប់ដោយលោក អេង ចាន់ថា ដែលក្រោយមកបានលក់នៅឆ្នាំ២០០៤ឬឆ្នាំ២០០៥ ទៅឱ្យអ្នកស្រី លីវ សំបូរ ដែលជាភរិយារបស់មន្ត្រីយោធាផ្កាយពីរមួយរូប។
លោកថា នៅពេលដែលលក់ លោក ចាន់ថា បានប្រាប់ទៅកាន់អ្នកស្រី សំបូរ ឱ្យជួយសម្រួលកាត់ក្បាលដីទៅឱ្យប្រជាជនទាំង៥គ្រួសារនោះ ហើយពួកគេក៏បានព្រមព្រៀងគ្នាចុះកិច្ចសន្យាទទួលយកក្បាលដី១០ម៉ែតរៀងៗខ្លួន ក៏ប៉ុន្តែក្រោយមក ដោយសាររស់នៅយូរៗទៅ ក៏ចាប់ផ្ដើមកាន់កាប់ដីច្រើនជាងមុន លើសពីអ្វីដែលគេផ្ដល់ឱ្យ ហើយខ្លះក៏បានលក់ឱ្យអ្នកផ្សេងទៀតទាំងអាជ្ញាធរមិនទទួលស្គាល់។
លោក គីម ហាក់ និយាយថា៖ «ដោះស្រាយប៉ុន្មានខែមុន ម្ចាស់ដើមគេថែមឱ្យ២ម៉ែត្រទៀត ក្នុងចំណោមម្ចាស់ដើម៥គ្រួសារហ្នឹង។ ម្ចាស់៥គ្រួសារហ្នឹង គាត់អត់ព្រម តែខាងស្រុកក៏ស្ងាត់ស្ងៀមទៅ គ្មានដំណោះស្រាយអីទៀត គាត់ចេះតែថា ដីគាត់កាន់កាប់ប៉ុណ្ណា គាត់យកប៉ុណ្ណឹង។ អ៊ីចឹងវាអត់ត្រូវគ្នា។»
អ្នកស្រី លីវ សំបូរ ដែលអះអាងថាជាម្ចាស់កម្មសិទ្ធិដីមានវិវាទនេះ ប្រាប់ថា បញ្ហាប្រជាពលរដ្ឋដែលរស់នៅលើដីនេះរយៈពេលយូរ តែពុំមានប្លង់កម្មសិទ្ធិ ខាងអាជ្ញាធរកំពុងតែកោះហៅអ្នកស្រីនិងពលរដ្ឋទាំងនោះទៅពិភាក្សា ដើម្បីរកដំណោះស្រាយហើយ។
អ្នកស្រី លីវ សំបូរ ប្រាប់ថា៖ «ការងារនេះ គេកំពុងតែហៅឡើងទៅដោះស្រាយ»។
លោក ឆាយ សុគន្ធដា អភិបាលស្រុកស្ទឹងហាវ ប្រាប់ថា លោកបានចាត់ឱ្យអភិបាលរងស្រុកចុះទៅដោះស្រាយលើករណីនេះដោយផ្ទាល់ក្នុងថ្ងៃនេះ តែដោយសារតែលោកអភិបាលរងជាប់រវល់ ក៏សូមលើកពេលទៅថ្ងៃក្រោយវិញ លោកថា នៅមិនទាន់ទទួលដំណឹងពីអភិបាលរងរូបនោះទេ ថាតើគាត់នឹងចុះទៅថ្ងៃណាបន្ទាប់។
លោកបន្ថែមថា បញ្ហាវិវាទដីធ្លីនៅភូមិមួយ ឃុំទំនប់រលកនេះ គឺកើតមានជាយូរមកហើយ ប៉ុន្តែត្រូវបានស្ងប់ស្ងាត់វិញ បន្ទាប់ពីអាជ្ញាធរចុះអន្តរាគមន៍។
លោកបន្តទៀតថា ភាគីខាងម្ចាស់ដីយល់ព្រមដោះស្រាយជាមួយតែប្រជាជនដែលរស់នៅលើដីនោះជាយូរហើយប៉ុណ្ណោះ តែសម្រាប់អ្នកដែលទើបមកសង់ទីលំនៅ គេមិនព្រមសម្របសម្រួលឱ្យនោះទេ។
លោក ឆាយ សុគន្ធដា ប្រាប់ថា៖ «ចាំមើលអភិបាលរងគាត់ហៅមក តើប្រជាជនអ្នកនៅចាស់ឬក៏អ្នកថ្មី។ មេភូមិឃុំ គេសុទ្ធតែដឹង។ សំខាន់បងប្អូនហៅដោះស្រាយគ្នាទៅ ព្រោះអីខាងហ្នុងគេថាអត់អីទេ បើប្រជាជនចាស់ គេត្រូវចែករំលែកឱ្យទៅ អីៗដែរ មិនមែនអត់ទេ»៕
