អ្នកនាំពាក្យគណបក្សប្រជាជនកម្ពុជា និងមន្ត្រីជាន់ខ្ពស់រាជរដ្ឋាភិបាល បានថ្លែងថា ការតែងតាំងកូនប្រុស៣រូបរបស់លោក សុខ អាន គឺជាការរៀបចំស្នងដំណែងបន្តវេនពីមន្ត្រីចាស់ៗ។
លោក សុខ អាន ដែលបានទទួលមរណភាពក្នុងឆ្នាំ២០១៧ គឺជាអ្នកនយោបាយដ៏មានឥទ្ធិពលម្នាក់របស់ប្រទេសកម្ពុជា ដែលបានកាន់កាប់ស្ថាប័នរដ្ឋជាច្រើន ហើយលោកត្រូវបានគេចាត់ទុកជាដៃស្តាំរបស់លោកនាយករដ្ឋមន្ត្រី ហ៊ុន សែន។
ក្នុងព្រះរាជក្រឹត្យចំនួន៣ដាច់ដោយឡែកពីគ្នាកាលពីសប្តាហ៍មុន ព្រះករុណាសម្ដេច ព្រះបាទនរោត្ដម សីហមុនី បានត្រាស់បង្គាប់តែងតាំងលោក សុខ សូកាន ជារដ្ឋលេខាធិការនៅក្រសួងរៀបចំដែនដី លោក សុខ សូកេន ជារដ្ឋលេខធិការក្រសួងការបរទេស និងលោក សុខ សង្វារ ជាអនុរដ្ឋលេខាធិការនៅក្រសួងទេសចរណ៍។
ការត្រាស់បង្គាប់តែងតាំងកូនប្រុសទាំង៣របស់លោក សុខ អាន នេះ ត្រូវបានធ្វើឡើងទៅតាមសំណើរបស់លោកនាយករដ្ឋមន្ត្រី ហ៊ុន សែន។
អ្នកនាំពាក្យរាជរដ្ឋាភិបាល លោក ផៃ ស៊ីផាន បានថ្លែងថា៖ «ទីមួយ យើងដឹងថា គឺយើងត្រៀមលក្ខណៈបន្តវេន្ត។ នេះសារៈសំខាន់ណាស់ ដោយសារតែមន្ត្រីនីមួយៗហ្នឹង គាត់មានអាយុខ្ទង់ ៧០ឆ្នាំទៅហើយ ដើម្បីត្រៀមលក្ខណៈទាំងអស់ហ្នឹង។ ការស្នងតំណែងនេះជារឿងសំខាន់បំផុត ព្រោះនៅពេលមន្ត្រីម្នាក់ៗឈានដល់អាយុ៧០ឆ្នាំ យើងរៀបចំអ្នកស្នងតំណែង»។
អ្នកនាំពាក្យគណៈបក្សប្រជាជនកម្ពុជា លោក សុខ ឥសាន បានថ្លែងថា វាជាជំហានមួយនៅក្នុងគណបក្សដែលប្រគល់អំណាចដល់មនុស្សជំនាន់ថ្មី។
លោក សុខ ឥសាន បានបញ្ជាក់ថា៖ «ការកសាងជួរយុវជនជាទំពាំងស្នងឫស្សី សុទ្ធតែជាលក្ខណៈដើម្បីបន្តវេន្ត»។
អ្នកវិភាគសង្គម លោក សេង សារី បានលើកឡើងថា ការតែងតាំងចុងក្រោយនេះគឺជាផ្នែកមួយនៃផែនការបន្តវេនរបស់គណបក្សប្រជាជនកម្ពុជា។
លោក សារី បានមានប្រសាសន៍ថា៖ «នេះគឺជាការផ្ទេរអំណាចទៅមនុស្សជំនាន់ក្រោយនៅក្នុងគណបក្សប្រជាជនកម្ពុជា។ មុខតំណែងដែលផ្តល់ឱ្យមនុស្សជំនាន់ថ្មី ឆ្លុះបញ្ចាំងពីអំណាចដែលឪពុករបស់ពួកគេមាន»។
លោកបានបន្តថា ពួកគេផ្ទេរអំណាចតាមរយៈការងារកន្លងមករបស់ឪពុកពួកគេនៅក្នុងរដ្ឋាភិបាល។ ឧទាហរណ៍ ប្រសិនបើពួកគេជាកូនប្រុសរបស់ឧបនាយករដ្ឋមន្រ្តី ពួកគេនឹងត្រូវបានតំឡើងឋានៈជារដ្ឋមន្រ្តី ឬរដ្ឋលេខាធិការ។
លោក សុខ សូកាន ដែលជាសមាជិកសភាមួយរូបនោះ បានសិក្សារៀនសូត្រនៅសាកលវិទ្យាល័យ Columbia នៅសហរដ្ឋអាមេរិក មហាវិទ្យាល័យគោលនយោបាយសាធារណៈ លី ខ្វាន់យូ នៃសាកលវិទ្យាល័យជាតិសិង្ហបុរី និងសាកលវិទ្យាល័យមែលប៊ន។
លោក សូកេន ដែលពីមុនបានបម្រើការងារនៅក្រសួងការបរទេសនិងពាណិជ្ជកម្ម បានសិក្សារៀនសូត្រនៅអូស្ត្រាលី សហរដ្ឋអាមេរិក សិង្ហបុរី និងចិន។
លោក សុខ សង្វារ បានកាន់អំណែងជាអគ្គនាយករងអាជ្ញាធរជាតិអប្សរាអស់រយៈពេល៧ឆ្នាំ។
ចំណែកលោក សុខ ពុទ្ធីវុធ ដែលជាកូនប្រុសមួយរូបទៀតរបស់លោក សុខ អាន គឺជាពាណិជ្ជករដ៏សំខាន់មួយរូបដែលបានរៀបការជាមួយអ្នកស្រី ហ៊ុន ម៉ាលី កូនស្រីរបស់លោកនាយករដ្ឋមន្ត្រី ហ៊ុន សែន។
ទន្ទឹមគ្នានេះ អ្នកស្រី សុខ សោមា កូនស្រីរបស់លោក សុខ អាន គឺជាប្រធានសម្ព័ន្ធក្រុមហ៊ុន Soma Group ដែលរកស៊ីខាងវិស័យអប់រំ ហេដ្ឋារចនាសម្ព័ន្ធថាមពល កសិកម្ម និងអភិវឌ្ឍន៍អចលនទ្រព្យ។
កាលពីថ្ងៃសុក្រសប្ដាហ៍មុន អ្នកស្រី បាន ស្រីមុំ ត្រូវបានតែងតាំងជាអភិបាលខេត្តប៉ៃលិន។ អ្នកស្រី បាន ស្រីមុំ គឺជាតំណាងរាស្ត្រ និងជាភរិយាអតីតអភិបាលខេត្តប៉ៃលិន លោក អ៊ី ឈាន អតីតអង្គរក្សមេដឹកនាំខ្មែរក្រហម ប៉ុល ពត ដែលបន្តធ្វើសង្គ្រាមនៅខេត្តមួយក្រោយការដួលរលំនៅឆ្នាំ១៩៧៩៕
