សម្ព័ន្ធអ្នកសារព័ត៌មានកម្ពុជា (ខេមបូចា) បង្ហាញការព្រួយបារម្ភយ៉ាងខ្លាំងពីការធ្លាក់ចុះនៃសេរីភាពប្រព័ន្ធផ្សព្វផ្សាយ ក្រោយពីតុលាការខេត្តកំពង់ឆ្នាំងសម្រេចផ្តន្ទាទោសម្ចាស់ស្ថានីយវិទ្យុមួយដាក់ពន្ធនាគារ២០ខែ។
ក្នុងលិខិតចំហរបស់សម្ព័ន្ធអ្នកសារព័ត៌មានកម្ពុជា បានឱ្យដឹងថា កាលពីថ្ងៃម្សិលមិញនេះ សាលាដំបូងខេត្តកំពង់ឆ្នាំង បានសម្រេចផ្តន្ទាទោសម្ចាស់ស្ថានីយវិទ្យុ និងគេហទំព័ររិទ្ធិសែន លោក សុខ ឧត្តម ក្រោមបទចោទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» ឱ្យជាប់ពន្ធនាគាររយៈពេល២០ខែ និងពិន័យជាប្រាក់២០លានរៀល ទៅឱ្យដើមបណ្តឹងឈ្មោះ នូ សំរិទ្ធ មានតួនាទីជាមេបញ្ជាការរងតំបន់ប្រតិបត្តិការសឹករងខេត្តនោះ។
ខេមបូចា ចាត់ទុកការសម្រេចរបស់តុលាការខេត្តកំពង់ឆ្នាំងថា សេរីភាពប្រព័ន្ធផ្សព្វផ្សាយនៅតែទទួលរងការធ្វើទុក្ខបុកម្នេញតាមរយៈប្រព័ន្ធតុលាការ ដែលយកច្បាប់ព្រហ្មទណ្ឌមកប្រើជាជាងប្រើប្រាស់ច្បាប់ស្តីពីរបបសារព័ត៌មាន ខណៈយន្តការតាមដាននិងជំរុញប្រព័ន្ធយុត្តិធម៌សង្គមនឹងមិនត្រូវបានពង្រឹង។
ករណីនេះ ខេមបូចា អំពាវនាវទៅតុលាការពិចារណាឡើងវិញចំពោះការសម្រេចសេចក្តីលើសំណុំរឿងលោក សុខ ឧត្តម និងបញ្ឈប់ជាបន្ទាន់នូវការប្រើប្រាស់ក្រមព្រហ្មទណ្ឌមកលើអ្នកសារព័ត៌មាន ដើម្បីធានាថា អ្នកសារព័ត៌មានទាំងអស់មានសិទ្ធិសេរីភាពក្នុងការរាយការណ៍ព័ត៌មានដោយមិនមានភាពភ័យខ្លាច ដែលធានាដោយរដ្ឋធម្មនុញ្ញដែលជាច្បាប់កំពូលរបស់ជាតិ។
បន្ថែមពីនេះ លោក សុខ ឧត្តម បង្ហាញការខកចិត្តនឹងការសម្រេចរបស់តុលាការ ថាជារឿងអយុត្តិធម៌ ហើយលោកនឹងប្តឹងជំទាស់សាលក្រមនោះទៅសាលាឧទ្ធរណ៍ផងដែរ។
កាលពីដើមខែវិច្ឆិកា អង្គការសមាគមចំនួន៥៧ បានថ្លែងរួមគ្នាថា បច្ចុប្បន្ន អ្នកសារព័ត៌មានយ៉ាងហោចណាស់៣នាក់ ត្រូវបានរដ្ឋាភិបាលចាប់ឃុំខ្លួន ក្នុងនោះរួមមាន លោក សុខ ឧត្តម លោក រស់ សុឃិត និងលោក រ៉ាត់ រត្នមុនី ដែលរដ្ឋាភិបាលចោទប្រកាន់ស្រដៀងគ្នាពាក់ព័ន្ធនឹងបទចោទពីបទញុះញង់ឬបរិហារកេរ្តិ៍។
លោក សុខ ឧត្តម ជាម្ចាស់ស្ថានីយវិទ្យុនៃប្រព័ន្ធផ្សព្វផ្សាយនៅក្នុងខេត្តកំពង់ឆ្នាំង និងជាម្ចាស់គេហទំព័រផងនោះ ត្រូវចាប់ខ្លួននៅថ្ងៃទី១៣ ខែឧសភា ឆ្នាំ២០២០ ចោទពីបទ «ញុះញង់ឱ្យប្រព្រឹត្តបទឧក្រិដ្ឋ» ដោយសារតែរាយការណ៍អំពីជម្លោះដីធ្លី ដូចគ្នានឹងលោក កែវ ហួរ អ្នករាយការណ៍ឱ្យគេហទំព័រអ្នកស្នេហាជាតិខ្មែរ៕
