តុលាការសាលាឧទ្ធរណ៍ បដិសេធលើបណ្តឹងនៃដីកាដំណោះស្រាយរបស់មេធាវីការពារក្ដីឱ្យក្រុមយុវជនខ្មែរថាវរៈ និងសកម្មជនសង្គម ចំនួន៧នាក់ ដែលស្នើសុំឱ្យដោះលែងនៅក្រៅឃុំនិងរួចផុតពីការត្រួតពិនិត្យរបស់ស្ថាប័នតុលាការ។
ក្រោយពីសវនាការអសាធារណៈរយៈពេលប្រហែល១ម៉ោង នៅព្រឹកថ្ងៃទី១៧ ខែធ្នូ ឆ្នាំ២០២០នេះ លោក សំ ចំរើន មេធាវីការពារក្តីឱ្យក្រុមយុវជនខ្មែរថាវរៈ បានប្រាប់វីអូឌីថា ប្រធានក្រុមប្រឹក្សាជំនុំជម្រះនៃសាលាឧទ្ធរណ៍ លោក ឃុន លាងម៉េង សម្រេចបដិសេធលើសំណើរបស់កូនក្តីលោក ដែលសុំឱ្យដោះលែងនៅក្រៅឃុំនិងរួចផុតពីការត្រួតពិនិត្យរបស់ស្ថាប័នតុលាការ។
លោកបន្តថា ការបដិសេធនេះត្រូវបានប្រធានក្រុមជំនុំជម្រះលើកហេតុផលថា មេធាវីជនជាប់ចោទមិនបានដាក់ពាក្យបណ្តឹងស្នើសុំឱ្យត្រូវនឹងចំណុចនៅក្នុងដីការបស់តុលាការ។
លោកពន្យល់ដូច្នេះថា៖ «តុលាការសម្រេចថា បណ្តឹងឧទ្ធរណ៍យើងមិនអាចទទួលយកបាន គេថាយើងប្តឹងឧទ្ធរណ៍តែលើដីកាដំណោះស្រាយ រឿងដែលបញ្ជូនទៅជំនុំជំម្រះ អត់បានប្តឹងឧទ្ធរណ៍ និងដីកាដំណោះស្រាយដែលរក្សាជនត្រូវចោទបន្តឃុំ គេទាមទារឱ្យយើងប្តឹងឱ្យចំដីកា តែដីកាមួយទៀតតាមផ្លូវច្បាប់ អត់មានតម្រូវឱ្យជូនដំណឹងទេ។
លោកបន្ថែមថា៖ «តាមផ្លូវតុលាការ គឺតុលាការគេជូនដំណឹងតែដីកាដំណោះស្រាយទេ យើងយល់ថា យើងមិនអាចទទួលយកបាននូវការសម្រេចបែបហ្នឹង យើងគិតថា យើងប្តឹងឧទ្ធរណ៍ក្នុងដីកាដំណោះស្រាយ វាដូចយើងប្តឹងឧទ្ធរណ៍នៅលើចំណុចទាំងមូលនៃរឿងក្តីអញ្ចឹង»។
កញ្ញា ឈឿន ដារ៉ាវី ដែលជាយុវតីខ្មែរថាវរៈមួយរូបក្នុងចំណោមអ្នកជាប់ឃុំ៦នាក់ផ្សេងទៀត បានប្រាប់អ្នករាយការណ៍ព័ត៌មានវីអូឌីនៅក្រៅបន្ទប់សវនាការថា ការសម្រេចរបស់ប្រធានក្រុមប្រឹក្សាជំនុំជម្រះនៃសាលាឧទ្ធរណ៍ដែលមិនអនុញ្ញាតឱ្យពួកគេមានសេរីភាពវិញ ជារឿងអយុត្តិធម៌ ដោយថា ពួកគេមិនបានធ្វើខុសដូចការចោទប្រកាន់របស់សាលាដំបូងរាជធានីភ្នំពេញនោះទេ។
បន្ថែមពីនេះ កញ្ញា ដារ៉ាវី ក៏បានរៀបរាប់ពីទុក្ខលំបាកមួយចំនួននៅក្នុងពន្ធនាគារ ដូចជា ការរស់នៅមិនមានអនាម័យ និងបន្ទប់តូចចង្អៀត ជាដើម។ ករណីនេះ កញ្ញាទទូចទៅតុលាការដោះលែងពួកគេឱ្យមានសេរីភាពនិងបានជួបជុំក្រុមគ្រួសារវិញ។
យ៉ាងណាក៏ដោយ វីអូឌី មិនអាចសុំការបំភ្លឺពីប្រធានក្រុមប្រឹក្សាជំនុំជម្រះ លោក ឃុន លាងម៉េង បានទេនៅថ្ងៃនេះ។
ក្រុមយុវជនខ្មែរថាវរៈ សមាជិកសមាគមសម្ព័ន្ធនិសិត្សបញ្ញវន្តខ្មែរ រួមនឹងសកម្មជនសង្គម ចំនួន៧រូប រួមមាន ឈ្មោះ ថា ឡាវី, កើត សារ៉ាយ, មាន ព្រហ្មមុនី, អេង ម៉ាឡៃ, មួង សុភ័ក្ត្រ, ហ៊ុន វណ្ណៈ និងកញ្ញា ឈឿន ដារ៉ាវី ត្រូវបានសមត្ថកិច្ចចាប់ខ្លួនជាបន្តបន្ទាប់ កាលពីអំឡុងខែសីហា ដល់ខែកញ្ញា ឆ្នាំ២០២០ ជុំវិញការតវ៉ាទាមទារឱ្យដោះលែងមេដឹកនាំសហជីព លោក រ៉ុង ឈុន ដែលត្រូវបានចាប់ខ្លួនកាលពីចុងខែកក្កដាកន្លងមក ជុំវិញការថ្លែងថា ពលរដ្ឋកម្ពុជានៅក្នុងខេត្តត្បូងឃ្មុំ បានបាត់បង់ដីស្រែចម្ការរបស់ពួកគេ ក្រោយការបោះបង្គោលព្រំដែនរវាងកម្ពុជា-វៀតណាម។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក សឹង សែនករុណា មានប្រសាសន៍ថា សំណុំរឿងយុវជនខ្មែរថាវរៈ មិនអាចមានពន្លឺយុត្តិធម៌ទេ បើស្ថានការណ៍នយោបាយនៅកម្ពុជាមិនដំណើរការល្អ ហើយមិនមានភ្លើងខៀវពីរដ្ឋាភិបាល។
លោកមានប្រសាសន៍ថា៖ «ការសម្រេចមិនដោះលែងពួកគាត់ឱ្យបាននៅក្រៅឃុំទាំងអស់ វាមិនមែនជារឿងចម្លែកទេ ពីព្រោះយើងឃើញហើយ កន្លងមក វាទាល់តែមានស្ថានភាពនយោបាយធូរស្រាល មានការបើកភ្លើងខៀវពីប្រមុខរដ្ឋាភិបាល បានយើងឃើញមានការដោះលែងជាប្រព័ន្ធ ប៉ុន្តែបើសិនជាស្ថានភាពនយោបាយនិងស្ថានភាពសិទ្ធិមនុស្សដូចសព្វថ្ងៃនេះ ខ្ញុំគិតថា វាអត់ទាន់មានសញ្ញាណណាមួយដែលផ្តល់នូវភាពវិជ្ជមានទៅដល់សំណុំរឿងពួកគាត់ទេ»។
បើតាមមេធាវី សាលាដំបូងរាជធានីភ្នំពេញ នឹងបើកសវនាការកាត់សេចក្តីលើសំណុំរឿងយុវជនទាំង៧នាក់នេះ នៅថ្ងៃទី៣០ ខែធ្នូ ខាងមុខនេះ៕